2012.08.26
四十年，一丁麵，食極都唔厭；金利來，噏愛国，只有禮義廉。
柯拿，大家好，
呢一周，個個圍往風扇底張枱，大發偉論，好鬼熱鬧，好似少林足球話：大師兄返嚟喇！keep it up，唔好畀佢停！
首先，要幫出前一丁翻案。一丁麻油麵，我食咗40幾年，而家仍然係我嘅早餐首選，一周起碼食五餐。有睇我fb嘅都知道，行山遠足前，麻油一丁畀我一朝嘅能量。我係成箱咁買，一箱30包。產地係香港大埔工業邨，名副其實，香港Q嘜製造！仁類兄，千祈唔好罷買。話時話，原來，一丁真係有日本製造，貴好多，一包日本製一丁，可以買四包香港一丁。我買過，麵質比香港製幼細，但並唔係特別好食。各位罷買時，請留意商標。仁類兄，放心照食香港一丁可也。又講，全球一體化，好多日本大牌子，其實中國製，要搞清一件貨品嘅產地，實在係大學問。有美國佬試吓唔用中國貨，點知寸步難行，可知此事難度極高。
點可以唔講劉翔，唔好話我認屎認屁，京奥時，我已經話佢係扮嘢。今次佢跑之前，我已經話，以劉翔自己，以至中国體委，甚及中国政府嚟講，跌倒受傷退出，係最佳結局。好簡單，輸唔起！餐餐用金牌嚟證明大国掘起，輸咗點算！再唔講劉翔孭住幾多經濟利益，幾多人喺「欄王」個招牌下揾緊銀。好似成龍話：我唔退得，我唔食啫，好多人跟我揾食。That is life！
奥運而家係大生意，多數有睇頭嘅運動，即所謂spectator sports，都非常商業化。其實，喺1992之前，職業運動員係唔准參加奥運。嗰時，香港好多運動協會，個名前面都有「業餘」兩字。例如HKAAA, HKASA, HKAGA，前面個A字就係Amateur 。美國NBA dream team，第一次亮相奥運，正是92年巴塞隆拿奥運會。在此之前，運動員攞人斗零贊助，都會取銷資格，褫奪獎牌。共產世界，用「業餘」個名，大攞金牌，呢位飛魚係海鮮加工厰工人，嗰位百米飛人係送貨工人，而射擊冠軍，正係蘇聯紅軍……，總之就唔係職業運動員。咁唔公道，要大家一樣，要名正言順，職業化，非業餘化（個名幾古怪），咁就公道嘞！
講起公道，講起明正言順，特區政府就唔合格喇。名義上，特首係冇黨派背景嘅，實質上，盲嘅都睇到，能夠捧佢上位，又喺後面支持住佢嘅，正正係偉光正嘅黨。有好嘢時，就走出嚟領功，衰咗嘞，又可以縮埋，話高度自治，唔關我事。咁着數都得？咁唔公道。政府問責，梗係要問到執政團隊（黨）上，冇可能邊個孭咗佢就算數，你估係煙隔睇場，畀咗安家費，keeper一個人孭晒上身就過骨？特首在公（施政、理念…）在私（個人操守、廉潔…），佢背後嘅政黨都要負責。
2010年5月，袋鼠國上屆新南威爾斯州工黨政府Road and Transport部長 David Campbell，畀報紙影到佢入gay sauna，之後揭發佢係gay（又奇在，連佢老婆同兩個仔都唔知佢係gay嘅！），Gay唔係犯法，但係為咗保護工黨形象，避免影響下屆選情，佢要辭職。至於下屆選民係唔係重支持工黨，畀個州政府佢管，就睇一人一票嘅州大選state election。終於2011年，工黨結束16年新州管治，自由黨重登政府。
講開又講，我冇見過袋鼠國有人上街叫政府，或官員下台。因為唔駛咁辛苦，一係，政府見勢色唔對，自動踢人落台，一係，下屆大選人民用選票，成個政府踢佢落台。遊乜鬼行，飲吓啤，晒吓太陽好過。
政府問責，人民授權，咁條氣就順，就冇乜民怨喇。
睇吓特區，呢個議會，阿爺已住完全操縱，所有議案，話過就過，關鍵少數，已經冇咗。政府議案，23條，只須過半數就過。貓骨吴藹儀話，阿爺已經唔駛拉你一票兩票，而係成個黨拉你埋身。暗寸民主黨已經投降。各位想頂住阿爺嘅人，唔好再信民主黨喇，唔知幾時，喺關鍵時刻，好似政改方案咁，佢又再跣你一鑊。
袋鼠國係兩黨政治，唔係工黨就係自由黨。因為比例代表制，細黨亦有生存空間，Australia Democrats 係一個細黨，我好欣賞佢嘅口號：Australia Democrats, keeping the bastards honest。意思就係：因為有制衡，大黨亦要老老實實，唔可以任意欺騙人民。
我唔係特區選民，但如果我有票，我一定唔投建制保皇派，民主黨都唔投，已經變咗質喇。咁，你估我會點投？Carmen, 你決定投邊個未呢，又？
賴子，你自問愛國，不如我問吓你，點解你認為自己愛國？珠姐、金利來曾都話自己愛国，重教你點愛。葉劉又話愛，田二少指責學民小朋友，唐糖話自己從小便讀毛語錄，煲呔吹口哨都吹国歌……。冇嘢嘅，今一期，愛国有著數，金利一齊來吖嘛。如果愛國要拉要鎖要打鑊金，唔知呢班友又愛唔愛呢？賴子你嘅愛國，同呢班友愛国，點區隔？
中國冇奥運金牌你愛唔愛？
中國冇太空人（航天員？）你愛唔愛？
孫大炮滿清時推翻滿清係愛國
毛朱劉民國時推翻民國係愛國
如果今日有人要推翻呢個国，佢哋係唔係愛國？
蔣家大小姐喺大學經常見到由強国嚟嘅留學生，佢哋嘅騎離所作所為，令大小姐耻與為伍，大小姐經常話畀人聽，佢喺香港（唔係中國）出世，而且係97前嘅香港。呢個国，點愛得落！
再噏過，
嚤囉
No comments:
Post a Comment