2013.09.12 有緣噏起潺仔華，幾時約埋飲餐茶

2013.09.12  

有緣噏起潺仔華，幾時約埋飲餐茶。

送海仔機（啟徳機場 - 1973）

柯拿，大家好，

今次賴子出題目，畀題材我，我點可以有負所託，速速再下一城。

阿蚊唔好嬲住，寫埋呢篇真係專心開工嘞，一定準時交功課，你同我定。

再三搜索枯腸，都諗唔到有咁嘅組合去睇大軍閥。以當時環境，要約埋海仔、大頭傑一齊睇狄娜，實在幾難想像會咁做。我都會諗，如果睇完，邊條友爆響口，畀死佬仁知道咪好大鑊?如果我想睇，我會揀我自己一個人去。嗰時咁鬼左，畀人斷正，以後點見人?

當然而家睇番轉頭，去睇大軍閥，又有乜嘢大不了。賴子講出呢段「往事」，老實講，真係好唔開心。唔係因為畀佢話我睇戲，我最大反應，係話我對住成班友自我批評。呢個唔似我 !以我自己了解自己，當時「你眼望我眼」嗰個角色，應該由我做。我好難想象我頭耷耷，自我批評，個鵪鶉樣，尤其係喺賴子面前，幾時會認低威。我哋嗰時，最鍾意死撐，點衰都好，都大大聲，死都抝翻生。認衰仔?嗰個唔係我。三歲定八十，呢個咁嘅格，到今日都係。點會變。

其實，我有啲遺憾。好細個就上咗九樓，同九樓嘅人會睇乜嘢戲，約定俗成，大家都唔會過界。不過落咗樓，同自己同學仔，戲種嘅選擇就多咗喇。可憐嘅嚤囉，中三嘅時候又走返入香港雞，嗰度根本係另一個九樓。我好難想象，我會約雷公、馬仔去睇蜜桃成熟時。又或者約其他同學去睇官人我要，而馬仔、雷公又唔知嘅。喺我青春期時，冇乜睇過呢啲戲，實在喺遺憾。信不信由你，舊年我先至第一次睇艾曼妞。哈，我唔係特別清純，只不過冇其他人咁多機會而已。

我衰就好喇，要拉埋海仔同大頭傑落水，就認真唔好意思。橫掂都係嘞，不如就講一講：我和海仔的二三事。

梁海英，佢應該同我同年啩，嗰時喺國術組我哋好傾得埋，時時一齊呢度去嗰度去。一齊開小組嘅時候，二羅三羅有冇在埸?佢讀聖類斯，名校喎。經常著件白雪雪嘅裇衫，乾淨斯文，打扮得體，我嗰時覺得佢係有錢仔。

海兒，呢個名係死佬仁改嘅，我一路都只叫佢海仔。死佬仁最鍾意用國語叫海兒，啲國語重講得鬼咁肉酸㖭。老咩頭，有機會問下死佬仁，引證一下。有一次，我，海仔，同死佬仁行黃泥涌道，行過CCC木球會，不知如何，同件鬼仔發生爭執。當然冇打起嚟，死佬仁用流利鬼話鬧佢，講咗乜嘢，當然記唔到，只記得最後一句。死佬仁好似李小龍咁指住鬼仔，話：China is not in the old days。然後大踏步走人，我同海仔跟住後面，海仔戙起手指公話，呢句講得好。我就話，死佬仁啲英文果然犀利。老咩頭，問埋呢單嘢，睇佢記唔記得。

中三下學期喺香港雞，嗰日要交英作，我啲咁嘅英文，點識作文。海仔知道，即刻大筆一揮，好快就寫好篇文，我照抄一次就交。派簿喇，Miss(乜名? Lam ？馬仔記唔記得，教英文兼班主任）叫咗我出去。「呢篇文唔係你寫嘅。」我邊有得唔認。以後?以後咪唔交功課囉。佢見我咁懶，要見我家長，我一生人，只有一個老師家訪過我，就係呢個Miss。家訪前，同阿媽夾定晒，我阿媽聽晒我話，當然話我又乖又精靈。Miss 見我窮等人家，書枱都冇張，讀書不成都算喇。咁又過一関。

嗰時鍾意用假名，海仔叫自己做梁華海。老咩頭寫嘅話劇，喺中總演出，主角潺仔華，就係由海仔飾演。內容講潺仔華喺學校讀書，壓力又大，又有飛仔引誘開 party，有人介紹佢上九樓，揾到健康正派嘅生活。我喺劇中飾演笑口棗。老咩頭點會唔記得。

海仔出自傳統紅色家庭，屋企好多黑膠碟紅歌，借過畀我聽，好多歌我係咁學返嚟嘅。佢鍾意梁祝，每次聽親，佢都話連骨都軟埋。有一首兒歌，佢最鍾意，我哋兩個成日一齊唱。

少先隊隊歌 （睇網上歌詞同我記憶有出入，我寫我嘅記憶）

我們是共產主義接班人,

沿著革命先輩的光榮傳統

愛祖國，愛人民,

鮮豔的红領巾飄揚在前胸,

（2/. 少先隊員是我們驕傲的名稱）

不怕困難，不怕敵人，

頑強學習，天天向上，

為著理想，勇敢前進

為著理想，勇敢前進前進

為著理想，勇敢前進

我們是共產主義接班人。

有緣再見，一定同佢再次合唱。

我唯一一個送機去留學嘅，就係海仔，佢去加拿大讀書，喺機場影嘅一張相，重貼喺我相簿裏面。只收過一次信，我都唔記得有冇覆到信。男人老狗可能都係咁喇。隨信有一張相，佢著住格仔褸，企喺雪地上。

之後，再冇通訉。斷斷續續有啲消息，大約係話佢畢業返嚟，做緊電腦，而且做得唔錯㖭。呀，重有，以前玉樹臨風嘅潺仔華，已經大咗兩個碼，再見返，唔知認唔認得?

八十年代尾，住緊柴灣，星期日飲茶係習慣，例牌買明報、信報同埋明週。打開明週，有個專訪，主角就係海仔。記憶都係講啲電腦嘅嘢。重有佢個大頭相，係發咗福，輪廓都喺番度。有報紙做訪問喎，絕對係成功人士喇。講下講下，佢都就嚟登六囉喎。唔知退休未呢?

咦，賴子又係電腦人，你會唔會聯絡到海仔?揾埋大頭傑，我哋四個再去睇戲。如果佢兩條友仔，都親口話見到我個鵪鶉樣，雖然仍然難以置信，但係，基於我信相你哋唔會夾埋屈我呢個大前題，我會將呢件事記喺我歷史賬簿，黑豬仔嗰頁。告誡、提醒我，做人⋯⋯

千祈唔好鵪鶉。

再噏過，

嚤囉，

後記：賴子你話睇大軍閥，「主要還是許冠文」而對狄娜「印象不深」。真係好嘢。如果我在場，我絕對係睇狄娜。睇完，一定印象好深。喂，前面有頭光光嘅 Michael 同脫光光嘅 Tina。我呢個17歲，卜卜脆嘅ｏ靚仔，眼光光，重邊有得揀。
睇許冠文?返屋企睇雙星報喜咪得囉。