2011.12.11 Chok 氣管，噏蒸籠，純子長毛愛得瘋。-- 我的第一課性教育

2011.12.11

Chok氣管，噏蒸籠，純子長毛愛得瘋。-- 我的第一課性教育

柯拿，大家好，

1980年安徽作家戴厚英寫小說「人啊！人」，稱為傷痕文學，翻譯成多國文字，人盡皆知。但係今期全城唔講人，講畜牲。跑馬啦、上海豬啦、山東狼啦。今日，我都唔講跑馬，唔講豬狼鬥，不過都係講動物。講鹿、講綿羊。

雲南野生動物園發出一張帖，園內一隻叫純子嘅梅花鹿，愛上（？）一隻叫長毛（！！）嘅綿羊，而且每日上演動物春宮三級片。就住呢個問題，向全球網民徵求意見。實在動物界嘅愛愛恨恨，駛唔駛人類「叉」着腳落去。唔通真係要同純子、長毛講堂性教育，等呢兩隻痴羊怨鹿有端正嘅性觀念？人啊！人，真係干卿底事，鬼佬話myobb。

我唔熟悉動物性教育，不過有興趣講吓... 「我的第一課性教育」。

回卷到1970年，我啱啱升中，已經成日喺九樓打躉。當時九樓各位大哥哥大姐姐，多數來自名校，成日捧住本電話簿咁厚嘅英文書嚟睇。我呢件香港雞靚仔，只係小小薯仔一件，只有仰望大哥大姐嘅份兒。嗰時啲學術討論，咁高級嘅嘢，邊有我份。

一日，上到九樓，一班着住名校校服嘅姐姐哥哥，圍住大廳中間嗰張枱（博士張牀）。充滿好奇心（俗稱八卦）嘅我，當然唔執輸，我又細細粒，捐入人群霸頭位，我優為之。只見枱上有一塊四方大板，一隻昏迷咗嘅白兔仔釘咗喺塊板上。好明顯，係解剖實驗。原來呢班哥哥姐姐係中六中七讀生物科嘅，佢地考matric試時，要考解剖，今日係温習。而家回想，呢班哥哥姐姐之中，可能有幾個係如今獨當一面嘅大國手。

主持解剖嘅係貞姐，九樓咁多個啊姐中，我印象中，讀書最叻嘅，就係貞姐。各位啊哥啊姐，我有冇講錯。

只見貞姐戴住膠手套，手執手術刀，一步一步咁講解，如何落刀，點樣唔會切斷血管，否則就會滿江紅喇。手術不徐不疾，按部就班。打開肚皮，一層薄膜包住內臟，再打開胸腔，見到心肺。指出氣管位置，展示主動脈、上下腔靜脈…。打開心臟，見到心房、心室、心瓣，指出血管、血液流向…。再打開腹腔，抽出食道，連接胃、小腸、大腸，肝、膽，胰。講吓食物喺唔同位置，點樣消化。最有印象嘅係…你一定估到…冇錯，係兔屎。問吓你，點解兔仔屎係一粒粒嘅？

遁環系统、消化系统…Er…，忽然貞姐望住我，停咗講嘢。然後細細聲同老咩頭講，「佢（即係我），聽唔聽得？」咩博用一貫笑笑口嘅樣望吓我，然後對貞姐講，「佢中學啦，可以聽得。」貞姐繼續，而家講到生殖系统。…我梗喺非常留心咁聽啦。佢再講，呢度係蒸籠、呢條管係….。講完生殖系统解剖位置後，貞姐不忘告誡各位唔好亂諗嘢，要生活正派，多參加建康正派活動，自然唔會心存斜念…。咦，原來係性教育。

我第一次正式嘅性教育就喺九樓，而且要經咩博點頭批准。

多謝貞姐，多謝老咩頭。

再噏過

嚤囉