2018.02.18 古有茂叔噏變法，如今佳人唔巴辣；善度人間法理情，留待大人秋毫察
戊戌，果然夠晒歷史，英治時期，我哋個個都要讀中史，當然一定涉獵過戊戌變法。嗰時我哋叫佢茂叔變法。而家，茂叔嘅前因後果，早已畀返晒歷史 Miss，不過，呢個名就永遠記得。百幾年後，茂叔重臨，呢位茂叔，又真係值得記一記：
戊戌狗年大年初一，晨咁早，蔣家上至六十二最高元老，下至兩歲初生小B女，連半個蔣家身份嘅鬼仔占士，都齊集雪梨，紐修威最高法院。嘩！大年初一闖官門，所為何事呢？原來係咁嘅 ⋯
咁就要數返 ⋯⋯ 蔣家大少幾年前大學畢業，攞咗個法學士學位，以一般香港人常理：讀教育 —— 做教師、讀法律 —— 就梗係做律師㗎喇。但係大少爺就講另一套嘢畀你知 ：一來，佢自己雖然係牙尖嘴利之人，但並唔係心思慎密嗰隻款，加上，佢有雙親風範，絶對唔鍾意受咁多條條框框嘅制約。咁嘅性格，點啱做律師？再者，律師專業，非常保守，尤其是大狀，冇人冇脈，要入行，談何容易？
佢亦身體力行，畢業後，掂都冇掂過法律呢瓣，佢以自己所長，兩口子落手落腳，又真係另闖一番新天地。佢嘅經歷話我知，讀書攞學位係一件事，但係真正要入行，就係另一回事，所以到大小姐又讀法律之時，佢都事先聲明，佢唔會入行做法律專業㗎。
五、六年大學生涯，大小姐做得最多嘅就係兼職做成零售、教音樂，又喺教會負責音樂崇拜，當然更加忙碌於拍拖喇，除咗考試外，幾時見佢會揸住本書嚟讀。不過，我認為佢係蔣家最讀得書嘅人，唔係因為佢成績特別好，而係因爲佢唔使點讀都有唔錯嘅成績。成績好壞係一件事，我哋從來冇諗過佢會做邊瓣。
大小姐大學畢業，攞咗個歷史法律雙學位，估唔到佢隨即考入法律專業學院，半年後畢業。原來執業最大關卡係搵師傅！每年咁多畢業生，要搵人收你做實習，原來係一件非常艱難之事，好多人都卡咗喺呢個位，年復年，月復月， hea 吓 hea 吓，就再唔使旨意入行。大小姐出身蔣家，冇人冇脈，真係乜都幫唔到，佢細細粒一個人，憑真心實意本性，機動靈巧身手，終於完成二十週拜師學㙯之期。實習期間，佢早出晚歸，雖然忙到冇乜時間傾談，都感受到佢受緊好大壓力。實習中所遇到嘅人、經歷過嘅事，古靈精怪，曲折離奇，實在可以寫一本書。大小姐自己嘅親身體驗種種困難，又一手一腳去逐一破解，其實係上咗人生寶貴嘅一課。
就喺戊戌年嘅第一日，下晝兩點，紐省最高法院首席大法官宣佈：「大小姐，本庭接納你成為紐省最高法院律師。」
儀式中，仲要宣誓。法庭有聖經可借，大小姐自備私伙聖經，以示隆重。當聽過誓詞，大小姐話佢感受到肩上檐負住責任嘅重量。阿珊非常欣賞，因為能夠感受責任係服務人群嘅原動力，而我就希望佢唔好咁辛苦，悠哉悠哉過一生。好彩，兩者並唔一定係互相矛盾嘅。
其實，大小姐而家已經喺律師樓打緊工，艱難嘅門檻已過，戊戌年中，又會有另一個大搞作，總之，今年就係重要變化嘅一年。
大少爺幾年前已離開蔣氏大本營，另築新巢，開枝散葉。大小姐早已好獨立，毋須我哋多多事幹。一家人，除咗精神上，大家心連心喺埋一齊外，其他瑣碎事，日常技枝節節，都係潮州音樂，盡量自己顧自己好喇。
我寫嘢，一向係噏自己，今次破天荒講多咗。大小姐鬼妹仔性格，我亂噏，佢都OK嘅。不過，都係講返自己。
舊年年尾，我話過我欠債累累，真係要的起心肝還呢筆「遊記債」。睇嚟，舊債未還，又添新債。不過我又話過，欠債纍纍，正係我動力嘅源泉。話口未完，趁大小姐攞咗執業資格後，年初二，我又飛喇。今次行程，實在匆忙。不過，匆忙，又有乜嘢所謂。來去匆匆，正是人生。
報咗個三月三日出發嘅單車環島團，每日預計要踩 80 至120 公里單車，仲要踩上蘇花公路。體力上我係完全冇信心，不過，又係嗰句：唔通，聽日嘅我，會 fit 過今日嘅我咩？我拼住失敗，盡力而為，咁就冇輸喇。
旣然去得台灣，不如試下遊火車河，兩個禮拜時間，用火車環島一周。於是，就訂出以下行程喇：
17- 雪梨飛台北 Taoyuen , stay Taipei
18- Taipei
19- Taipei to Hualien
20- Hualien
21- Hualien to Ksohsiung
22- Kaohsiung
23- Kaohsiung to Chiayi to Alishan
24- Alishan
25- Alishan
26- Alisan to Chiayi
27- .Chiayi
28- Chiayi to Taipei
March
01- Taipei
02- Taipei
03- Joint Cycle trip
(03 - 11 Cycle trip)
11- Cycle trip end stay Taipei
12- Taipei
13- Taipei
14- Taipei
15- Taipei 飛雪梨
定行程時，未知花蓮地震。有人話，而家去花蓮會麻煩人哋。不過花蓮政府同民間都話歡迎遊客。因為地震引發退房退訂潮，實在影響花蓮經濟。又有人話：喂，危險噃。我數下手指，花蓮七級地震，咁大鑊，都「只係」十七，而香港巴士唔使一分鐘，十九人就咁冇咗！邊度危險尐都好難講，唯有醒醒定定，加上 fingers crossed，祝我一路平安喇。
今次點睛之處就係搭火車，原來台灣鐵路網上買飛非常方便，加上環島鐵路綫好鬼簡單，我用四程火車兜美麗島一個圈，應該係好容易嘅事。至於旅館民宿，就喺一站再 book 下一站，應該冇問題嘅。
阿里山係台灣嘅地標風景區，所以特登留長尐時間，仲豪花酒店費，住間靚嘢，我一世仔未住過咁豪酒店。我認為：花費喺美麗島，值得嘅。阿里山呢一程，井少都撥冗參與，使我呢個行程更添光彩，這廂謝過了。當然喺台北嘅日子，又住喺佢嘅豪宅，車出車入，又借埋單車，多謝晒喇。
至於 9 日單車團，我就成個人交咗畀領隊，任佢擺佈嘞。我嘅責任就係盡力完成每日功課，其他日常瑣事，交通埋棧食宿，自有專人打理，我毋須費心，我嘅心力用嚟欣賞美麗山水，感受人物風情，已經好唔得閒嘞。
戊戌年，應該係我人生嘅里程碑。好明顯已經唔再為三餐頻撲，亦毋須再為養育子女而操勞。剩返落嚟，就係自己兩件。籌劃並且實行使自己每日都過得開心嘅事，絶對係頭等大事。經過一六年入廠，一七年阿珊跣一鑊，你仲會相信，世間上會有永恆不變嘅嘢咩？
前排驗身、驗心之後，又去例行驗眼，撿驗結果話我有早期青光眼。根據我中學生物常識，青光眼係眼壓過高殺死視覺神經，由周圍開始，向中心擴散。初期，好似我咁，雖然已經有周邊神經細胞死亡，但因為係喺視綫外圍，損失嘅視力畀其他視力補充，又唔痛，又完全冇感覺，所以唔用儀器，係唔會知道有毛病嘅。而神經細胞嘅死亡，係唔會返生嘅，呢尐係常識。
好嘞，眼壓高？即係點？正常眼壓係 13 至 22 水銀柱。咁我係幾多？15！咦，咁點算高呢？因乜解究發青光？咁樣，我至知，原來世界上有種嘢，叫做 NTG —— Normal Tension Glaucoma 。正常眼壓發青光。原因？未知喎。可能尐神經綫生得弱雞，正常壓力都頂唔順！咁都得，問你死未。正常都出事！你點夠個天鬥？
咦，絕症喎，咁咪好得人驚？我又好平常心喎，一來，如果可以減低眼壓，就有機會減慢壞死過程，由開始到盲晒，都會有十幾廿幾年啩。我又咁諗，如果盲咗，咁即係咁耐都未瓜得，咁又 OK 喎。如果瓜咗，咁即係冇眼睇喇，發青光又冇乜影響啫。況且 touch wood ，都係一隻眼。fingers crossed 第二隻眼生生性性喇。
跟住，就係聽醫生話，每晩滴眼藥水，希望可以降眼壓。不過，而家都係試緊藥。
咁即係話，有得玩就好去玩，有靚嘢睇就睇多兩眼。人可以做嘅，就僅此而已。
再噏過
嚤囉仔
