2012.09.04 你噏愛，佢話害；我行我素，懶理隻旺財

2012.09.04   

你噏愛，佢話害；我行我素，懶理隻旺財。

柯拿，大家好，

九月，雪梨踏入春天。真奇怪，一話春天，即刻暖番晒，今日天清氣朗，藍天冇雲，好天到不得了。中午，過隔籬飲茶，商場門口，見到地下，冷冷清清戙咗個2呎高嘅招牌仔，係澳洲自由黨嘅選舉招牌。呀！提醒我，原來9月9日，我都要去投票。係地方議會Local Council Election。一人一票選舉。

民主，已經好似呼吸空氣咁自然，政治穩定，邊個上台都差唔多，有鬼人著緊咩！如果唔係要罸錢，好多人都唔去投票。香港？好似重拗緊乜鬼嘢叫做「民主」喎？

今年九月，係蔣家十分值得紀念嘅月份，究竟係乜？賣個關子，遲吓至講。

愛国果然海鮮價，阿牛先生等人，烏啄啄，因緣際會，成功登島，變成愛国勇士。幾日後，人民日報駐日分社，話阿牛等，登島唔係愛国，而係害國！乜嘢係愛？乜嘢係害？解釋大權喺阿爺手，幾時到你置喙！

呢周大新聞梗係班學民仔喇，冇呃你，如果我喺香港，我一定攞埋個營，去門常開，有幾何可以喺政總露營？必定一試。

呢班學民仔果然犀利，有理有利有節，肯為信念企出嚟，此舉感動咗好多人。呢個世界，肯企出嚟講句公道話嘅人，實在太少。學民仔亦造成風潮，好多家長，而家至夠膽同學校講出自己嘅憂慮。

一黨專政嘅政體，講國民教育，唔喺洗腦會係乜。班特區愛国人士，好似錄音機不停咁話：「國民教育，全世界都有」。無視由全世界phone in 返香港，話佢哋本國根本無呢啲咁嘅國民教育。不如又咁講，如果有一日，政黨可以輪替，再討論「國民教育」都未遲。

又係嘅，香港人好忍得，只要三餐搞掂，好少出聲。今次唔同，偉光正嘅黨，歷史太驚人，家長點信阿狼政府。為咗下一代，一定要出聲，守護仔女個腦袋。

輸咗一餐畀賴子，條氣係唔多順。不過，都要寫個服字畀你。你話寧生敗家仔，莫生蠢鈍兒。果然犀利，你一早知道佢係敗家仔。香港嘅規矩程序、核心價值、土地權益等等，已經開始敗喇。一語成讖。

電視上重係播緊門常開大露營，唔知點收科。

各位，家長們為咗自己嘅下一代，已經行咗出嚟，9月9月，行出嚟，為香港嘅前途，投一票。我都要去投，為我嘅銀包。

呢支歌，送畀阿牛先生。

愛你變成害你

作詞：黃霑
作曲：顧嘉煇
主唱：潘迪華

什麼是情　什麼是愛　為什麼愛會變成害
我愛你　變了害你　萬種恩情變禍災
什麼是好　什麼是歹　為什麼好會變成歹
我愛你　變了害你　千番好意竟成歪

難道世間真是孽海　三頭六臂跳不出來
難道人生只有悲哀　千恩萬愛都不存在

我沒有恨　我只有愛　為什麼偏會把你害
我愛你　變了害你　早知道害你　我不愛
難道世間真是苦海　神仙也是跳不出來
難道人生只有黑暗　光明永遠都不存在

我沒有恨　我只有愛　為什麼恨來　愛不來
我愛你　變了害你　早知道害你　我不愛

再噏過，

嚤囉