2014.01.10 噏三寶，見唔到。徐夕，蛇王，煙花 show

2014.01.10  

噏三寶，見唔到。徐夕，蛇王，煙花 show 。

3 - D ，睇得到、聽得到、聞得到嘅煙花

柯拿，大家好，

新年前一日，規矩係仍然要開工開到五點半。大時大節，個個朝早買晒嘢，就趕返屋企煮飯。下晝嘅商場，愈晏愈清靜。我已經預計咗呢個情形，早一晚，已經執定晒嘢，帶埋番工。到四點，即刻落閘走人，泊低車喺火車站，搭火車出城⋯⋯睇煙花咯喂。

其實，一支公出城睇煙花，係想咗好耐要做嘅事，今次的起心肝做咗佢。曾經見過有人喺雪梨海港大橋橋底草地露營，所以孭埋營、睡袋，可以嘅話，就喺橋底瞓一晩。所以完全唔擔心回程嘅交通。

可能仲係早，火車非常𣈱順，亦好鬆動，唔駛五點鐘就出到雪梨巿中心嘅Wynyard 站。行出佐治街，就感受到氣氛喇。一群群、一堆堆嘅不同組合，有家庭、有朋友、有情侶，滙成人潮，急急流向雪梨樂士區。樂士區 the Rccks，喺河嘅南岸，雪梨海港大橋就由呢度過河。由橋底附近海邊望向雪梨歌劇院、環型碼頭，亦係咫尺之遙。所有遊客要嘅嘢，呢度一應俱全。所以話，樂士區係遊客必到之地。

唔駛十分鐘就行到樂士區，附近馬路已經擺滿水馬，封晒路，只准行人進入。我唔駛四圍踱揾地方打躉，因為心目中已有理想位置，就係，喺正大橋前嘅草地。呢度絶對唔係睇煙花嘅上佳位置，不過就絕對係感受煙花、燃點、飛起、爆炸嘅最佳地方。

揾棵樹底，鋪好地蓆，擺好架步。先搞掂咗盒腰果雞丁飯，食過晚餐，就俟喺樹下，八八卦卦，四圍𥄫，靜觀世態。雖然仲有大把時間至放煙花，好彩，坐喺草地都唔會太悶。嚟睇煙花嘅，當然乜嘢組合都有，不過，始終係少男少女居多。

袋鼠男仔，多數唔姿整，都係T恤、短褲、涼鞋，或係簡單便服。雖如此，陽光男孩，係咁意都有啲肌肉，肚腩仲未啤大，都有啲睇頭。我雖然唔係 gay 嘅，亦覺賞心悅目，仲好似睇到我少年影子。咦，Those were the days 嘅時候，我都咁上下暏。

袋鼠少女，當然唔興濃裝艷抹，佳節時候，亦唔會素顏示人，娥眉淡掃總相宜。相傳，澳洲有三寶：鳥蠅、肥婆、醉酒佬。但係，據統計，受減肥潮流影響，原來十幾廿歲嘅女仔，多數係偏瘦 under weight。我矚目所及，年青少艾，毫不吝嗇，tube top、小背心，短裙，熱褲，走嚟走去。雖云係夏季，此情此景，實在非常清涼。

呢度係禁酒區，今日又大風，烏蠅都唔知吹咗去邊。澳洲呢三寳，今曰完全睇唔到。

地上嘅兩腳動物，已經目不睱給，原來天上海上都有嘢睇。有兩架飛機就喺大橋，同雪梨歌劇院上空飛嚟飛去，時而急速爬升，時而失速直墜。兩隻嘢拖住機尾白煙，伴隨住螺旋槳嘅怪聲，喺上空追逐。揾命搏喎，當然賺得雪梨港兩岸嘅人群一陣又一陣嘅喝彩聲。原來飛行表演係慶祝雪梨歌劇院開幕四十年（1973年10月20日），令今年除夕夜，又多一樣節目。

望番落雪梨港，亦非常熱鬧。大小遊艇、帆船，喺海港游弋，一早霸定靚位，拋錨等睇煙花。仲有一定唔少得嘅，就係悉心裝扮過嘅高桅帆船。每當佢哋穿過雪梨大橋，都引起一陣哄動，岸上嘅人，絕對唔會吝嗇佢哋嘅掌聲，喝采聲、口哨聲。船上嘅人都企晒上船邊甲板，向兩岸人群揮手回應。嘩，我諗，此時此刻，如果我喺船上，感覺一定好過癮。

海陸空都咁熱鬧，咁又點會悶。

愈夜，愈黑亦愈多人，我前後左右都坐滿人。一係有老有嫩，一家大細；一係十個八個，死黨老友；一係二人世界，目空一切嘅小情人。好似我咁，儍更更，得一支公。前睇後睇四圍睇，似乎都係得我一個。雖然周圍都咁熱鬧，亦唔感覺悶。唔知點解，個心，間唔中，就浮出一絲絲嘅寂寞。哦，乜原來，熱鬧同寂寞呢兩家嘢，係可以並存嘅喎。

愈夜愈凍愈大風，多數人都有備而來，即刻加衣，仲有不少帶埋毛氈，大被冚過頭，就唔會冷親喇。告誡各位，如果要嚟雪梨港睇煙花，記住，除咗食物同水之外，唔好以為係夏天，禦寒衣物，必不可少。我？即刻著上風䄛，冚埋地蓆，閉目養一養神。

砰！砰！砰！做乜咁快放起煙花。原來九點鐘，先嚟一場小型煙花，主要係為咗嗰啲有好細個細路嘅家庭。帶住咁細個人仔，點等得到十二點，大人細路都辛苦，咁樣安排，雪梨市議會都算諗得周到。

七、八分鐘嘅煙花，當係頭盤喇。煙花過後，果然不少人推住BB車，或者抱住熟睡嘅人仔，雞咁腳走人，梗係喇，仲要趕搭車返尾企。喂，咁嘅場景，我都經歷過。當年我抱住嘅小人兒，而家一定同佢班老友一齊，又食又飲，嘻嘻哈哈等緊倒數。再回多幾十年帶，我又有冇同阿爸阿媽新年倒數？如湮往事，一幕幕，重現眼前。世事雖然多變，始終走唔出個圈圈。聽下秋官點講：

鄭少秋 

輪流轉

作詞：黃霑

作曲：顧嘉煇

輪流轉，幾多重轉？循環中，幾段情緣？

千秋百樣事，幾多次輪迴，點解世事萬千轉？

凡塵裡，種種留戀。命運中，各自隨緣。

今天少年人，他朝老年人，不知有沒有改變？

剩下了，多少掛牽？還留得。多少溫暖？

抑或到頭來，一切消逝，失去了就難再現？

人群裡，幾多奇傳？情緣中，幾多愛戀？

當一切循環，當一切輪流，此中有沒有改變？

從前種種，昨日之日，已不可留。信唔信都好，而家做多啲好事，世事遁環，希望啲好事，繞個圈，兜口兜面撲埋嚟，行番過尾運。善哉善哉。

正在同秋官 jam 緊歌，忽然起哄。啲人走晒過嚟，企喺我前面，個個揾個背脊 dut 住我。我正前方就係樓高四層嘅雪梨 Park Hyatt Hotel，一個個客房無敵靚景大窗，正正向住我哋大橋呢邊。各位梗知，如果夜晚喺一間著咗燈嘅房，前面玻璃窗，就會好似一塊鏡，映照自己房內情形就一清二楚，但係街外情景，就只靠街燈，睇得像霧又像花而已。房內嘅人睇唔到外面，警覺性就放鬆。而我哋喺街外，望入每間房，都睇得清清楚楚。有一位女仕，下身只褸住一條毛巾，施施然走出浴室，仲喺窗前打咗幾個白鴿轉。草地呢邊，見到有咁養眼嘅風景，能不起哄哉。都係幾秒鐘嘅光景，靚女終於發現自己成為眾矢之的，急急撳低電窗簾，加映短片亦告結束。其實，我唔係幾睇到啲乜嘢，班友仔好似人牆咁企喺我前面。到我突圍而出，窗簾已係徐徐下落之時也。可惜可惜。各位姊妹，去旅行入住酒店，記得執生，四維𥄫下，無端端做咗主角就無謂喇。

加影短片，令時間過得更快。大橋橋躉用雷射幻燈，以多國文字打出今年煙花匯演主題： 「Shine ，閃耀」。倒數亦隨即開始。五、四、三、二，一，密密麻麻嘅煙花，就喺大橋鐵拱上，歌劇院船帆型屋頂上，雪梨海港煙花躉船上，⋯⋯總之四方八面，一齊冲天勁爆，一朶朶五顏六色，形態各異嘅煙花，此起彼落，成天都係。

我身處嘅地方太多樹，冇一個好大嘅天，睇空中嘅煙花絶對唔理想。但係勝在近住煙花飛起嘅地方，點著嘅煙花火箭就喺前面，發出尖銳嘅呼嘯聲，然後一飛冲天。周圍就係嗖嗖聲，咁樣睇煙花，至夠立體。

戲肉梗係橫跨成個大橋底下噴出嘅煙花瀑布，咁近距離，一粒粒火星都睇得分分明明，火星噴出嚟嘅嘶嘶聲，只有呢度聽到，離遠睇，就冇咗聲音效果喇。呼嘯聲、爆炸聲、嘶嘶聲，掌聲、歡呼聲、加埋大喇叭嘅交響樂聲。就喺咁熱鬧嘅氣氛，送走2013，迎來2014年。身邊嘅人都興奮得大呼小叫，互相擁抱。⋯⋯，我一支公，企喺草地，笑眯眯望住周圍嘅人，突然覺得，⋯⋯，乜咁有電影效果！

煙花尾聲，嚟個 grand finale，ping ling pang Lang ，成個天都係煙花，爆到七彩。然後，璀璨瞬間歸於平靜。⋯⋯分明係人生嘅寫照。

十二分鐘，680萬袋鼠幣，化為硝煙。都好嘅，財散人安樂，希望今年，個個大吉大利，安安樂樂。煙花又睇完，個個執嘢走人。我環顧四週，冇一個人留低紮營，我又唔多敢一個人留喺度，睇嚟，橋底露宿計畫都係行唔通。執埋包袱，跟住人潮，搭火車走人算罷喇。

再噏過

嚤囉