2013.10.21 冇帶衫褲噏一餐，到處火頭燒後欄

2013.10.21 

冇帶衫褲噏一餐，到處火頭燒後欄。　

柯拿，大家好，

上個禮拜係重陽，本來都想寫啲嘢。華夏傳統，留番拜山至講吖嘛。但係執緊遊記，始終冇寫。

今朝非時卜傳來阿送問候，既然大家咁關心我（哈，監人乃後，係我本色），即刻同大家噏兩句。重有一個原因，今朝六點幾返到商場，諗住去做 gym ，點知唔就得帶gears，早咗兩個鐘頭，冇乜好做，不如坐定定寫篇嘢喇。

阿送睇到新聞報導話袋鼠國山火，嚤囉仔最近又賣魚佬沖涼，冇晒聲（腥）氣，即刻問候我，真係有心，真係有心。

我喺商場做嘢，出面天氣係冷係熱都唔知。山火當日，中午出街食飯已感覺到又熱又大風，華人叫做吹火風，一吹火風就一定有山火，只係睇大小而已。下晝喺鋪頭裏面都聞到山火味，山火味實在就係燒柴枝嘅味道。放工一出街，就見到天邊濛住一大片煙麈，山火真係好大。

新聞話，今次大火係十年來最嚴重嘅，原因一定係大風加高温，曾經睇過電視新聞影像，大火可以喺兩三秒鐘移動百幾二百公尺，根本冇得救。所以 Bush Fire Brigade 好重要嘅工作係監測山火走勢，叫居民快快走人。今次據說電腦系統唔夠先進，風又大，再加上風向難測，好多人都走得好怱忙。一般嚟講，每次有山火時，消防隊會估計，邊啲地方有危險，就即刻安排撤退，如有老人村就安排巴士等等，然後消防員逐家拍門，確定冇人走唔甩。好彩喺 bush 邊沿嘅住宅區，多數唔會好大，唔會好多屋，逐家拍門都係OK嘅。

咁大山火， touch wood， 又冇燒死人喎，不過有個63歳（我唔會叫63歳係阿伯），佢堅持要守衞自己間屋，唔肯撤走。佢好叻，攞住水桶同火神搏鬥。間屋冇燒到，不過可能太操勞，心臟病發，英勇殉屋，成為今次山火第一個（希望係最後一個）死者。

袋鼠佬多數住屋，住喺 bush就更加係，咁點防火？屋周圍雜草或易燃物要清理，就人人都知。澳洲所有屋，氹氹匝圍住屋頂邊沿都有集水槽，gutters，作用係集合屋頂雨水，引落垂直去水管 down pipes，再流入水渠 drain。可惜，如果附近多樹，落葉就會積喺集水槽裏面，最後變成枯葉，氹氹匝圍住屋嘅枯葉，就係最好嘅燃料。一旦附近有山火，著咗火嘅枝葉灰燼火星會急速上㫒，隨住風，四圍去，有啲落咗喺滿晒枯葉嘅集水槽，成間屋即刻著火。所以清理集水槽非常緊要。

慘就慘在清理集水槽要爬上屋頂做，一個唔小心跌落嚟就好大劑，唔知有冇統計，每年幾多人因此受傷，我諗，唔會係小數目。前幾日，我哋一個雪梨好熟嘅朋友，就係因為知道有山火，佢爬上屋頂掃樹葉，唔小心跌咗落地，傷得都幾重，啱啱先至出咗lCU。喺呢度，希望佢快啲好番，早沾勿藥。

今朝返工，太陽已出，昇到咁高都紅卜卜，一啲都唔燦眼，就係因為空氣中佈滿山火飄起嘅微粒，阻擋陽光。太陽成個咸蛋黃咁，好紅，好靚。不過，絕對唔係好嘢，中午去飲茶時，成個區都係煙霧濛濛，好大陣山火味。各位，而家至係10月，每年山火季節係12 月。即係重有排燒，大家要幫幫忙，用食指、中指造成個交叉，然後講 fingers crossed，希望山火唔好做成傷亡。

好彩，袋鼠國社會保障充足，再者，有屋嘅，多數都有保險，燒爛咗間舊屋，保險公司就賠間新屋畀你。燒晒啲衣服鞋襪，枱枱櫈櫈，保險公司畀錢你買過晒啲新嘢。所以電視新聞，你唔會見到有人，呼天搶地，或者大叫，「死喇死喇，冇晒啲嘢，以後點生活」！呢啲咁嘅場面，絕對見唔到。但係災民眼見自己平日起居嘅地方，變成一堆堆頹桓敗瓦。悲從中來，互相擁抱，互相安慰就梗嘅喇。電視訪問災民，有人話佢好傷心，因為佢祖父母留落嚟嘅嘢付諸一炬。又有一個人，成屋都係汽車模型，佢珍藏咗幾十年，而家全部燒晒。⋯⋯。傷心嘅唔係損失金錢，係一份一份珍貴嘅囘憶。囘億，邊間保險公司有得賠！電視又影到有災民喺炭堆中揾番結婚介指，揾番訂情信物等，失而復得，一笪笪碳屎嘅面上露出微笑。幾咁温暖。

一講山火，咪以為係一場山火，通常一燒就好多個火場，今次有成百個火場。我以前已經講過，近民居或重要地點，就會撲火或者掟水彈，否則就用back burning嘅方法，圍一笪地方，由得佢燒晒為止。

講番我。touch wood，我住喺近城市嘅住宅區，完全唔近 bush。路邊，後園都有樹，但係絕對唔係叢林嗰隻環境。如果bushfire，影響到我，咁真係好大好大好大⋯⋯好大鑊。fingers crossed 永遠唔好發生！

多謝各位關心。

話時話，袋鼠國山火就年年都燒，而且一定火頭處處。阿狼統治特區一年，前後欄四圍著火，又係火頭處處。一年來，佢冇撲熄過任何一個火頭，就咁由得佢燒。毛主席話過，解放軍係魚，老百姓係水。咁，特區老百姓呢㷛水，會唔會畀阿狼啲火頭㷛到沸騰起嚟呢？又或者係心如止水，個個顧住搵食，幾猛火都仍然內心冰冷，不為所動？

呢排 May 姐咁紅，我唔執輸，又講煮嘢食。記得肥肥沈澱霞教煮水餃，佢話滾水太大會滾爛啲水餃，秘訣就係：一水滾就加冷水降温，如是者一滾就加、再滾又加⋯⋯。咁就可以保持水溫唔太高，可以煮熟水餃，又唔會滾爛水餃皮。香港呢煲水，阿爺呢個大廚梗係有方法唔畀佢太滾，因為十三億老百姓亦係水，而且控制咗多過半個世紀，要佢凍就凍，要佢滾就滾，溫度控制得啱啱好。你香港呢煲水滾，佢即刻淋一売冷水落嚟。十三億水，要幾多有幾多。阿爺及其家人，就有靚水餃食喇。

再噏過