2011，07，17 拜錯山，十四當十三；噏愛國，講極得個殼 柯拿，大家好，

2011，07，17拜錯山，十四當十三；噏愛國，講極得個殼

柯拿，大家好，

啊蚊居然發現呢個大問題，两條友仔興高釆烈搭電挮，一入去就按13字。真係冇諗過可能去咗14樓，重喺度猛咁影相，以為重訪革命聖地。啊蚊，拜錯山嘅可能性極高，最簡單嘅求知方法，就係問樓下看更。再唔係，睇下邊個有keep學生叢書，有機會有印地址！真相大白後，同你再去影過。

鄭少，你噏真理、高牆，雞蛋，你啲中文太勁揪，我真係睇唔明。講清楚啲好唔好，等我受吓教益。雪梨周仔，我唔明點解你睇得明。

Ｋ仔，等我講吓我對雞蛋同高牆嘅理解。雞蛋只代表弱勢，並冇話佢代表真理。當弱勢受壓逼時，就算我哋唔一定贊成佢哋嘅理念，都應該支持佢哋爭取應得權利。唔明？舉例：我唔係基嘅，我都會尊重啲攣嘅性取向，如果呢班弱勢嘅友仔性取向自由受到脅，我會企喺佢哋呢邊。呢個就係同性戀由刑事變成非刑事化嘅原因喇。不過卡達菲屬唔屬於「弱勢」，係唔係雞蛋，我就唔知嘞！

二羅間屋而家立立亂，重喺百忙抽空回應呢啲一層二層嘅問題。你嘅立論，我梗係要大力拍手掌贊成，而家連做人嘅尊嚴都冇埋，邊得閑講乜嘢主義啲咁嘅高層次嘅嘢！

話雖如此，今次都係講吓啲高層次嘅嘢。「愛國」，呢個層次夠高冇？

我好細個時，幾歲啩，每年雙十，街邊報攤都有青天白日滿地紅旗，四份一版報紙大細，有竹篾做旗桿，插喺沙桶內。你買華僑、時報等，就會隨報附送。我哋呢班街童，鬼知你左、右咩，執起紙旗一邊行，一邊揮舞，重大聲嗌：「中國勝利，日本掃地。中國發明原子彈，日本發明臭雞蛋！」嗰時我係咁樣愛國。

我十歲時搬屋，包租公成家人都讀培橋，我對社會主義祖國嘅認識由此開始。參加愛國工會活動，睇愛國報紙。唔會再揮舞狗牙旗，每年十一，工會國慶酒會我一定有份表演。愛祖國，用國貨。我老豆舊時用黑人牙膏，我改用美加淨。唔飲可樂飲白雲。嗰時我係咁愛國。

我唱革命歌、語錄歌等愛國歌曲。記得有一次表演，我扮劉少奇自白，其中講到「三自一包」，我雖然唔知係乜，但人民日報話佢係叛徒、內奸、公賊，佢一定唔喺好人，總之，毛主席的指示我照辦，毛主席揮手我前進。嗰時我係咁樣愛國。

小學時，我已識唸老三篇，全校都知我「左」。講你都唔信，嗰時好興毛主席像章，我有唔少，裝滿一個藍罐曲奇罐。有一日，唔知黐咗邊條筋，我底衫扣滿像章，再著白恤衫校服返學！我相信全人類都睇到恤衫內嘅嘢，但先生又冇講乜嘢，平平安安放學返歸！嗰時我喺咁樣愛國。

升中時，我自把自為考入培僑，編入中一乙班，愛國學校嘛！但啊爸唔鍾意，佢想我接受奴化教育，卒之入咗紫荊花香港雞。兜兜轉轉，再返香港雞，重讀文理雞，後來至知，原來我烏啄啄讀咗好多年愛國學校。

上咗九樓，我以愛國青年自居，我係思想先進，其他冇政治傾向嘅人，我叫佢哋做「矇查查」，係爭取對象。如果同我相反嘅，就係反動派啦！思想口徑緊跟中央就可以喇，嗰時愛國比較簡單容易。

直至打倒四條友、小平設計師上上落落、四五，打梳平頭裝嗰條友嘅事件、直至鹿死嗰單嘢之後，愛國就好有難度。

回歸後，以往用中華民國Ｘ年Ｘ日做報頭嘅星島日報，變成愛國報紙；解放後游水來港托庇米字旗下發咗達，而家變成愛國商人；以前經常支持港英政府嘅鄉議局有力人士，變成愛國愛港人士。愛國？有着數噃！

而家，你問我愛唔愛國，我答你唔到，我都唔知點先至叫愛國。好似譚宗仔、鄭棠仔咁唔理三七二十一由頭愛到落尾？好似珠姐先親英後愛國？好似鐵頭何、啊基哥，喺中聯辦飲完茶，然後走出門口示威，又傾又砌？好似毓民大嚿，爆粗掟蕉掃枱？好似長毛啊牛，經常抬棺材幫達官貴人助慶？……？你話咁多款，邊款愛國啲呢？

京官來港，叫港人愛國愛港。國民教育，叫學生愛國愛港。選特首，要侯選人愛國愛港。但從來冇人好好解釋過你知，愛國愛港係乜東東？愛啲乜嘢？點解要愛？

又話，我國唔搞政黨輪替，三權必須合作。黨指揮政府，政府管理國家，咁嘅格局千秋萬世。咁，如果你唔妥呢個偉大光榮正确嘅嘢，喺大人嘅眼中，你永遠都唔係愛國人士喇。

愛國咁艱難，做番個普通人算喇。做個堅持正義，爭取人權自由嘅普通人。做唔做愛國人有乜問題，做個好人得喇！

再噏過，

嚤囉

再者：本周日又要去hiking，提早交呢篇周記。