2014.01.22
古惑噏維修，五日假期有得偷；北行開心地，黃金香蕉麥覺理。
柯拿，大家好，
東方呢粒明珠，我喺呢度，渡過咗三十幾個寒暑。有幸喺佢嘅光輝歲月，我廁身其中。當然經歷咗好多個好多個忘不了。其中一個忘不了，就係薪高糧準，工作他條。我喺工業學院只教體育，工作就係組織活動，每日返工就係同人玩。我成日講，有人出埋糧畀我去玩，咁著數嘅嘢都畀我遇到，都算係咁喇。
上體育堂，冇功課做，唔駛改簿。就算考試（體能及技巧測驗），都冇話之後要改卷，更加唔會話肥佬啩。一個冇壓力嘅學科，我同學生嘅關係經常保持良好，每日都開開心心咁去上堂。月尾銀行自動打簿，開開心心咁 fing 晒佢。下個月，啲錢係會繼續嚟，幾時擔心過生活。
最過癮係五天工作周，每周上堂21個鐘。話晒都係體育組阿頭，都有啲計劃、發展嘅文件工作要做，但始終都係手板眼見工夫，做慣咗，年年如是，工作毫無壓力。
星期六、日，例牌休息。聖誕新年，清明重陽，事頭婆生日⋯，乜假都放，仲未計打風落雨、山泥傾瀉。每學年只有約35周上堂，即係話一年365日，真正工作日，一定少於150日。你話，我幾嘆。
個世界都好公道，咁樣嘆咗十幾年。之前放突咗嘅假，而家就要補返，冇得走數。而家鋪頭喺商場，簽咗賣身契，規定開鋪時間，即所謂 Core Trading Hours，就係每周七日。每年只有聖誕兩曰，新年一日，澳紐軍團紀念日半日，及復活節兩日。呢五日半，法例上，大商場唔准開工。其他日子，話之你有冇生意，話之你傷風感冒扭襯腳，總之就要打開門。所以話，做鋪頭，真係好困身。
Touch wood，托頼上倉眷顧。經常都揾到人，幫我開星期日。當我去長途旅行時，又有人幫手睇住鋪頭，太感激喇。
我呢行，節後係淡季。啱啱過咗嘅聖誕，我利用呢兩日假，再出古惑，呃多三日。總共有五日假期，咁就夠時間畀我試下玩啲新嘢。
聖誕前夕，五點半收鋪，我寫咗張告示貼喺捲閘上：「 機器維修，星期一啓市」。我都冇講大話吖，唔開機器，即係畀機器唞唞，亦算係維修嘅一個方法。嘿，語言藝術？我有大把。不過，唔知商場受唔受？會唔會詐我型？唔理咯，返嚟至算。
雪梨以北，沿海岸一直去到昆士蘭邊界，統稱北海岸 North Coast ，沿海岸就係數之不盡嘅海灘。遇到河嘅出口，就變為城鎮，全部都係渡假嘅好地方。尤其暑假，好多袋鼠家庭都鐘意嚟海灘區 hea 佢三五七日。
五日有乜好做？我嘅計劃係揸車北上，停四個城鎮。都係四圍行下，見乜玩乜咁喇。
過夜又點搞呢？本來計劃喺 Caravan Park 租露營地方。原來假期，一早全院滿座。而且都都唔租一晩，起碼三五七日至有交易。即刻改變計劃，改租青年旅舍協會 YHA 嘅背囊友旅舍，一共四間，每日去一間。都係四人、六人嘅牀位 dormitory 。瞓覺啫，有乜所謂。況且我都未試過住 Dom.，開下齋，又何妨。
早一晩，已經執好晒要用嘅嘢。玩嘅、食嘅、著嘅、瞓嘅，都帶齊，仲帶埋單車。橫掂都係揸車啫，帶多好過帶少。
聖誕日，晨咁早，揸咗架車出車房，最後檢查行李，裝好導航系統，就向第一站 Coffs Harbour 出發，今日行車路程520公里，預算六粒鐘到步。
點解要咁早起程？聖誕節之於袋鼠佬，就好似唐人嘅年三十晚，家庭為重，個個都要現身食團年飯，邊度都唔准去。聖誕晚餐，個個飲飽食醉，多數都瞓到黃朝白晏至肯起身。不過，又多數都要喺呢日出發去玩。我早過佢哋起身，就避開繁忙嘅交通。
一如所料，駛入M1太平洋公路 Pacific Motorway，非常暢順。雖然天色灰暗，間中仲有小雨，但仍然揸得好舒服。楂咗冇遠，三線縮成一線。離遠就睇到警車嘅藍白閃燈，又有救傷車。原來，有車剷咗落路中間分隔草地。小意外，不過，佢哋就邊度都唔駛去喇。我當然會小心楂車喇。
超速，永遠係交通意外嘅罪魁禍首。政府為咗警惕駕駛者要揸慢啲，過時過節，違例扣分就會雙倍 double demerit 。我避免愈踩愈快，即刻開著巡航系統，咁就唔會超速嘞。
疲勞駕駛亦容易導至意外，因此，毎隔不遠，路邊就有休息站。公路經常見到：「Stop, Revive, Survive 」等嘅告示，提醒司機每兩小時，就要休息一次。更有啲團體，提供免費咖啡、餅乾，吸引長途旅客稍事休息。如是者，我行下停下，六粒鐘光景，就到達第一站，Coffs Harbour YHA。一啲都唔攰，感覺良好。
旅舍職員，聖誕正日都全日開工，都算唔話得喇。快快登記，職員畀咗一張牀單，一張被單，一個枕頭套。自己上房，揾咗牀位，搞掂啲牀上用品。記住第二朝，將牀上用品交還，至走得人。
聖誕日，乜嘢鋪頭都收晒，Coffs Harbour，成個鎮，冷冷清清。我揸車去 the Big Banana。大香蕉其實係一個香蕉種植園，順便搞埋旅遊生意，有小火車參觀蕉園，導遊講解香蕉種植。兒童遊樂設施、餐廳、禮品店就一定有。門口嗰隻大香蕉招牌，更加成為 Coffs Harbour 嘅象徵。鄉下小鎮，喺咁上下喇。我同隻大香蕉影張相，就跳上車走人。
揸車兜下個鎮就駛去海灘，泊好車，換咗單車，沿海邊小路踩。人又少，車又少，好舒服。踩上伸出海嘅長堤，遊人喺長堤上漫步，悠悠閒，他他條。長堤盡處，係釣魚嘅好地方。一眾漁翁揮舞長捍，同魚仔嚟個生死角力。陽光、海風、浪濤聲，哈，真係好有渡假 feel 喎。
長堤邊有廿多個少男少女，小子們都赤膊，只著住滑板褲 board shorts，有啲就頭戴吊住白波仔嘅紅色聖誕帽。原來聖誕日約埋一齊嚟跳海，個個獨創跳水方式，前跳、背跳、起飛腳，⋯⋯。總之要同人唔同。少年的我，唔係一樣咩，成班友，喺沙灘摔角、打斛斗、又一齊瞓喺馬路中間影相。⋯⋯。古靈精怪，乜都試下，咁至係年青過。
條街靜應應，係咁意踩多個圈，就返上車。本來諗住返旅舍煮公仔麪，途中居然見到有餐館開檔，一間唐餐、一間印度餐。辣嘢唔係好啱我，坐咗入去唐餐館。袋鼠國，埠仔唐餐館，多數樓面都係鬼妹仔，食唐餐，一樣要講鬼話。一睇餐牌就後悔。做乜咁鬼貴。唔好意思走頭，就叫咗碟酸甜骨加碗飯，連茶都冇要。一個茶包要收三蚊，我飲自己啲水算數。埋單承惠25蚊有找幾粒臣。碗飯係凍嘅，個餐？唉，休提！早知過隔籬揾阿差好過。
今日成日騰嚟騰去，冲個涼就瞓。間房住四個人，室友陸續嚟，冇乜交流，講聲 Hi，各有各打鼻鼾。哈，發出嘅分貝，唔知邊個勁啲呢。
第二日一早，交還鎖匙、牀單等。去廚房煮個出前一丁做早餐，再裝好足夠滾水，就出發去第二站 Coolangatta ，行車里數約 320公里。
仍然跟住一號太平洋公路。一號公路，其實就係兜住成個澳洲海岸嘅公路，條路喺唔同地方，有唔同名稱，但都叫做一號，又因應道路環境變成 1，M1，A1，B1。全程一個圈，14，500 公里。
傳統袋鼠佬有個願望，喺兩腳伸直之前，一定要兜住澳洲遊一個匝。所以就要儲備一筆錢，用作租（或買）蓬車 Caravan、露營車 Camper van等等使費。日間行車，晚間住 Caravan Park。萬幾公里，咁長路程，慳得就慳，車上有煮食設備，唔駛食餐館，咁就慳唔少。遊罷歸來，又未死得，錢又 fing 晒。點算？冇有怕！呢度係澳洲，餘生就食政府，同佢鬥長命。袋鼠佬交咗一世重稅，都冇乜太大怨言，就因為，呢度個個都知道。生養死葬病咗有得醫，係每個公民嘅權利。
交咗稅，用番喺人民身上，咁都交得順氣吖。邊得似東方萬稅強國，國家領導、高幹，苛捐雜稅，搜盡民脂民膏，公款變私款，老婆仔女喺外國，住別墅揸靚車。草民百姓交重稅後，奢想有保障，教育？醫療？矜寡孤獨廢疾？⋯⋯？好難咯，因為你哋啲血汗錢，已經變咗佢乖乖嗰架法拉里、又或者佢第九十九號情婦嗰粒鑽介。
忍唔住又講多咗，講返我。
行行下，見到路邊有免費咖啡休息站，即刻駛入去。哦，呢個區叫做「新意大利」，仲有小博物館、展覽廳、小賣部等設施。原來百幾年前 1880年，有50個意大利家庭移民呢度，自此開枝散葉⋯⋯。一路飲免費咖啡，仲有雕塑睇，呢個休息站，算係咁喇。
有咗導航系統，旅行都方便咗好多。記得舊時擺到成車都係地圖，又要停埋一邊確定位置。如果係兩公婆，一個揸車，一個睇地圖，咁樣嘅組合，多數鬧交收場，搞到旅行都唔開心。而家好嘞，就算行錯路，兩公婆一齊鬧個導航，夫妻感情都好啲，真係偉大嘅發明。
呢三百幾公里，用咗四粒鐘，午後就到旅舍。
Coolangatta ，係兩省交界城市，部份已經入咗昆士蘭，屬於黃金海岸範圍，有自己嘅機場。奇怪嘅係，連個機場都係兩省交界，跑道南面半截，屬於紐省、北半截屬於昆省，真係唔知點管。我住嘅旅舍就對住機場，行路十分鐘就到。Coolangatta 距離黃金海岸，世界著名嘅海灘滑浪天堂 The Surfers Paradise ，只係約20公里。好多人飛嚟黄金海岸玩，會住喺Coolangatta 呢度，再搭巴士或者租車四圍去。
登記入住後，即刻踩單車向海灘區出發。到處都係單車徑，用單車四圍去，真係方便。拆禮物日，遊客明顯多咗，沙灘上，海邊休憩區都係一家大細，家庭樂嘅好地方。我架單車就喺細路仔嘅滑板、海邊漫行嘅人群中緩緩穿過。沐浴和煦日光，享受溫柔海風，浸潤祥和空氣。啊，學李超人話事偈：心曠神怡，嘅哩。
逢親交界地方，當局一定會喺正交界處豎個碑，作為地界又好，畀遊客影相又好。Coolangatta 都冇例外。由正灘向南行不遠，就係 Point Danger，佢係一個岬角 Headland，山仔上就造咗一個好高嘅碑，正正座落喺兩省分界之上。喺分界線上影相，係指定動作喇。
踩入市區。仍然係假期，好多鋪頭仍然休息，間中有啲快餐店開檔，都係冇乜好食。再穿梭多一陣，返旅舍，自己煮自己食算數。
用旅舍廚房非常方便，煮食器具，碗碟刀叉，乜都齊晒。個個好有手尾，都會自動自覺，用完洗乾淨，擺番好。如果有乜嘢用唔晒、食唔晒，又唔想帶走，例如未開嘅罐頭、未煮嘅粉麪，總之乾淨，又唔核突嘅。廚房有一個位置，可以畀人放低啲咁嘅嘢，歡迎其他住客取用。既環保，又慳錢，真係好主意。旅舍冇雪櫃，不過有個雪房仔。要雪嘅嘢，例如生肉、啤酒汽水等都可以擺入去，不過記得包好，並且寫名。費事有人唔知真黐抑或扮儍，食咗你塊扒，飲咗你支香檳，咁就唔好喇。不過，我信得過，多數都係老實人嚟嘅。
今日晚餐，spam 午餐肉，一丁麪，再加兩個橙。食得好開心。
同房居然有兩個香港嚟嘅𡃁仔，廿歳左右啩，佢哋好夜至返，我就一早走人。冇乜交流。
成間旅舍都未起身，我就已經交晒鎖匙、被單等，預備走人。吖，硬係覺得啲時間怪怪哋。原來至醒起，昆士蘭冇夏令時間 daylight savings，所以比我哋紐省慢咗一個鐘。唔怪得仲未有人起身喇。
揸車沿黃金海岸公路 Gold Coast Highway 北上，只 20 公里，半粒鐘就到。仲以為聖誕假，一定好難洎車，車到滑浪天堂海灘，居然揾到海灘路邊車位。又因為略略遠離中心位置，泊車仲免費𠻹，真好彩。戴好頭盔、裝好單車，踩車去也。沙灘邊單車徑，係行人單車共用。而且講明，行人優先。呢種環境，盡量唔好響鐘，咁樣好冇禮貌。想快嘅，就踩出馬路。我係嚟 hea 嘅，詩云：優哉游哉，亦是戾矣。駛乜急，慢慢嘆也。
踩到海灘中心區，睇個樣，遊客唔多。沙灘上，都頗為冷清。唉，你話死唔死，大時大節，又係夏季，個巿咁嘅款，做遊客生意嘅，就喊得一句句咯。
嚟得海灘，梗係要游水。收埋單車，換上防矖 rash suit、board shorts，執起 衝浪臥板 bodyboard 奔向海灘。澳洲游水，向住大洋嘅海灘都好大浪，唔熟水性嘅，千祈咪試。咁大個海灘，邊度睇得晒。為安全計，救生員會喺長長嘅沙灘上，一個較細嘅區域內，左右每邊豎起紅黃旗。袋鼠仔細細個就知道，游水，衝浪，就一定要喺兩支旗中間嘅海域，口號就係 swim between the flags。冇旗嘅話，就即係冇救生員。如果咁都落水，又唔會有人去阻止佢嘅，佢一係就好叻，否則⋯⋯各安天命係喇。
話雖如此，沿住海岸線，度度都會見到滑浪者，佢哋懶得睇你支紅黃旗，邊度有浪，佢哋就會出現。普遍社會亦唔會特別歧視佢哋，一個成熟嘅社會，唔係 Nanny State，唔會乜都管，要尊重個人選擇。總之，自己嘅安危，自己苦樂，就由自己一力承擔。經常見到海邊岩石上有石碑，刻上被大海吞噬咗嘅年青滑浪者嘅故事。字裏行間，並唔係充滿悲怨，反而慶幸 celebrate 佢快樂短短暫嘅一生，而且感恩，逝者可以喺佢嘅至愛樂園歸天。我好鍾意佢哋對生命嘅態度。
Bodyboarding 實在好好玩，走出海中間，背住沙灘，睇住啲浪一個一個湧埋嚟。見到個浪夠大嘅話，就趴上浪頂，如果一切順利，個浪就會一直帶你去到沙灘。非常有速度感，十分過癮。但係我水皮，真係咁順利嘅浪，成朝都冇十個。多數都係兩三下就冇咗，又要行返出海中，如是者逆住浪走嚟走去，都需要好多體力。今日都幾大浪，都玩咗幾個靚浪，算係咁嘞。雖然唔係好夠喉，要趕下一場，都係上岸冲身走人。
黃金海岸有著名嘅四大主題公園：華納片場、水上樂園、海洋公園、夢幻世界遊樂場。加埋海灘及其他活動，呢度玩十日八日，絶對冇問題。我而家係遊車河，邊度都唔去，即刻起程去今次行程嘅最北端，布里斯本。
唔駛兩粒鐘，行咗90公里，就到昆士蘭首府城市，布里斯本。果然係一省首府，背囊友旅舍都有冷氣，今晩舒服咯。
旅舍就喺城中布里斯本河邊，去邊度都好方便。一出旅舍，就係街道，買乜嘢都好方便，連火車站都係步行範圍，絶對係背囊友嘅恩物。我踩住單車，先過河嘅南岸。又係到處單車路，真係好方便。市中心布里斯本河南岸，又係叫做 The South Bank，又係有一個大摩天輪。真係懷疑，佢係老翻倫敦嘅 South Bank 同埋 London eye。
南岸公園 South Bank Parklands 真係好多人，我踩住單車，緩緩喺人群中穿梭，咁樣行街，真係好舒服。公園呢度，絶對係遊客區，飮嘅食嘅，到處都有唔在講。呢度居然有個好大嘅嬉水區，設計到好似天然海邊一樣，仲有真沙嘅沙灘。大熱天時，個個玩到唔知幾開心。環視附近每一個人都掛住笑臉，歡樂嘅氣氛，果然無敵。
我食咗個簡單泰國餐，之後，就沿住河兩岸嘅單車徑，踩咗一個好大嘅圈，踩到夠皮就返番南岸。公園後街有條士丹利街 Stanley Street Plaza，附近兩條街都係新建嘅四、五層高住宅，樓下地鋪，全部都係食肆。我踩住車慢慢兜咗一個圈，哈，果然真係乜餐都有。睇下鐘，就嚟六點，係時候揾間嘢，舒舒服服坐低，食個好啲嘅晚餐。食乜好？有越南妹出嚟兜生意。好，就越南餐喇。平時食餐，因為要揸車，唔飲得酒。今日踩單車，就可以要支啤酒。個餐唔錯喇，招呼又好，都幾滿意。又有前菜，又有啤酒，四十蚊有找，算係咁喇。
呢度冇夏令時間，太陽好遲至至落山。食完飯，踩單車去河邊坐一陣。夕陽斜照，攞出 ipad，同愛人 Skype 談下情話，係好浪漫喎。踩上橋上，就喺布里斯本河上空，睇住夕陽西下。係時候返歸喇。
好幸福，瞓一個有冷氣嘅覺。
又係我第一個起身，費事嘈親人，放輕手腳，執拾細軟離開房間。廚房同就餐嘅地方喺頂樓。照舊，又係一丁麪加 Spam午餐肉。旅舍喺河邊小山崗上，喺天台一邊食早餐，一邊俯瞰仲未瞓醒嘅布里斯本。跟住仲要行好多路，一早出發。
調轉頭向南行，今日嘅目的地係 Port Macquarie ，車程約 570 公里，係呢個行程最長嘅路程。入滿油，即刻走上高速公路。回程，都係行番舊路啫，又有導航，路邊指示又清楚，只要小心駕駛，唔好超速，咁樣揸車，唔算難事。當初以為一個人揸車，好易攰，好易瞌眼瞓。原來多啲利用休息站稍事休息，伸伸腳，方個便，又真係唔太攰。
唔駛七粒鐘，到達旅舍。照例又係先登記入房，再攞啲當地資料。先揸車四圍逛，再車上高點視察環境。泊好車，換上單車，踩入人群之中。Port Macquarie ，都算係一個有歷史嘅大城鎮。1881年，以當時嘅 紐修威 New South Wales 將軍總督 Lachlan Macquarie 命名。
麥覺理係澳洲殖民時期嘅總督，佢對紐修威有好大貢獻，所以好多嘢都以佢命名。佢有乜貢獻？我唔講嘞，自己谷歌一下喇。不過想講一個故事：傳說麥覺理夫人，即係佢老婆，跟住老公嚟到呢個蠻荒之地，非常思鄉。總督府附近向海有一磈沙岩，夫人命人將佢鑿成一張石櫈。夫人一有時間，就走出嚟，坐喺石櫈上，向海望住英倫方向，聊解鄉愁。久而久之，呢個寶座仲起咗個朶，就叫做 Lady Macquarie's Chair。今日就成為雪梨旅遊熱點，就喺雪梨植物公園一個半島嘅尖啄。
踩單車穿過海灘，向海就係一條長長嘅防波堤 the Breakwall，防波堤用咗好多好多，好大嚿，唔同形狀嘅大石堆砌而成。市議會鼓勵塗鴉者喺石頭上一展所長。久而久之，幾乎每嚿石頭都畫上塗鴉。有卡通人物、有遊客留畫、有向愛侶表示心跡嘅、亦有對逝去者表示思念。因此，呢度亦成為麥覺理港嘅地標。
我沿海邊單車徑兜咗一個大圈，踩夠皮，再揸車去另一個山頭，睇下建於1879年維多利亞女皇時期嘅燈塔。係咁行兩行，咁又一日喇。返出市中心揾地方食晚飯。行咗入間泰國餐館，要咗個綠咖哩豬肉。個汁整得好啱食，居然食咗兩碟飯，仲要食到照鏡𠻹，呢餐好滿意。
飽餐一頓，返番旅舍。呢間嘢果然好生意，入夜後，連圖書閱讀室、遊樂室，地下都擺滿牀褥，瞓滿人。好彩我預早些少訂房，否則就要做廳長。不過，一日半日，又有乜所謂。
之之坐坐，又到瞓覺時間。今晚好特別，呢間六人房係 mixed 嘅，即係有男有女。原來呢間YHA 嘅 dormitory ，分成兩類：一係，女仔房；一係，混合房。我冇得揀，今次房內有兩男四女。大家各有各瞓，又真係冇乜嘢嘅。但係畀我發現一樣嘢，原來女仔瞓覺，又真係安靜好多。我住過男嘅 dorm. 大家一齊行雷打鼻鼾，彼此彼此啫，夢中高聲呼嘯，我好自在。今晩，未瞓著時，我仲控制得到聲響，但當睡公主同我遠遊時，肉體嘅呼吸聲有幾勁， sorly 嘞，我控制唔到。各位小姐，有因我而成晚心如鹿撞（煩到頂心頂肺），輾轉反側，未能安枕者，只好⋯⋯謹此致歉，囉。
費事第二朝面左左，晨咁早起身，執好晒嘢。等到六點廚房開門，煮早餐、沖滾水，不在話下。
離開旅舍。朝早去 Wright's Creek 行下紅樹林，嗰度係一個內陸海水倒灌嘅沼澤，介紹話可以睇到好多動物。其實，你一行入去，好多動物都即刻柄埋，點會有興趣畀你參觀。不過就真係見到好多飛狐 flying fox，就係蝙蝠。離遠已經聞到味，抬頭一睇，每一棵樹都掛住數之不盡嘅飛狐，我顎高頭望佢哋，原來佢哋倒吊住，亦係一路顎高頭睥住我。我即刻快步走人，唔係怕咗佢哋啲鼠目寸光，而係驚佢哋忍唔住，嚟個大大小小嘅方便，咁我咪中晒頭獎。
拉開講一筆。過年之後冇耐，新聞報導，澳洲北部熱浪，有大量蝙蝠死亡，稱為蝙蝠雨。聽綱上電台，香港有人唔明白，點解會發生啲咁嘅事。原因係，佢哋以為蝙蝠一定住喺山洞，山洞陰涼，日頭唔出嚟就冇事。但係佢哋唔醒起，好多蝙蝠係住喺樹上。嗰幾日，太陽太勁揪，大地就好似個焗爐，咁即係掛爐烤飛狐，佢哋熱到飛唔起，咁就跌晒落地，變成蝙蝠雨喇。
別過紅樹林飛狐，呢個五日遊車河之旅亦告圓滿結束。跳番上車，小心駕駛，回家去也。
返到屋企，睇下咪標。1987 公里。哈，係唔係應該好似羅賓話齋：再喺邊度兜多個圈，湊夠二千呢。anyway ，呢個係我個人嘅新紀錄。
再噏過。
嚤囉
睇相可上面書
https://www.facebook.com/media/set/?set=a.569156286495129.1073741888.100002022875470&type=1&l=044c20c5fd
黃金海岸衝浪
東方呢粒明珠，我喺呢度，渡過咗三十幾個寒暑。有幸喺佢嘅光輝歲月，我廁身其中。當然經歷咗好多個好多個忘不了。其中一個忘不了，就係薪高糧準，工作他條。我喺工業學院只教體育，工作就係組織活動，每日返工就係同人玩。我成日講，有人出埋糧畀我去玩，咁著數嘅嘢都畀我遇到，都算係咁喇。
上體育堂，冇功課做，唔駛改簿。就算考試（體能及技巧測驗），都冇話之後要改卷，更加唔會話肥佬啩。一個冇壓力嘅學科，我同學生嘅關係經常保持良好，每日都開開心心咁去上堂。月尾銀行自動打簿，開開心心咁 fing 晒佢。下個月，啲錢係會繼續嚟，幾時擔心過生活。
最過癮係五天工作周，每周上堂21個鐘。話晒都係體育組阿頭，都有啲計劃、發展嘅文件工作要做，但始終都係手板眼見工夫，做慣咗，年年如是，工作毫無壓力。
星期六、日，例牌休息。聖誕新年，清明重陽，事頭婆生日⋯，乜假都放，仲未計打風落雨、山泥傾瀉。每學年只有約35周上堂，即係話一年365日，真正工作日，一定少於150日。你話，我幾嘆。
個世界都好公道，咁樣嘆咗十幾年。之前放突咗嘅假，而家就要補返，冇得走數。而家鋪頭喺商場，簽咗賣身契，規定開鋪時間，即所謂 Core Trading Hours，就係每周七日。每年只有聖誕兩曰，新年一日，澳紐軍團紀念日半日，及復活節兩日。呢五日半，法例上，大商場唔准開工。其他日子，話之你有冇生意，話之你傷風感冒扭襯腳，總之就要打開門。所以話，做鋪頭，真係好困身。
Touch wood，托頼上倉眷顧。經常都揾到人，幫我開星期日。當我去長途旅行時，又有人幫手睇住鋪頭，太感激喇。
我呢行，節後係淡季。啱啱過咗嘅聖誕，我利用呢兩日假，再出古惑，呃多三日。總共有五日假期，咁就夠時間畀我試下玩啲新嘢。
聖誕前夕，五點半收鋪，我寫咗張告示貼喺捲閘上：「 機器維修，星期一啓市」。我都冇講大話吖，唔開機器，即係畀機器唞唞，亦算係維修嘅一個方法。嘿，語言藝術？我有大把。不過，唔知商場受唔受？會唔會詐我型？唔理咯，返嚟至算。
雪梨以北，沿海岸一直去到昆士蘭邊界，統稱北海岸 North Coast ，沿海岸就係數之不盡嘅海灘。遇到河嘅出口，就變為城鎮，全部都係渡假嘅好地方。尤其暑假，好多袋鼠家庭都鐘意嚟海灘區 hea 佢三五七日。
五日有乜好做？我嘅計劃係揸車北上，停四個城鎮。都係四圍行下，見乜玩乜咁喇。
過夜又點搞呢？本來計劃喺 Caravan Park 租露營地方。原來假期，一早全院滿座。而且都都唔租一晩，起碼三五七日至有交易。即刻改變計劃，改租青年旅舍協會 YHA 嘅背囊友旅舍，一共四間，每日去一間。都係四人、六人嘅牀位 dormitory 。瞓覺啫，有乜所謂。況且我都未試過住 Dom.，開下齋，又何妨。
早一晩，已經執好晒要用嘅嘢。玩嘅、食嘅、著嘅、瞓嘅，都帶齊，仲帶埋單車。橫掂都係揸車啫，帶多好過帶少。
聖誕日，晨咁早，揸咗架車出車房，最後檢查行李，裝好導航系統，就向第一站 Coffs Harbour 出發，今日行車路程520公里，預算六粒鐘到步。
點解要咁早起程？聖誕節之於袋鼠佬，就好似唐人嘅年三十晚，家庭為重，個個都要現身食團年飯，邊度都唔准去。聖誕晚餐，個個飲飽食醉，多數都瞓到黃朝白晏至肯起身。不過，又多數都要喺呢日出發去玩。我早過佢哋起身，就避開繁忙嘅交通。
一如所料，駛入M1太平洋公路 Pacific Motorway，非常暢順。雖然天色灰暗，間中仲有小雨，但仍然揸得好舒服。楂咗冇遠，三線縮成一線。離遠就睇到警車嘅藍白閃燈，又有救傷車。原來，有車剷咗落路中間分隔草地。小意外，不過，佢哋就邊度都唔駛去喇。我當然會小心楂車喇。
超速，永遠係交通意外嘅罪魁禍首。政府為咗警惕駕駛者要揸慢啲，過時過節，違例扣分就會雙倍 double demerit 。我避免愈踩愈快，即刻開著巡航系統，咁就唔會超速嘞。
疲勞駕駛亦容易導至意外，因此，毎隔不遠，路邊就有休息站。公路經常見到：「Stop, Revive, Survive 」等嘅告示，提醒司機每兩小時，就要休息一次。更有啲團體，提供免費咖啡、餅乾，吸引長途旅客稍事休息。如是者，我行下停下，六粒鐘光景，就到達第一站，Coffs Harbour YHA。一啲都唔攰，感覺良好。
旅舍職員，聖誕正日都全日開工，都算唔話得喇。快快登記，職員畀咗一張牀單，一張被單，一個枕頭套。自己上房，揾咗牀位，搞掂啲牀上用品。記住第二朝，將牀上用品交還，至走得人。
聖誕日，乜嘢鋪頭都收晒，Coffs Harbour，成個鎮，冷冷清清。我揸車去 the Big Banana。大香蕉其實係一個香蕉種植園，順便搞埋旅遊生意，有小火車參觀蕉園，導遊講解香蕉種植。兒童遊樂設施、餐廳、禮品店就一定有。門口嗰隻大香蕉招牌，更加成為 Coffs Harbour 嘅象徵。鄉下小鎮，喺咁上下喇。我同隻大香蕉影張相，就跳上車走人。
揸車兜下個鎮就駛去海灘，泊好車，換咗單車，沿海邊小路踩。人又少，車又少，好舒服。踩上伸出海嘅長堤，遊人喺長堤上漫步，悠悠閒，他他條。長堤盡處，係釣魚嘅好地方。一眾漁翁揮舞長捍，同魚仔嚟個生死角力。陽光、海風、浪濤聲，哈，真係好有渡假 feel 喎。
長堤邊有廿多個少男少女，小子們都赤膊，只著住滑板褲 board shorts，有啲就頭戴吊住白波仔嘅紅色聖誕帽。原來聖誕日約埋一齊嚟跳海，個個獨創跳水方式，前跳、背跳、起飛腳，⋯⋯。總之要同人唔同。少年的我，唔係一樣咩，成班友，喺沙灘摔角、打斛斗、又一齊瞓喺馬路中間影相。⋯⋯。古靈精怪，乜都試下，咁至係年青過。
條街靜應應，係咁意踩多個圈，就返上車。本來諗住返旅舍煮公仔麪，途中居然見到有餐館開檔，一間唐餐、一間印度餐。辣嘢唔係好啱我，坐咗入去唐餐館。袋鼠國，埠仔唐餐館，多數樓面都係鬼妹仔，食唐餐，一樣要講鬼話。一睇餐牌就後悔。做乜咁鬼貴。唔好意思走頭，就叫咗碟酸甜骨加碗飯，連茶都冇要。一個茶包要收三蚊，我飲自己啲水算數。埋單承惠25蚊有找幾粒臣。碗飯係凍嘅，個餐？唉，休提！早知過隔籬揾阿差好過。
今日成日騰嚟騰去，冲個涼就瞓。間房住四個人，室友陸續嚟，冇乜交流，講聲 Hi，各有各打鼻鼾。哈，發出嘅分貝，唔知邊個勁啲呢。
第二日一早，交還鎖匙、牀單等。去廚房煮個出前一丁做早餐，再裝好足夠滾水，就出發去第二站 Coolangatta ，行車里數約 320公里。
仍然跟住一號太平洋公路。一號公路，其實就係兜住成個澳洲海岸嘅公路，條路喺唔同地方，有唔同名稱，但都叫做一號，又因應道路環境變成 1，M1，A1，B1。全程一個圈，14，500 公里。
傳統袋鼠佬有個願望，喺兩腳伸直之前，一定要兜住澳洲遊一個匝。所以就要儲備一筆錢，用作租（或買）蓬車 Caravan、露營車 Camper van等等使費。日間行車，晚間住 Caravan Park。萬幾公里，咁長路程，慳得就慳，車上有煮食設備，唔駛食餐館，咁就慳唔少。遊罷歸來，又未死得，錢又 fing 晒。點算？冇有怕！呢度係澳洲，餘生就食政府，同佢鬥長命。袋鼠佬交咗一世重稅，都冇乜太大怨言，就因為，呢度個個都知道。生養死葬病咗有得醫，係每個公民嘅權利。
交咗稅，用番喺人民身上，咁都交得順氣吖。邊得似東方萬稅強國，國家領導、高幹，苛捐雜稅，搜盡民脂民膏，公款變私款，老婆仔女喺外國，住別墅揸靚車。草民百姓交重稅後，奢想有保障，教育？醫療？矜寡孤獨廢疾？⋯⋯？好難咯，因為你哋啲血汗錢，已經變咗佢乖乖嗰架法拉里、又或者佢第九十九號情婦嗰粒鑽介。
忍唔住又講多咗，講返我。
行行下，見到路邊有免費咖啡休息站，即刻駛入去。哦，呢個區叫做「新意大利」，仲有小博物館、展覽廳、小賣部等設施。原來百幾年前 1880年，有50個意大利家庭移民呢度，自此開枝散葉⋯⋯。一路飲免費咖啡，仲有雕塑睇，呢個休息站，算係咁喇。
有咗導航系統，旅行都方便咗好多。記得舊時擺到成車都係地圖，又要停埋一邊確定位置。如果係兩公婆，一個揸車，一個睇地圖，咁樣嘅組合，多數鬧交收場，搞到旅行都唔開心。而家好嘞，就算行錯路，兩公婆一齊鬧個導航，夫妻感情都好啲，真係偉大嘅發明。
呢三百幾公里，用咗四粒鐘，午後就到旅舍。
Coolangatta ，係兩省交界城市，部份已經入咗昆士蘭，屬於黃金海岸範圍，有自己嘅機場。奇怪嘅係，連個機場都係兩省交界，跑道南面半截，屬於紐省、北半截屬於昆省，真係唔知點管。我住嘅旅舍就對住機場，行路十分鐘就到。Coolangatta 距離黃金海岸，世界著名嘅海灘滑浪天堂 The Surfers Paradise ，只係約20公里。好多人飛嚟黄金海岸玩，會住喺Coolangatta 呢度，再搭巴士或者租車四圍去。
登記入住後，即刻踩單車向海灘區出發。到處都係單車徑，用單車四圍去，真係方便。拆禮物日，遊客明顯多咗，沙灘上，海邊休憩區都係一家大細，家庭樂嘅好地方。我架單車就喺細路仔嘅滑板、海邊漫行嘅人群中緩緩穿過。沐浴和煦日光，享受溫柔海風，浸潤祥和空氣。啊，學李超人話事偈：心曠神怡，嘅哩。
逢親交界地方，當局一定會喺正交界處豎個碑，作為地界又好，畀遊客影相又好。Coolangatta 都冇例外。由正灘向南行不遠，就係 Point Danger，佢係一個岬角 Headland，山仔上就造咗一個好高嘅碑，正正座落喺兩省分界之上。喺分界線上影相，係指定動作喇。
踩入市區。仍然係假期，好多鋪頭仍然休息，間中有啲快餐店開檔，都係冇乜好食。再穿梭多一陣，返旅舍，自己煮自己食算數。
用旅舍廚房非常方便，煮食器具，碗碟刀叉，乜都齊晒。個個好有手尾，都會自動自覺，用完洗乾淨，擺番好。如果有乜嘢用唔晒、食唔晒，又唔想帶走，例如未開嘅罐頭、未煮嘅粉麪，總之乾淨，又唔核突嘅。廚房有一個位置，可以畀人放低啲咁嘅嘢，歡迎其他住客取用。既環保，又慳錢，真係好主意。旅舍冇雪櫃，不過有個雪房仔。要雪嘅嘢，例如生肉、啤酒汽水等都可以擺入去，不過記得包好，並且寫名。費事有人唔知真黐抑或扮儍，食咗你塊扒，飲咗你支香檳，咁就唔好喇。不過，我信得過，多數都係老實人嚟嘅。
今日晚餐，spam 午餐肉，一丁麪，再加兩個橙。食得好開心。
同房居然有兩個香港嚟嘅𡃁仔，廿歳左右啩，佢哋好夜至返，我就一早走人。冇乜交流。
成間旅舍都未起身，我就已經交晒鎖匙、被單等，預備走人。吖，硬係覺得啲時間怪怪哋。原來至醒起，昆士蘭冇夏令時間 daylight savings，所以比我哋紐省慢咗一個鐘。唔怪得仲未有人起身喇。
揸車沿黃金海岸公路 Gold Coast Highway 北上，只 20 公里，半粒鐘就到。仲以為聖誕假，一定好難洎車，車到滑浪天堂海灘，居然揾到海灘路邊車位。又因為略略遠離中心位置，泊車仲免費𠻹，真好彩。戴好頭盔、裝好單車，踩車去也。沙灘邊單車徑，係行人單車共用。而且講明，行人優先。呢種環境，盡量唔好響鐘，咁樣好冇禮貌。想快嘅，就踩出馬路。我係嚟 hea 嘅，詩云：優哉游哉，亦是戾矣。駛乜急，慢慢嘆也。
踩到海灘中心區，睇個樣，遊客唔多。沙灘上，都頗為冷清。唉，你話死唔死，大時大節，又係夏季，個巿咁嘅款，做遊客生意嘅，就喊得一句句咯。
嚟得海灘，梗係要游水。收埋單車，換上防矖 rash suit、board shorts，執起 衝浪臥板 bodyboard 奔向海灘。澳洲游水，向住大洋嘅海灘都好大浪，唔熟水性嘅，千祈咪試。咁大個海灘，邊度睇得晒。為安全計，救生員會喺長長嘅沙灘上，一個較細嘅區域內，左右每邊豎起紅黃旗。袋鼠仔細細個就知道，游水，衝浪，就一定要喺兩支旗中間嘅海域，口號就係 swim between the flags。冇旗嘅話，就即係冇救生員。如果咁都落水，又唔會有人去阻止佢嘅，佢一係就好叻，否則⋯⋯各安天命係喇。
話雖如此，沿住海岸線，度度都會見到滑浪者，佢哋懶得睇你支紅黃旗，邊度有浪，佢哋就會出現。普遍社會亦唔會特別歧視佢哋，一個成熟嘅社會，唔係 Nanny State，唔會乜都管，要尊重個人選擇。總之，自己嘅安危，自己苦樂，就由自己一力承擔。經常見到海邊岩石上有石碑，刻上被大海吞噬咗嘅年青滑浪者嘅故事。字裏行間，並唔係充滿悲怨，反而慶幸 celebrate 佢快樂短短暫嘅一生，而且感恩，逝者可以喺佢嘅至愛樂園歸天。我好鍾意佢哋對生命嘅態度。
Bodyboarding 實在好好玩，走出海中間，背住沙灘，睇住啲浪一個一個湧埋嚟。見到個浪夠大嘅話，就趴上浪頂，如果一切順利，個浪就會一直帶你去到沙灘。非常有速度感，十分過癮。但係我水皮，真係咁順利嘅浪，成朝都冇十個。多數都係兩三下就冇咗，又要行返出海中，如是者逆住浪走嚟走去，都需要好多體力。今日都幾大浪，都玩咗幾個靚浪，算係咁嘞。雖然唔係好夠喉，要趕下一場，都係上岸冲身走人。
黃金海岸有著名嘅四大主題公園：華納片場、水上樂園、海洋公園、夢幻世界遊樂場。加埋海灘及其他活動，呢度玩十日八日，絶對冇問題。我而家係遊車河，邊度都唔去，即刻起程去今次行程嘅最北端，布里斯本。
唔駛兩粒鐘，行咗90公里，就到昆士蘭首府城市，布里斯本。果然係一省首府，背囊友旅舍都有冷氣，今晩舒服咯。
旅舍就喺城中布里斯本河邊，去邊度都好方便。一出旅舍，就係街道，買乜嘢都好方便，連火車站都係步行範圍，絶對係背囊友嘅恩物。我踩住單車，先過河嘅南岸。又係到處單車路，真係好方便。市中心布里斯本河南岸，又係叫做 The South Bank，又係有一個大摩天輪。真係懷疑，佢係老翻倫敦嘅 South Bank 同埋 London eye。
南岸公園 South Bank Parklands 真係好多人，我踩住單車，緩緩喺人群中穿梭，咁樣行街，真係好舒服。公園呢度，絶對係遊客區，飮嘅食嘅，到處都有唔在講。呢度居然有個好大嘅嬉水區，設計到好似天然海邊一樣，仲有真沙嘅沙灘。大熱天時，個個玩到唔知幾開心。環視附近每一個人都掛住笑臉，歡樂嘅氣氛，果然無敵。
我食咗個簡單泰國餐，之後，就沿住河兩岸嘅單車徑，踩咗一個好大嘅圈，踩到夠皮就返番南岸。公園後街有條士丹利街 Stanley Street Plaza，附近兩條街都係新建嘅四、五層高住宅，樓下地鋪，全部都係食肆。我踩住車慢慢兜咗一個圈，哈，果然真係乜餐都有。睇下鐘，就嚟六點，係時候揾間嘢，舒舒服服坐低，食個好啲嘅晚餐。食乜好？有越南妹出嚟兜生意。好，就越南餐喇。平時食餐，因為要揸車，唔飲得酒。今日踩單車，就可以要支啤酒。個餐唔錯喇，招呼又好，都幾滿意。又有前菜，又有啤酒，四十蚊有找，算係咁喇。
呢度冇夏令時間，太陽好遲至至落山。食完飯，踩單車去河邊坐一陣。夕陽斜照，攞出 ipad，同愛人 Skype 談下情話，係好浪漫喎。踩上橋上，就喺布里斯本河上空，睇住夕陽西下。係時候返歸喇。
好幸福，瞓一個有冷氣嘅覺。
又係我第一個起身，費事嘈親人，放輕手腳，執拾細軟離開房間。廚房同就餐嘅地方喺頂樓。照舊，又係一丁麪加 Spam午餐肉。旅舍喺河邊小山崗上，喺天台一邊食早餐，一邊俯瞰仲未瞓醒嘅布里斯本。跟住仲要行好多路，一早出發。
調轉頭向南行，今日嘅目的地係 Port Macquarie ，車程約 570 公里，係呢個行程最長嘅路程。入滿油，即刻走上高速公路。回程，都係行番舊路啫，又有導航，路邊指示又清楚，只要小心駕駛，唔好超速，咁樣揸車，唔算難事。當初以為一個人揸車，好易攰，好易瞌眼瞓。原來多啲利用休息站稍事休息，伸伸腳，方個便，又真係唔太攰。
唔駛七粒鐘，到達旅舍。照例又係先登記入房，再攞啲當地資料。先揸車四圍逛，再車上高點視察環境。泊好車，換上單車，踩入人群之中。Port Macquarie ，都算係一個有歷史嘅大城鎮。1881年，以當時嘅 紐修威 New South Wales 將軍總督 Lachlan Macquarie 命名。
麥覺理係澳洲殖民時期嘅總督，佢對紐修威有好大貢獻，所以好多嘢都以佢命名。佢有乜貢獻？我唔講嘞，自己谷歌一下喇。不過想講一個故事：傳說麥覺理夫人，即係佢老婆，跟住老公嚟到呢個蠻荒之地，非常思鄉。總督府附近向海有一磈沙岩，夫人命人將佢鑿成一張石櫈。夫人一有時間，就走出嚟，坐喺石櫈上，向海望住英倫方向，聊解鄉愁。久而久之，呢個寶座仲起咗個朶，就叫做 Lady Macquarie's Chair。今日就成為雪梨旅遊熱點，就喺雪梨植物公園一個半島嘅尖啄。
踩單車穿過海灘，向海就係一條長長嘅防波堤 the Breakwall，防波堤用咗好多好多，好大嚿，唔同形狀嘅大石堆砌而成。市議會鼓勵塗鴉者喺石頭上一展所長。久而久之，幾乎每嚿石頭都畫上塗鴉。有卡通人物、有遊客留畫、有向愛侶表示心跡嘅、亦有對逝去者表示思念。因此，呢度亦成為麥覺理港嘅地標。
我沿海邊單車徑兜咗一個大圈，踩夠皮，再揸車去另一個山頭，睇下建於1879年維多利亞女皇時期嘅燈塔。係咁行兩行，咁又一日喇。返出市中心揾地方食晚飯。行咗入間泰國餐館，要咗個綠咖哩豬肉。個汁整得好啱食，居然食咗兩碟飯，仲要食到照鏡𠻹，呢餐好滿意。
飽餐一頓，返番旅舍。呢間嘢果然好生意，入夜後，連圖書閱讀室、遊樂室，地下都擺滿牀褥，瞓滿人。好彩我預早些少訂房，否則就要做廳長。不過，一日半日，又有乜所謂。
之之坐坐，又到瞓覺時間。今晚好特別，呢間六人房係 mixed 嘅，即係有男有女。原來呢間YHA 嘅 dormitory ，分成兩類：一係，女仔房；一係，混合房。我冇得揀，今次房內有兩男四女。大家各有各瞓，又真係冇乜嘢嘅。但係畀我發現一樣嘢，原來女仔瞓覺，又真係安靜好多。我住過男嘅 dorm. 大家一齊行雷打鼻鼾，彼此彼此啫，夢中高聲呼嘯，我好自在。今晩，未瞓著時，我仲控制得到聲響，但當睡公主同我遠遊時，肉體嘅呼吸聲有幾勁， sorly 嘞，我控制唔到。各位小姐，有因我而成晚心如鹿撞（煩到頂心頂肺），輾轉反側，未能安枕者，只好⋯⋯謹此致歉，囉。
費事第二朝面左左，晨咁早起身，執好晒嘢。等到六點廚房開門，煮早餐、沖滾水，不在話下。
離開旅舍。朝早去 Wright's Creek 行下紅樹林，嗰度係一個內陸海水倒灌嘅沼澤，介紹話可以睇到好多動物。其實，你一行入去，好多動物都即刻柄埋，點會有興趣畀你參觀。不過就真係見到好多飛狐 flying fox，就係蝙蝠。離遠已經聞到味，抬頭一睇，每一棵樹都掛住數之不盡嘅飛狐，我顎高頭望佢哋，原來佢哋倒吊住，亦係一路顎高頭睥住我。我即刻快步走人，唔係怕咗佢哋啲鼠目寸光，而係驚佢哋忍唔住，嚟個大大小小嘅方便，咁我咪中晒頭獎。
拉開講一筆。過年之後冇耐，新聞報導，澳洲北部熱浪，有大量蝙蝠死亡，稱為蝙蝠雨。聽綱上電台，香港有人唔明白，點解會發生啲咁嘅事。原因係，佢哋以為蝙蝠一定住喺山洞，山洞陰涼，日頭唔出嚟就冇事。但係佢哋唔醒起，好多蝙蝠係住喺樹上。嗰幾日，太陽太勁揪，大地就好似個焗爐，咁即係掛爐烤飛狐，佢哋熱到飛唔起，咁就跌晒落地，變成蝙蝠雨喇。
別過紅樹林飛狐，呢個五日遊車河之旅亦告圓滿結束。跳番上車，小心駕駛，回家去也。
返到屋企，睇下咪標。1987 公里。哈，係唔係應該好似羅賓話齋：再喺邊度兜多個圈，湊夠二千呢。anyway ，呢個係我個人嘅新紀錄。
再噏過。
嚤囉
睇相可上面書
https://www.facebook.com/media/set/?set=a.569156286495129.1073741888.100002022875470&type=1&l=044c20c5fd
No comments:
Post a Comment