2014.04.01
落雨噏冰雹，面書相片新部落
柯拿，大家好，
星期日，我倆同大小姐食完飯返屋企，冇耐，個天行雷閃電，落起大雨。屋前 driveway 啲雨水，ba ba 聲流落嚟，即刻打開車房捲閘，檢查屋前下水道去水情況。因為如果水渠塞咗，分分鐘雨水就沖入車房，咁就認真麻煩。好彩一切冇問題。
再睇面書，原來同一時間，香港都落咗場冰雹，搞到地鐵、商場都七國咁亂。跟住各大玄學「家」走出嚟抽水，就係指定動作喇。
我人生中記得嘅第一次落冰雹，係1967年。一個下晝，我不知如何自己一個人喺高士打道，灣仔差館附近，嗰時嗰度係海皮。兩條行車綫外就係海邊石壆，我就喺石壆附近。忽然個天黑到好似夜晚，跟住就有好多一粒粒嘅嘢兜口兜面掟埋嚟，我儍仔一個，都唔知係乜嘢。當時有美軍戰艦停喺海皮，我仲以為嗰啲一粒粒嘢係由軍艦射過嚟，即刻走夾唔唞。
返番屋企，阿爸話呢啲叫做冰雹。佢話，一落冰雹，個世界就唔好喇。果然，1967年，香港就嚟一個大大大風暴。
香港落冰雹，雪梨落大雨，唔知又預示乜嘢。台灣學生反服貿運動、香港佔中爭普選。中華民族，行到今日，不知是禍是福？
唔經唔覺，南美旅行歸來又兩星期喇。揀咗啲相上咗面書，有興趣就睇一睇。
Part 3
part 2
part 1
又開咗個新 blog，而家已有幾篇旅行日記。而家逐日繼續寫緊，各位老友，得閒就開嚟睇下。
再噏過
嚤囉
No comments:
Post a Comment