2011.07.30 有得揀，先至係老闆。有得噏，點會比人恰

2011.07.30

有得揀，先至係老闆。有得噏，點會比人恰。

柯拿，大家好，

七月份喺雪梨嘅嚴冬，Donna喺fb問，我鍾意邊個月份嘅澳洲。袋鼠國好大，東南西北中，都唔同天氣。例如東北部昆士蘭州，大部份係亞熱帶，又濕又熱，好似香港天氣。而我住嘅雪梨就喺紐修威州，屬於温帶，地中海型氣候。夏天睛空萬里，雲都冇嚿，而且非常乾燥，我試過相對濕度只得百份之五（5%）！因為夠乾，而且經常有涼風由東面海洋吹入，所以唔覺好熱，十分舒

服，我最鍾意就係雪梨嘅夏天。

我好開心可以住喺袋鼠國，唔單止因為天氣，更重要係社會氣氛比較和諧。你一定聽過鬼子佬話，對陌生人，有兩樣嘢盡量唔好講，就係宗教同政治。唔講政治，當然係避免冲突，維持友誼。但我經驗所得，最重要嘅係，袋鼠國民，多數根本唔關心政治！既然唔關心，咁又有乜好講呢。不如講吓欖球，講吓釣魚；講吓master chef啲煮嘢技巧，講吓Nicole Kidman啲八卦嘢好過啦！

喺大唐，國父孫大炮教導子民，「政治仍眾人之事」，咁梗係要關心啦！偉大領袖又教導，「階級鬥爭（都係政治啫）要年年講，月月講，天天講，只小數人講不行，要大多數人講，使全國人民都知道…」。咁緊要嘅嘢，點解你班袋鼠佬唔係點關心呢？

首先，實在，邊個黨做政府，分別都唔係好大。成個政府嘅組成，由全體袋鼠國民一人一票產生，你政府嘅所作所為，唔可以太離譜，任何偏離大多數國民意願嘅政府，必受懲罰，就係：下次冇人選你，即係：落台！所以，所有政府施政，必以人民嘅意願為依歸。人民（選民）就係佢老闆，每個黨派都要好小心閱讀民意。唔係到你好似林公公話「民意已經好清楚」，又或者譚主席同哨牙劉，開口埋口話「市民大眾都認為……咁咁咁」。因為每次大選就係一次公投，你政黨、政府噏乜都冇用，一公投，民意就出晒嚟啦，點到你亂噏！所以袋鼠佬，袋鼠婆之間，無需展開口水戰。費事抝，免傷和氣。選舉日，公投日，去投票站，就見真章喇！

話分兩頭，政府管理一個地區、一個國家，需要龐大專業團隊，多種技能人材，大量財力。國民要用一己之力去監察政府行為，談何容易。財力、人力、資訊……等能力都冇法同擁有公權力嘅執政政府匹敵。所以袋鼠國就有憲法去限制政府，避免佢哋濫用公權力。每次大選後，落敗嘅政黨就成為反對黨，有影子總理、影子財長，影子……等等，照樣支人工，照樣有自己全職嘅團隊，研究人員等等。功能就係處處捉執政黨政府痛腳，喺議會，公開質問執政黨，為全國人民把關。呢個反對黨叫自己做狗，看門狗watch dog。拉開一筆，喺袋鼠國叫人做dog，並唔一定表示侮辱。要侮辱，就叫人做豬。（＜例句＞look at his pig face，睇吓佢個衰樣）。

林公公要強推替死機制，揾咗好多外國例子護航。一陣又話德國點樣，一陣又話瑞典點樣。作為一介草民，要花費幾多時間，具備幾多專業知識，至可以分辨真偽？咁多管治問題，如果個個民眾都要花費咁多時間去暸解呢啲嘢，咁係花費幾大嘅社會成本！而且唔係個個人都對政治有興趣，一隻會吠嘅看門狗係幾咁重要。唔駛担心呢隻狗會偷懶，因為佢可以吠到個政府倒台，於是由看門狗變成執政黨。而下野嘅政黨就變成看門狗，昅實上咗場嘅政府。於是袋鼠國民就講rugby，講cricket，都唔得閒講politics！有看門狗睇實吖嘛！

都有講政治嘅時候，大選前講兩三個禮拜咁啦，大選過後，唔駛一個禮拜，就冇人再提喇！就算上次聯邦大選搞到懸空國會咁大件事，個多禮拜後，就冇人再提喇！大家繼續打波、開party重好過！

特區政府及執政聯盟經常舞弄民意，話多數市民點樣點樣。市民條氣唔順，就走上街，要政府數人數。你話廿幾萬，佢話五千。你話百萬人上街，佢話重有四百萬人冇上街喎！咁即係口同鼻抝，你有你講，佢有佢講。但係，個個都知道，一人一票公投就係最清楚表示民意嘅方法。佢偏唔用。好簡單，冇辦法量化民意，佢想點噏就點噏喇！喺袋鼠國，甚少就政治議題上街示威，因為冇咁嘅必要，有唔聽民意嘅政府，袋鼠國民會用選票教訓佢！

袋鼠國民毋須將「民主」、「自由」掛喺口邊，因為呢兩件嘢，係與生俱來，好似呼吸空氣咁自然。我哋唐人祖先，大清光緒時講維新、北洋政府時講德先生，民國時講憲政民主、偉大領袖1945喺窰洞內同黃炎培講民主，話通過民主，人民可以監察政府。二百年後，神洲大地民主狀況係點，你話比我聽嘞！

東方之珠，黃夢花，葉錫恩時代，市政局已有民選議員。回歸時又話08双普選，之後又話一二双普選。今日，連補選都冇埋。最慘者，而家居然有人話比你知，民主唔一定係最好，獨裁都ok喎！死未！你話向前走緊，抑或打倒褪？！

有人話，一人一票民主唔通可以解決晒所有問題咩？

我又要問番呢啲友，咁一檔酸蔗獨裁又可以咩？但係獨裁政府點衰法，佢嘅禍害係點，大家有眼睇，唔駛我多講喇。民主政體當然重有好多缺點，但，如果全民有眼無珠，揀錯咗，ok！總結經驗，下次揀過。美麗島就係好例子。之前，烏啄啄揀咗啊扁（話時話，佢貪嘅＄，唔知夠唔夠大唐一個縣長貪得多呢？after all，佢而家都受緊啦）。正因為美麗島島民可以一人一票選總统，而家唔likie扁扁，就改弦易轍，揀番藍色九仔做島主。不過九仔唔好太得戚，今屆，島民可能唔揀你，而鍾情綠色英英。民主就有咁嘅好處，正如梁家傑大狀話﹕有得揀，先至係老闆。

報紙、電視、電台、互聯網，日日講爭取民主，真係希望大唐子民，有一日可以安心咁講多啲玩樂、八卦嘢，唔駛猛講政冶呢啲咁無癮嘅嘢！幾時呢？

再噏過，

嚤囉

Ps. btw 二羅、啊蚊，維港兩岸氣氛如何？