2012.02.20 錄影機，驚見地中海；噏青絲，何日君再來

2012.02.20

錄影機，驚見地中海；噏青絲，何日君再來？

柯拿，大家好，

我喺商場開工，見嘅就係人。小國寡民，見嚟見去都係嗰班人。由鋪頭望出去，shoppers就喺你面前行過，一日…一周…一月…一年…五年…十年…十五年…十八年…。你睇住啲客，最初，健步如飛行過你面前，不久，步履開始穩重，然後再見佢揸住拐杖，再一日，佢已經坐係輪椅上。起初都有講有笑，一段時間後，就變得木口木面，望住佢空洞嘅眼神，面孔變得陌生，已經唔喺以前嘅佢。跟住，就再見唔到佢喺商場出現……。啊Jonh White，啊Mark Black，Eliz brown…，一個跟住一個……。

驚回首，呢隻白駒跑得快到令你不知所措。

我而家呢間鋪，係Allan Brown賣俾我。我同佢自1995年一齊喺鋪頭開工，到99年，因要搭帆船環遊世界，就離開鋪頭，正式退休。我大部份嘅技術啟蒙自佢，係我嘅恩師。佢而家重係住喺附近，不時都會嚟商場買lei買lo，雖然唔係好多偈傾，打個招呼，嗲兩句就梗有。前幾日見到佢，講起，知道佢有前列腺癌，而且已擴散去個肺，病情絕對唔係少嘢。好彩佢兩公婆非常樂觀，每日如常生活，有講有笑，每周仍然繼續打Golf。話時話，都八張喇，重求啲乜，開心過每一日為上。

1996年，Allan將鋪頭賣斷俾我，我哋握手，佢對我話，Its all yours。我問佢，What’s your feeling，佢話，It’s terrible！意思係估唔到已屆退休之年，一時好難接受年華老去嘅事實。呢一幕，我深深記住。

最近多咗客埋嚟講You’ve been here for a fair bit of time。一日，一個六呎高嘅後生仔（廿零歲啩），攞個job比我做。同我講，佢幾歲時，跟啊媽行商場，已見到我喺呢間鋪頭。而家，呢個細路已經係gentleman一個。即係話，你望出鋪頭外，見證人事變遷。人哋望入鋪頭，都睇住呢個cobbler（即係我），一日比一日成熟。

年紀漸大，身體外型嘅變化，亦係阻止不了嘅現實。肚腩大、肌肉鬆，可以用衫遮住。連縮水都可以墊高對鞋。但，有一樣嘢，係徹徹底底，亳無遮掩咁暴露於陽光底下。係乜...... ？冇錯，係……頭毛。

難忘記嗰一次飛髮。坐上飛髮櫈，飛髮佬鋪塊黑布喺我身上（香港用白布）。我對髮型一向都唔緊張，飛髮佬開剪之際，亦係我閉目養神之時。剪得幾剪，我悠然開眼，What！吓！唔係吓嘛。身上黑布，就載住黑黑白白嘅頭髮碎，隨住飛髮師傅利剪喺我頭上飛舞，黑黑白白嘅髮碎就喺我眼前飄落。白色髮碎喺黑布背景映襯下，更加觸目驚心。係我第一次發現白頭髮，點樣叫做心都實埋，個次真喺確確實實體會得到。我眼光光望住花白髮碎，如果唔係喺公共場所，可能真喺喊得出。直至今日，每次諗番起，個心都沉一沉。

為咗保安理由，我喺鋪頭裝咗攝錄機，鏡頭就鑲喺櫃頂，由高處向低，影住成間鋪頭。如果唔係有乜嘢特別事件發生，我好少翻睇錄影。有一次翻睇，因為角度原因，鏡頭就係由高向下影住我嘅背影，我見到出現喺畫面嘅我，後腦個「轉」嗰度，點解特別反光？睇真啲，原來頭毛密度减少。此後，每次翻睇，反光範圍一次比一次大。當然，睇得多，都麻木喇，不過第一次發現，實在都好震撼。

而家去飛髮，有時都會講老土笑話：

「喂，我冇乜幾條頭髮，收平啲好喎。」

「老友，啱啱相反，要收貴啲！」

「點解？」

「好難先至揾到頭髮嚟剪，時間唔駛錢呀？」

然後兩條友哈哈大笑。

有啲人會留長啲剩番嘅頭髮，一撥，撥去另一邊，冚實個反光頭壳，我認為十分肉酸。我嘅對策，係全部剪短晒，每次飛髮，剪剩幾個mm，照吓鏡，我覺得OK，第二個人點睇，我就理唔到喇。

人要識得自我肯定，我嘅醫學常識話俾我知，毛囊瓜咗，就甩毛，而頭頂毛囊嘅殺手就係testoterone，我咁man，冇計喇，take the good and take the bad 喇！

而家啲頭毛，生得慢，又生得幼。不過面嘅鬍鬚就生得快，以前面上冇鬚嘅地方，都生出鬚，而且又生得快，成日要剃，唔剃又會俾人鬧，好鬼煩！

唔止外表嘅變化，我做呢行，每日返工，除咗中午食飯外，由朝早企到收工，冇得坐，而家條大陣都係有啲問題。加上tradesman靠對手，乜嘢tennis elbow，carpal tunnel syndrome，trigger finger…乜都有齊。全身関節郁起嚟都「咔咔」聲。但，我唔會因此而收工，相反，有得行就行，有得玩就玩，玩將幾多得幾多。我唔信教，相信人生只得一世，要好好利用，瓜咗就乜都冇喇。

四月尾，會同井少一齊去尼泊爾行山（trekking），目標係行去額菲爾士峰…嘅base camp（5200m），最高會行到5600。唔知掂唔掂ga，不過唔試過你又點知。去馬啦！遊完尼國，5月尾會一齊返香港，到時飲茶。

再噏過，

嚤囉