嚤囉仔手記: 02/21/16

Sunday, 21 February 2016

2011.06.05 批評任你噏，有乜所謂；大權在我握，點怕你砌

柯拿，大家好，

好幾年喇，我養成一個習慣，星期六放工後，就返歸開電腦，將過去一周電台節目錄落mp3，跟住成個禮拜都有嘢聽啦！擺喺車聽唔在講，就算一路開工，一路隻左耳都插住耳塞聽緊。我而家已經練到左耳聽節目，右耳同客講嘢。有啲客問我聽緊乜，我就會話﹕music, it calms me down。啲客都唔會覺得我冇禮貌嘅！

六月五日前一晚（唔可以講４號，否則唔知井少收唔收到呢篇嘢，…唉！），都喺坐喺屋企，一邊錄嘢，一邊睇電視。TVB新聞直播維園現場，又見點點燭光洒遍足球場。再用越洋光纖電纜，聯絡到身在千里之外，維園現場嘅啊珊，感受吓現場氣氛。佢話好多後生仔女參加！呢個世代，任何政府再想愚弄人民，淡化、合理化自己所犯罪行，正如糖保羅兄所言：no way！！！

保羅兄話歡迎comments，你知我好聽話嘅，咁我又發吓噏風啦！

你知有時我哋買鞋買細咗會夾腳，啲客會拎嚟比我Stretch，即所謂「楦鞋」。但有啲皮掙大咗會出現stretch marks，我會預先警告啲客。佢哋會問有冇辦法搞番掂啲marks，我會咁講﹕就好似女人生仔，個肚掙到好大，咁就有stretch marks喇，如果我可以搞得掂呢啲marks，我就發達喇！

連肚啲「紋」都搞唔掂，有乜嘢方法可改革中國，呢個題目大成咁，又係嗰句，如果我可以搞得掂，我就發達喇！

你聽我講嘢瘋瘋癲癲，實在我非常悲觀（悲觀呢個詞唔喺咁準碓，但我又諗唔到好啲嘅）。我唔相信喺我有生之年，會見到民主中國。係普世認同嗰隻民主，唔喺有中國特呢隻，因為有中國特色嘅民主，早已駕臨神州大地，大家毋需再費心找尋也！

保羅兄話有n咁多噸嘅方法去改革中國，嘩！發達喇！願聞其詳。喺咁多噸嘅方法中，佢提到the modest and realistic way喺批評。咦！講之嘛，唔太難喎！

不過，check吓歷史，有冇用呢？

遠有，彭大將軍、少奇主席批評偉大領袖三面紅旗，再有李一哲批評小平設計師新的獨裁，又有曉波波提出乜鬼憲章；前有老譚批評川菜點解出現豆腐渣，現有石仔BB啊爸批評三隻鹿仔……，喂！已經越批越細「挨」喇。不過，你話比我聽，呢啲發出批評嘅人而家喺邊度。再唔講五湖四海，嗰啲無名無姓，無權無勇嘅蟻民，如果唔覺意或者唔嗅米氣，講咗啲乜嘢唔合時宜唔啱聽嘅嘢，後果會係點？！保羅兄，咁樣夠唔唔温和，夠唔夠現實呢？批評咗一個甲子有多喇，重要講多幾多個甲子至夠呢喂！咁，我一生又有幾多個甲子？

有人話我哋唔喺佢哋嘅覆蓋下，東方之珠，噏乜都得。老友，我都係悲觀。言論空間越收越窄喇。偉大祖國越嚟越有米，有乜嘢買唔到？報紙、電視、電台…etc，你要唔要生意（＄）？香港人咁modest，咁realistic，一定識做！叫你唔好濫用司法、叫你三權合作、唔好做啲可反映民意嘅投票、做啲健腦嘅國民教育、再收緊埋電腦網絡、出埋三七廿一條...... ，三水老睇走馬燈，陸逐有來。

當權者會唔會冚晒所有批評呢？咁又唔會噃，控制住嘅批評係有助统治嘅！你班友遊行完，大嗌一餐後，跟住食飯、宵夜、卡啦OK，第日返工返學。一切照舊。在位者可以大大聲話，邊個話我冇自由？吓！

Margaret喺立法會長篇大論講「哀莫大於心死」，建制議員根本唔駛講嘢。如果討論尷尬議題（例如六月五日前夕），索性離席去飲咖啡。叮噹！投票喇，呢個制度下，你梗輸。在位者可以大大聲話，所有決定都係立法會通過嘅，邊個話我冇民主？吓！

咁係唔係reality呢？

保羅兄話可以列出一個長長嘅光明面嘅list，我用我個腦仔諗吓，係咪講飛機大炮、高樓大厦、豪華政府辦公大樓、高速公路、澳運亞運、運動獎牌、衛星太空人、大款揚威英美加澳紐，買晒你啲包包同屋屋，食晒你啲龍蝦同鮑魚，用埋你香港醫院啲產房，你要幾錢？即管開聲！……咁夠唔夠光（bright）？喂！重有乜嘢藉得威威，我黃口黃面，都想知，與有荣焉吖嘛！願聞其詳。

喂！冚咗呢壇「一檔酸蔗」重衰呀！我唔明點解會重衰喎。

不過，after all，要點樣嘅政府，全係人民決定。做一群flamingos，抑或做一群非洲土狼，無人可以代你選擇。如果天註定大唐國全體國民，一定要幫襯呢壇酸蔗檔，我又可以做啲乜呢？

好鍾意呢首歌，係歌劇江姐嘅。江雪琴喺白公館坐監，知道國旗係五星，於是喺監倉內同其他同志一齊綉紅旗。

千分情，萬分愛。

含著熱淚綉紅旗，綉呀綉紅旗。

熱淚隨著針綫走，

與其說是悲不如說是喜，

多少年（呀），多少代，

今日終於看別你，

看到你。

革命先烈喺一個甲子前，坐緊監都可以綉紅旗；今日喺大唐受緊嘅人，唔知有冇綉紅旗嘅空間呢？

批評冇用，咁乜都唔駛講喇！

咁又唔係，講得幾多得幾多都係啱嘅，有冇用唔係你講嘅。亦唔担心比人利用，我口講我心，我哋而家咁高級（保羅話Senior），憑良心講嘢，重有乜嘢好怕。說話亦喺陽光下，唔係話實啱，大家攞出嚟討論啫，此乃啊媽係女人嘅道理。

再噏過，

嚤囉

2011.05.29 略施公安秘芨，點到蟻民亂噏

柯拿，大家好，

今早好早起身，因為妹妹一周美國之旅，話咁快又完嘞，我要去接佢機。回顧一周，好彩有互聯網，妹妹將佢嘅行踪擺上面書，我哋知道佢喺邊、做緊乜，重有相睇，就安樂啦！佢都算有交帶嘞。佢此行識咗好多新朋友，新嘅生活體會，非常愉快，佢話要努力工作，揾錢再去！！

因為五區公投搞到啊爺命令特區政府大力封殺，港府而家力推「唔准補選」機制，以堵塞再搞公投，因為公投令民意太明確，會令啊爺及孫仔尷尬；而唔清唔楚嘅民意，人人都可以完全唔會面紅咁話，佢自己代表真正民意！亂噏唔駛錢！

不如講吓袋鼠國政府點做。澳洲議會係兩院制，選舉方法亦唔同。上議院採比例代表制，各黨派推出一條名單；大黨十個八個人，細黨三個四個。選民一人一票，就投成條名單，得票多就多啲人入選，反之就少啲。如果因任何原因有出缺，該黨就可派人補上，毋需再投。

下議院（區代表）則採單議席單票制，即只得一人當選。選民一人一票，票高者得。每選區多者有七、八個候選人，少者則有四、五人。如有出缺，絕唔會由第二多票者補上，而係再選一次！

人云香港人心未回歸，但特區政府則回歸不少。有記者就選舉時，規管網上電台向選管局主席馮驊問，點樣界定網上電台。佢係法官，佢居然話，好難界定，但大家都明白嘅嘞（？！）似唔似公安話，「犯咗乜嘢？你心裡明白！」

偉大祖國唔搞三權分立，東方之珠三權合作之路不遠矣！不過，樂觀啲嚟睇，合作梗好過抝撬，和諧吖嘛！

Ｋ仔快搞清楚药費，如果係一年，都○Ｋ嘅，每月嘅話，都幾喺嘢喎！

再噏過，

嚤囉

2011.05.22 女大女世界，忽然噏出遊，O嘴表情怪

柯拿，大家好，

最近，一家四口唔多時間走理一齊。世翀工作繁忙，晚間又替人補習揾米。夏澄攞咗我架車後，就一日四圍飛唔黐家，好少返歸食飯。啊珊就on and off喺香港大半年喇。唯一唔變嘅就係我呢個儍佬：

起身，去gym，返工，放工，整飯食，睇電視，搞lee搞lo…… ，瞓覺，又一日喇！

難得上周日，一家四口加理Ivy可以一齊食餐飯。我家四人，個個都口水多過茶，要在此發表偉論，都需要一定嘅功力。正當口水亂噴之際，妹妹話：

我呢個禮拜五去美國……。

我哋兩件嘢即刻O哂嘴，連食緊嘅澳洲龍蝦伊麵底都忽然冇晒味。喂，突唔突然啲呀？原來翀翀同Ivy早已知道。問清楚，原來佢教會嘅Bible College有一對兄弟由美國嚟讀神學，周五會返一返美國屋企小休七日，然後再返澳洲。妹妹同呢兩個美國仔friend，於是約埋另一個澳洲仔（係佢中學同學），跟埋美國兄弟去美國，……。

各位老友，如果你個女（男仔可能唔同）出條咁嘅題目比你，你會點答？

乖女，去美國要千幾銀袋鼠幣，咁你有冇……

佢話，此行一切駛費，我自己搞掂，双親毋用粗心！

…………..

乖女，呢兩件美國仔，你識咗幾耐，信唔信得過？

佢話，識咗半年，我信得過佢哋

……（你啫！我唔識佢哋吖嘛，心諗）

乖女，學校呢個Sem.重未完，有冇問題？

佢話，交晒功課，試亦考埋。

……

（重諗唔諗到乜嘢藉口，叫佢改變主意呢）

不如咁啦，乖女，請呢兩個美國仔嚟我哋屋企見吓面先啦！

佢話，OK no problem。

啊仔，你又點諗？

佢話，佢大個女啦，應該相信佢搞得掂，

美國仔呢？信唔信得過？

基督徒，OK嘅！

（？？我同佢睇法有距離）

星期二晚飯後，妹妹帶埋佢同學James，同美國仔Steve一齊嚟我哋屋企飲杯茶傾吓偈。Steve介紹佢屋企情况，又講吓喺美國呢幾日會去啲乜嘢地方…等等。睇樣，美國仔都係有教養嘅，而佢哋對呢個trip都係認真而期待嘅。我諗，我都只能相信妹妹嘅眼光同判斷力。

記唔記得，嗰時九樓出團去大陸，不少兄弟姊妹出盡法寶，對父母又呃又氹。而有啲家長一哭二罵三上吊，希望阻止。正是：

燕燕爾勿悲（我唔悲，担心啫），爾當反自思，思爾為雛日，高飛背母時，當時父母念，今日爾應知。

星期五，啊珊開車送妹妹同James；翀翀同Ivy（佢兩個返香港小休）去機場。

妹妹去嘅係美國南部喬治亞州，近Butler小鎮嘅一個農莊，完全唔係乜嘢旅遊景點。佢可以親新體會一吓咁不同嘅生活，當然係十分難得嘅經驗。呢樣嘢亦係我非常嚮往嘅。担心？當然好担心！啊珊就更加喇。

多謝互聯網，星期六早上已喺面書收到夏澄嘅消息，重可以同佢chat番幾句，而且電話來往亦好方便，算係放心啲啦！

星期日，早上同啊珊飲完茶，出一陣街，佢又搭10點機，飛番香港。送佢出機場，返番屋企。

我又剩番一支公喇：

起身，去gym，返工，放工，整飯食，睇電視，搞lee搞lo…… ，瞓覺，又一日喇！

再噏過，

嚤囉

2011.05.15 噏茉莉，噏水仙；邦有道，咁至堅。

柯拿，大家好，

本周大事係啊珊今朝返雪梨，不過佢只留一個星期，到22號週日又再飛港搞埋啲手尾。如想睇佢步出機場嘅英姿，請登入面書。

未入冬季，雪梨錄得唔知幾多年最凍嘅五月，今朝起身，只得4度，好彩萬里無雲，我著住Tee出街都OK喎。啊珊就話好舒服，梗係啦，寧可凍啲都好過熱辣辣嘅香港吖！

有一個問題想提出好耐，而家個個講茉莉花，唱茉莉花。但我印象中茉莉花根本原產自中東，後再傳入中國，佢係突尼西亞國花，係外邦嘢，點代表中國？胡錦濤話佢家鄉唱茉莉花，我哋又飲香片，又好似好關我哋事。

但我清清楚楚記得我細佬仔時唔係唱茉莉花，而係唱水仙花（同時期學嘅重有讀書郎、紫竹調、王小二拜年……等）。佢唱法同茉莉花有九成相似，唔知係邊個抄邊個？水仙花歌詞係咁嘅：（用廣東話唱）

好一朶水仙花（吖呀）

鮮花（呀）落在我啲家

呀…..（3-235-321-21）

邦有道，民安樂

家家齊唱太平歌（啊啊）

啊…………………..。

水仙花係我小學低年班時學校教嘅。

後來我聽到有個故事係咁嘅。清末時，派出選手參加奥運會（第一屆現代奧運喺1896年雅典，重係清朝）。主辦單位問，如果你哋勝出，要奏嘅國歌係點樣？選手先至醒起，原來大清（嗰時唔叫中國）係冇國歌嘅，選手搜索枯腸，只識得一支歌，冇錯，就係水仙花。到底

後來有冇奏水仙花，咁就唔知嘞！

呢首歌我最鍾意「邦有道」，國邦對民要「有道」，咁樣民先至安樂，家家就得享太平日子。

我希望有水仙花，咁就唔駛茉莉花啦！

再噏過

嚤囉

2011.05.07 曾主席，電親新聞噏飄色；俏周仔，十大著數你點睇？

柯拿，大家好

五月係袋鼠國秋天最後一個月，天氣亦凍起嚟。今日母親節，祝願各位母親一年靚過一年。

講開啊媽，不如講吓生仔，先排雪梨周仔轉載來港生仔十大著數，本想即時嗲吓呢個題目，唔知點解冇咗影。呢個題目仍然新鮮，就噏吓喇！

十大（何止！）著數根本就係3星港人嘅權利，問題係點解有啲父或母都唔係3星，只要有錢喺香港醫院book個生仔位，佢哋在港出生嘅子女就會變成3星？你會話係基本法話嘅。咁，如果係一個漏洞，點解唔去修改堵塞呢？

上世紀七十年代，英國佬知悉北京會收返香港，國會馬上修例將港人英國護照變成BDTC，再變成BNO。目的就係限制港人唔可以咁容易變成英人！

而家喺袋鼠國，就算你喺呢度出世，如果父或母唔係袋鼠，你都唔會變成袋鼠仔／女嘅。

一字咁淺，啊媽係女人嘅道理。

雪梨周仔，網上有冇資料解釋點解港府冇咁做。唔通又涉及北方重大利益？例如，好多大人物要落嚟。又或者根本係一盤大生意。如果係咁，曾班子點敢造次。

今日喺電視新聞見到曾師兄，因為長洲打醮，訪問老曾，先知道佢而家連飄色呢瓣都撈埋，果然犀利。電視出佢個頭牌叫海燕體育會主席！安哥或國術組兄弟姊妹，如果見到曾主席，請代我向佢問好！並祝佢反對起焚化爐成功！

再噏過

嚤囉

2011.05.01國事政事咪講多，返學亂噏點收科

合指一算，我移居袋鼠之邦已19年。以前聽人講，「華僑離國後會更愛國」。但呢個感覺，好可惜，並唔發生喺我身上。就算我認識周遭嘅香港人，呢句話都用唔上。多數對中國事並唔特別關心。亦知道大陸愈來愈有錢，愈來愈巴閉及大聲，但絕唔會因此而特別自豪咗。知道不少由大陸來嘅人非常有米，但並唔會特別覺得佢哋威威，尤其想到好多貪官、奸商。

但由大陸來嘅人多數點諗，我就唔知。不過幫我做嘢嗰個係由廣州嚟，我哋由開工開始，講中港政治講到收工，搖頭搖到頭都甩埋。我對佢講：「點解你個觀點同我咁接近，你喺大陸人之中係咪異數？」佢話，喺廣州個個都知啦，不過唔會特別講啫！我問佢：「你點樣同你個仔講呢啲嘢？」佢話：「我好少同仔女講啲咁嘢，點知佢哋喺學校會講啲乜嘢，咁咪好大劑。」……。

佢提醒我哋移民嘅理由，春夏之交，那個事件之後，我問自己，如果生活喺香港，我希望我啲仔女係點樣嘅人：

。識時務，如克勤仔，加入第一大黨，身光頸靚，扶搖直上；….咁正！

。特立獨行，睇唔過眼會開聲，又瞓街、又噴油（比CID跟）、又苦行…咁慘！

。政治險惡，最好唔理…咁頹！

。……….。我唔識揀！

而家，我同仔女無所不談，全無壓力！我哋一家四口，各有各嘅睇法，思想自由；無懼咁去建立各自嘅政治、宗教…等觀點。廿年前嘅決定，無悔。

講番中國人嘅identity。本來作為Chinese，並無不妥，但愈來愈覺得「中國」已被「中華人民共和國政府」所取代！我嘅觀念係，呢兩樣絕唔係同一件事。正如「澳洲工黨政府」並唔等於「澳洲」一樣。而家有人問我 What is your background？我會答 I am a Chinese from Hong Kong。希望同呢個政府有啲距離。我個女重搞鬼，佢話I was born in Hong Kong before the SAR government was established. 佢喺大學讀歷史及法律，呢兩科都極少由大陸嚟嘅學生。愈來愈多嘅大陸學生，佢哋嘅陋習（當然唔喺全部係咁），令啊女好有意識咁同佢哋劃清界綫。以下故事係啊女講嘅，發生喺佢大學：

喺廁所，好多大陸學生唔慣用坐厠，就直接踎上去（唔討論點樣衛生啲），咁會整污糟甚至踩爛厠板。所以校方就貼上告示：

Please do not squad on toilets

冇耐，又有另一張告示：

Please do not squad on the floor

……？！

人哋係唔係尊重你，並唔會只係因為你幾有錢、幾有話語權，人民嘅質素都好緊要。政府受唔受專重，亦係一樣。

再噏過

嚤囉

2011.04.24 人間蒸發冇得say，噏過未？未？！未未！

柯拿，大家好，

袋鼠國由22號至26號係公眾假期，本來復活節只有四目假，今年多咗一日，原因係Easter Monday撞咗4月25日ANZAC Day。

1915年4月25日，第一次大戰期間，澳洲、紐西蘭聯軍要登陸土耳奇，但嗰時未有GPS，搞錯咗，就喺土耳其嘅Gallipoli海灘登陸，上咗岸之後，至知3面係懸崖，根本冇得打。Ausie同Kiwi喺加里波里死守咗8個月，終於要退返出海，但己經死咗成萬子弟兵。明顯係一場敗仗，但為咗紀念陣亡士兵，每年喺澳洲、紐西蘭同Gallipoli陣亡士兵公墓都有隆重儀式。我哋初嚟袋鼠國時，呢一日所有商場都唔准開，幾年前開始，商場可開下午半日，因上午要巡遊。

ANZAC Day我哋一向叫澳紐軍團日，叫咗成百年喇。今年開始，此間中文報紙改名叫澳「新」軍團日。原因？睇吓而家乜嘢人坐喺編輯部就知啦！點解唔識尊重歷史同傳统。有一日，香港唔係Hong Kong，就叫腥江（Seong Gong）喇！

人人都講艾未未，我谷歌一下。我都知佢係艾青個仔，但唔知佢原來係我同宗。艾青原叫蔣海澄，個音聽起嚟好似蔣介石。解放前佢係左翼文人，坐過國民黨嘅監，最憎蔣介石。一日佢寫名，先寫草花頭，因唔想寫個「蔣」字，所以喺草花頭下打個Ｘ，咁就變成個「艾」字，而「澄」、「青」同音，所以就改名叫艾青喇。解放後，艾青被打成右派（即係又坐共產黨嘅監），咁啱老婆又生咗個仔。叫乜名呢？佢求其打開字典，見到個「威」字，好明顯佢當時一啲都唔威，而個「未」字係個「威」字嘅去聲字（國語，第４聲），所以就變成艾未未喇！

我個人極唔欣賞行為藝術，但有人能用任何方法去揭露社會黑暗面，彰顯公義，尤其喺極權封閉社會，更需要珍惜。香港人出句聲喇，唔如幾時踩到上心口，就太遲。

世事真係吊詭，中國積弱幾百年，列強入侵、不平等條約、割地賠款…。所以自細就希望有個強大嘅國家，可以保護國民不受欺侮，得以有尊嚴咁自由安居樂業。而家，世界上邊個國家夠膽掂吓中國？夠晒強大！原來一個強大但不受制約嘅政府，重大鑊！

Anyway, 復活節快樂

再噏過

嚤囉

2011.04.17 山明水秀，噏吓古巴遊

古巴 Santa Clara 哲古華拉紀念館

柯拿，大家好，

呢個禮拜，望吓塊鏡，發覺雙耳比舊時軟咗啲。屈指一算，原來認知天命已過半，唔怪得耳仔雖然而家重未夠順，但都快喇！唔好講咁多，翀翀、澄澄同佢哋身邊嘅人，亦約咗我周末食餐晚飯，意思意思！是晚也，澄澄知我鐘意周圍去，送咗本「孤星」比我。又畫咗張得意嘅咭比我，我放咗上面書。

咁多人陪我食飯，一定好高興，可惜啊珊身在東方之珠，未克參與，憾事也。唔驚，好快返嚟，到時再食過。埋單啦！啊靚姐攞住張單理嚟，翀翀伸手去接，並話，「呢餐老豆牛一，我係長子，張單比我。」你知我身手幾敏捷，一個馬步標前，二話不說，三聲哈哈哈，四萬咁嘅口，五指伸出，欄住靚姐，將袋鼠银票塞過靚姐玉手，並催促佢快移玉步。See, 我又贏咗啦，哈哈。……。

咪住，我可能做錯咗，我應該比翀翀埋單，佢冇得比錢，可能會失望。好明顯，我争住理單，都係想佢慳番個錢，係出自好意。但電光火石間，我冇顧及佢嘅感受，睇嚟，係做錯咗。回想一吓，究竟我哋做咗幾多啲咁嘅嘢呢？anyway，下次將反應速度下調一下，可能會有較聰明嘅選項。呢單case，我會同佢哋講番，一家人嘛！

食飯相已在面書上。

再一次多謝各位祝我牛一開心嘅人，就算冇出聲，都係因為事忙，我知大家心裹面己經講咗啦！………（有冇見過咁監人乃後嘅人？）

趁記憶仍在，速速回顧古巴之旅：

記得當我對人講我去古巴旅行時，多數人都瞪大眼望住我，問我做乜去古巴。

做solo backpacker一定要做足功課，Lonely Planet係不可少，網上旅行討區及blog都好容易揾到資料。上次我去中東，一早已訂定全程嘅住宿。去古巴則無需咁做，我只訂定第一站夏灣拿民宿就可以。事後亦證明網上所得資料基本正確。

一離開機場，搭的士去夏灣拿市區時，唔會忘記嗰陣由老爺汽車噴出嚟嘅死氣味。此後，呢陣味一直陪住你。成街上世地三、四十年代嘅古董車，係古巴最大特色。你估古巴人唔鍾意坐新車咩，呢啲係美國禁運嘅結果。物資短缺，你會見到四圍都係爛屋，爛路…。一個字，就係「窮」。

我喺Santiago de Cuba，民宿主人Doris就多次話佢哋生活艱難，佢個女係醫生，只得每月約10美元工資（係我一個晚餐嘅價錢！）。不過佢都話雖然窮，但係都好開心。呢個同佢哋拉美人有樂天性格好有關係。而熱愛音樂舞蹈，更令佢哋舒緩物質缺乏嘅不快。我同一個喺日本工作嘅前東德人講起呢個問題。佢去過北韓，大家都係共產國家，北韓就顏色單調，死氣沈沈，見唔到笑容。古巴，尤其女仔就七彩繽紛，鮮紅、鮮黃、hot pink成街都係，男男女女互相調笑，十分熱鬧。似乎真係窮得好快樂。

我為古巴人不值，佢哋唔應該咁窮。古巴土地肥沃，一路上由東到西，到處都見望唔盡嘅甘蔗田。我喺Vinales，更係富嬈嘅煙草種植場，著名嘅古巴咖啡，其他生果蔬菜亦不缺。再加上古巴位處加勒比海，四周嘅海洋資源亦好豐富。充沛陽光、靚到飛起嘅海灘，獨特嘅歷史背景，都可為古巴帶來可觀嘅旅遊收益。但因物質缺乏、美國孤立古巴，加上古巴政府鎖國政策，令古巴人唔可以得益於呢啲可貴嘅資源。自從Fidel退隱，其弟Raul上場，推行一系列改革，對經濟改善有一定好處。但社會風氣受到冲擊，拉大貧冨差距，做成社會矛盾等，古巴政府可有良策？喺引入財富同時顧及社會公平，如何取得平衡，碓是大難題。中國模式又係唔係出路呢？

哲古華拉係古巴嘅icon，由東到西，壁畫、雕像、T裇、等等都係老哲個樣。佢甚至唔係古巴人，卻深受廣泛古巴人愛戴。反之，Fidel卡斯特羅卻因治國無方，人民都有怨言。我好少見到有Fidel個樣嘅商品，唔係冇，但絕唔可能同老哲相提並論。古巴人愛戴老哲，我認為完全因為佢死得早！如果佢冇去非洲同南美打游擊，並死於波利維拉，而做佢嘅工商部長及中央行長。佢嘅財經政策可能比大鬍子更左傾，對國家對人民嘅傷害可能更大。不過歷史冇「如果」。我都係估吓啫。無論我對哲古華拉嘅革命思想認同與否。佢追求理想嘅決心，我都好佩服。

「周公恐懼流言日，王莽謙恭下士時。向使當時身便死，一生真偽有誰知。」早死，有時唔係壞事，老哲應該多謝CIA同波利維亞政府軍。

除一晚住Varadero酒店，我全程都住民宿。民宿係Raul改革開放後嘅產物。普遍質素都唔錯，佢哋絕對係「先富起來」嘅一部份人。

作為一個「背囊友」，古巴之旅係有啲失敗。因為成日搭的士而唔去逼巴士，去餐館食餐而唔食街邊嘢！又一個人包車四圍遊，唔夠cheap也。可能同袋鼠幣強勁都有啲關係。不過，舒適啲，我唔會反對！

古巴之旅，由東到西，去咗六個城市，亦多多少少體會到民風。最大遺憾係西班牙文水皮不堪，僅可應付打招呼、自我介紹、叫餐、買飛等簡單日常嘢。全程缺少咗較深入嘅交流，變得流於表面。

都未講點解去古巴。正因為佢開始開放改革，咁大嘅沖擊，一定帶來變化。而家好嚟睇下佢呢個樣，可能以後都睇唔番。有機會，再嚟睇吓變化後嘅古巴都唔定？！

總嘅嚟講，古巴之旅，我都好滿意。

再噏過

嚤囉

2011.04.09 咪噏骷髏頭；百厭仔，聲要收

柯拿，大家好，

地牛翻身攪到東羸連中三元，實乃人間大大大悲劇。喺流下同情之淚以及猛噏民族DNA咁學術嘅問題後，世人亦感兔死狐悲，who’s next？

地震、海嘯只係分秒之間嘅事（當然如陸運庭睇相）。但核電厰仍唔知點收科…！點樣節能及揾安全能源成為熱題。

袋鼠聯邦政府為全國節能都做咗啲嘢。

1）慳電膽。唔駛益煲呔親家。全國（係！全國）每一個家庭，都免費（！）將全屋舊燈膽換成慳電膽。方法如下：

其一。喺各區商場派發，只要出示駕駛執照，上有地址，就可領取（唔記得數量）。即刻記入電腦，唔比人可以double dip。

其二。係咁嘅：

Knock knock！有人敲我門。開門。〝我係聯邦政府authorized dealer，我而家幫你換晒全屋所有燈膽。好嗎？〞我梗話OK, you are welcomed！佢幾個人入屋，將所有鎢絲燈全部換成慳電膽。之後用空盒點數，將數量填上表格，我哋都要簽名作實。佢哋就可以向袋鼠政府攞番錢。

以上故事發生喺兩、三年前。後來有人話呢啲慳電膽有水银，並不如所講咁綠色。不過慳電膽果然矜用，用到而家都只係燒咗三、兩個啫。

2）屋頂隔熱。呢單嘢發生喺去年，聯邦政府免費幫全國房屋（起居部份）安裝屋頂隔熱，如鋁薄及隔熟棉。我就唔合格，因起屋時，我間屋已裝咗隔熱，所以益唔到我。

但因需求太大，唔夠技術工人，有承造商博懵聘請唔合格工人，以致安裝鋁薄時，搞到短路走電。政府要比錢將唔合格嘅工程拆卸重裝。更有一個工人喺屋頂（唔係瓦面，而係ceiling同瓦面中嘅空間，你話幾熱！）中暑而死。主事部長亦因此下台。公道講，多數係OK嘅。

3）太陽能熱水器。袋鼠國民多數裝一個成兩米高嘅熱水heater擺係屋外，有用電，有用煤氣，成日煲住幾十公升水備用，你話幾浪費能源。聯邦政府資助國民安裝屋頂太陽能熱水器。操作係咁嘅，首先將水喉水引上屋頂，水流入太陽能熱水器，利用傳熱三種方法（記唔記得邊三種？），將水喉水加熱，再將已加熱嘅水引番落heater，咁煲水時間就短咗，就達到慳氣或慳電效果喇！

4）太陽能發電板。聯邦政府資助國民購買安裝太陽能發電板，亦即成為小小發電個體户。所生產嘅電，即時輸入電網，賣番比電力公司。有咪錶記錄住所生產出嘅電量。季尾抄錶，你用嘅電，減你生產出嘅電，咁你咪交少咗電費咯！而生產電嘅方法係太陽能，咁綠色到痺喇！

Hang on，咪高興住，產電時確係無污染，但聽講製造太陽能發電板則係非常污染環境嘅工業。咁太陽能板邊度製造？………？你估啱咗，made in China。即係，我吸嘅清新空氣，遙遠的他（們）卻為此付出代價……。點樣平衡呢？木宰羊。

我哋都喺向北嘅屋頂安裝咗8塊太陽能發電板（參看照片），至於發到幾多電，慳到幾多錢，遲吓話過你知。

蝦女將一段羊咩博士牛一宴短片放上面書，片中睇到戴高帽，執得個look好專業嘅總厨，就係温總禮光是也。唔好睇佢外表粗豪，其實內裡温柔，斯文到極。佢最緊張九樓啲波檯，成日修修補補，冼灰上油。佢亦十分緊張佢嘅波板，海綿，膠貼，一絲不苟。正係呢種性格，造就今日成績。你叫佢教波，永冇托手掙。我嘅左推右攻，就係師承於佢。相信九樓好多人都比佢指點過。不如又講吓佢嘅故仔，邊個見到佢，講番比佢聽，睇吓佢自已又記唔記得，又check吓我有冇講錯。

正如好多細路仔一樣，暑假時會做暑期工，細佬仔會去茶樓賣點心。我喺小學時都做過。有一次，溫禮先孭住點心盤，行過一個茶客背後，佢大嗌「义…燒…包…！」，嚇到個茶客飛起，擰轉頭對溫禮光講：「嘩！細路，乜你把聲咁大，嚇得我吖。」故事雖然簡單，係佢親口同我講嘅，都係生活嘅一鱗半爪。佢把聲真係好響架！

雅健乒乓球比賽，我代表國術組迎戰乒乓球組何顯威。三局两勝。我居然用左推右攻，推死咗啊威，贏咗一局。須知啊威係乒球組高手，當時佢錯愕嘅表情，我仍然記得。溫禮光即拉埋佢一邊教路，之後點？梗係大比數輸番啦！

我哋最初叫佢做骷髏頭，大大吓，佢要改變形象，要人唔好叫佢骷髏頭，叫佢啊光。我哋呢班友邊會咁順灘，當然專登叫佢骷髏頭啦！但佢好好嘢，當我專登咁叫佢時，佢對住你扁嘴懵眼，表示不高興；我叫番佢做啊光時，佢即刻用個誇張嘅笑面，表示我高興你咁叫我。好快，佢就搣甩咗個名喇！我哋都叫佢啊光。佢呢份堅持，我要耍冧。不過我哋呢班百厭星，有時都收唔到口。

我話我係數字白痴係冇錯嘅，要更正。翀翀畢業禮係五月十七，啊珊會係該日之前返雪梨。

我有段短片放咗上面書，有興趣者可上去睇吓。

相片1，我家屋頂 8塊太陽能板

相片2，將太陽能轉換成電

相片3，記錄電量度數

再噏過

嚤囉

2011.04.03 噏乜嘢本土，噏乜嘢行動；蒼蠅嗡嗡嗡

2011.04.03

噏乜嘢本土，噏乜嘢行動；蒼蠅嗡嗡嗡

曾蔭權同佢三司十二局領導班子應該去賣洗頭水廣告，不過唔知邊隻洗頭水有強勁止痕配方？最低工資立法，以為惠及工人，點知法案唔清唔楚，左中右勞工團体紛紛上街。小老闆人人自危，恐墮法網。連派錢，以為掂硬，點知有錢、冇錢、大人、細路、新移民、本土行動……都用唔同理由話你唔掂。重有教育、醫療、房屋、官商勾結……you name it。死未！特區政府，whatever he touches breaks.

交流一吓袋鼠國薪酬制度係點嘅。

喺有最低時薪（約＄15），最低周薪（約560），17歲以下又少啲（約＄10時薪），在職訓練又唔同（trainee 約＄11）。又因應各行業、工種不同，收嘅薪水亦有異，即所謂Award wages。每個工種嘅工作範圍亦有清晰界定。

周薪嘅，每日工作時數亦有規定，做多咗就要補水，工半？双半？視乎時間長短。每日幾時有tea break 及meal break，時間幾長，均有規定，不過係冇錢嘅！有薪休息日及假期點計法，勞資双方都知得一清二楚。邊有政府叫工人同老闆自己傾掂佢，勢力懸殊，點傾？要傾，就喺立法層面去傾，立法後大家就照做。至於靈活走盞位，大家自然會四四六六自己再拆掂，毋需官僚粗心。

講到派錢，你問我，我梗贊成。而家我唔講派錢啱唔啱，講吓有個叫「本土行動」嘅物體，如果佢哋呢啲對新移民嘅言論及行為發生喺袋鼠國，咁就叫歧視甚或racism。你話Pauline Hanson（寶琳韓森）係racist，佢喺澳洲絕對唔敢講呢啲嘢！

我有一定情度同情特區政府，試間世界上有邊個政府喺議會裹面全無（係全無）支持，所有（係所有）政黨及議員均以反對，糟質、留難政府為賣點，只係程度不同而已；而個政府都唔駛落台？你叫個政府點做嘢？

民選政府喺議會有大多數支持，施政得以實行。任期滿時埋單計數，得民心者留，否則就出局，冇得留低，十分公道者。

當奴，你真慘！不過條路係你自己揀嘅。

你咁叻，你有咩好提議吖！（鬍鬚曾話）

我……？木宰羊。

話吓家常。

廿五年啦！翀翀剛過生日，两張五。信不信由你，四分一世紀！時間過得真快，重記得佢喺產房抱出嚟個樣。佢呢個月廿七號行畢業禮，（咦！4月27日，黃花崗起義100週年）。啊珊要返澳洲出席。而稍後，翀翀會同Ivy返香港，到時佢哋三個會唔會一齊返香港呢？

翀翀喺SBS電台幕後幕前兩棲，佢似乎好鍾意呢份工，呢個月過咗試用期，正式係permanent staff啦！

至於澄澄，自從佢攞咗車牌後，佢連我架車都攞埋，而家自由得很，可以四圍去，我哋都自由啲，因為唔駛接送喇！佢十分勤力返教會，又有小組，又做義工，都唔錯喇！

我……？繼續工作，揾下一個trip嘅盤川。

重有，我做宅男又多個條件啦，就係有面書account。我已將我以色列、約旦及倫敦、古巴遊各二百張相放在面書上，並附說明, 請欣賞。

林仔，你都去過以色列，睇下相，又勾起啲乜嘢回憶呢？

好多謝嘉敏喺面書比意見我，我同澄澄講起，佢都話冇人喺面書咁長氣啫。佢話未用過面書blog，可能要加個乜嘢applicator（？），等佢搞嘞。

再噏過

嚤囉

2011.03.27 邊啲係亂嗡，乜嘢屬秘芨，看官自己執。

2011.03.27

邊啲係亂噏，乜嘢屬秘芨，看官自己執。

柯拿，大家好，

〝人民，只人民，才是創造歷史的動力！〞

今日澳洲新南威爾斯州人民要上街，要推翻呢個執政咗十幾年嘅工黨政府。

唔理係執政黨，抑或係反對黨，每日都要接受人民批評監督，冇得河蟹！推翻政府，三幾年就要做一次。記住，推翻政府，唔等如唔愛國。而且係國民義務，如果唔參加，可被罰款50袋鼠幣。

今日係新南威爾斯州大選嘅日子，截至臨瞓前，點咗八成選票，執政工黨政府今屈輸硬，冇得留低。在野反對黨（自由黨、國家黨聯盟）已穩取66席，工黨只得16席，其他獨立小黨有3席。重有10席未分勝負，不過已無關重要嘞。

翀翀澄澄都係新州青年自由黨員Young Liberals，今日當然有去票站做嘢。本來想去探佢哋班，點知我收舖時，佢哋已當完更。佢哋今晚要慶功，可能要好夜至返。今晚又係剩番我一枝公喺屋企啦！

上次我話﹕日本侵華？講笑咩？而家有啲動搖，因我諗起一段歷史。

話說甲午海戰前，大清北洋水師實力係世界十強內（以艦艇噸位計）。此時朝鮮爆發東學黨之亂，引起清日冲突。日本仔十五、十六，唔知夠唔夠打。一次，有機會見到大清水師。發覺定遠號上面嘅德國製12吋口徑大炮之間綁住一條條繩，掛有不同顏色、不同形狀嘅布旗。點解萬國旗要掛喺大炮呢？睇真啲，原來係水師兵勇晾緊衫！於是日本仔就放膽去迎戰甲午風雲喇！（咦，同群姐講嘅故仔好相似喎。）結果，北洋水師全軍覆沒就大家都知喇。

咁，此時此刻大唐子弟兵，導彈、核武、飛機大炮配備精良，令極右黐筋浪人雖有歪念都唔敢嚟真。但當佢知道大唐子民咁容易聽信流言，近有搶鹽、豉油、奶粉。遠有搶黃豆、板南根、醋。每年春運、黄金周，搶飛，爬窗搶位等等。呢個民族中，有咁大批全無公德，咁容易自亂陣腳嘅成員。黐筋浪人會唔會因此起歪心呢？

講起信鹽可以防輻射，醋可以防非典（即係沙士）。一向都係咁嘅啦，有乜出奇啫。你睇吓壹仔，搣脂可減肥，遠紅外綫牀能醫百病﹔海底泥美容、古法豐胸﹔塔羅牌、密宗大師、風水轉運……等等，耍乜有乜，信乜有乜，重話呢啲係科學。咁，點解淨係話信食鹽防輻射嘅人冇知識？五十步、一百步啫！

再講商舖囤積鹽、坐地起價呢單嘢，公道啲好喎。一向都係咁嘅啦，有乜出奇啫。你睇本港五大家族，壟斷地皮，將居所炒成天價。呢啲係市場機制，鹽賣幾錢，亦因應供求，同樓宇尺價點賣，並無分別。咁，點解淨係鬧賣鹽嘅人冇良心？五十步，一百步啫！

實在呢啲行為，一向都係咁做嘅啦……！

點解舊時唔多覺，而家又咁多人攞嚟講？

就係呢隻地牛翻身後，見到有人嘅表現可以咁唔同，對比一下……

最衰都係呢隻牛。

再噏過

嚤囉

2011.03.20 四圍亂咁噏，搶鹽何太急

柯拿，大家好，

呢個禮拜同個客講起日本地震，佢問我中國人會唔會因為被日本仔侵略過，而覺得佢哋今次真係應有此報？我對佢講，有啲上一代嘅人，可能會咁認為。而我自己就絕對唔會咁諗，終歸都係同呢代人無關。而我下一代更加唔會咁諗。返屋企後，我又問吓澄澄，佢哋呢一代又點睇。佢話佢班朋友絕對唔會認為受災嘅人係抵死。

睇過電郵，先知有啲睇法係咁唔同。

網上言論，同喺茶餐廳，大隻廣猛噴口水發表嘅偉論並無兩樣。大家鬥講，正正係口同鼻拗。網上資料，我要過濾先。

驚日本發展核武，都係驚日本皇軍再搞大東亞共榮。不過，我唔信會發生呢啲事。第一，日本用工業、經濟力量，已得到唔少嘢，駛乜飛機大炮。第二，如果真係有極右黐筋政府想再攪甲午海戰、九一八、七七等，到時，你認為邊個死會似啲！今時今日嘅偉大唐山，我唔相信有邊個國家有心有力去吞噬。睇嚟，日本皇軍驚人民子弟兵多啲。侵華？講笑咩？

咁你信晒呢個櫻花政府啦。梗係唔會。正正係所有政府（包括英美加澳紐）都信唔過，至需要有較好嘅機制去監察、去制衡，唔比佢哋去濫權。開放嘅社會令又民更加聰明，唔係你話乜嘢神道教、忠君愛國就可以控制人民嘅思想。唔好睇少自由意志嘅威力。

今晚同澄澄、翀翀Ivy去食晚飯，Ivy話佢接觸到嘅老人家（多數來自香港），好多認為呢啲係報應。唔奢望可改變呢班老人家嘅觀念、畢竟佢哋係親身受難嘅一群。但如果我哋呢一代人都係咁嘅思維……！

彬彬有禮嘅背後會包藏禍心﹔搶麥記玩具、搶家鄉雞公仔，而家連鹽都搶，睇嚟都應該係率直真性情嘅表現而已。適者生存，搶得到，自然優等。

民族問題，噏住咁多！

嚤囉

2011.03.07 真係唔係講笑

柯拿，

大家講得咁熱鬧，我又講埋一份。

人，當然有優劣之分，林過雲Vs德蘭修女，優劣立見。但係唔係可以用種族來分野優劣？哎……真係唔識講。不如唔講人，講吓禽獸！

一大群紅鶴flamingo企喺小島，一隻大麻鷹飛下，抓住其中一隻紅鶴，就食起來。其他紅鶴若無其事，繼續生活。因為每隻鶴都知，邊隻走去做英雄，邊隻就要死。你會話，你有咁大棚鶴，一齊去同隻鷹砌過，唔一定會輸。事實係，呢樣嘢係唔會發生，因為鶴嘅數量多，麻鷹點食都唔會影響鶴群嘅生存。怯懦嘅性格，反而有助生存！非洲草原上嘅岭羊，情形亦係一樣，你有冇見過岭羊組織起來，反抗獅子或獵豹嘅暴行？

澳洲有一種雀仔叫indian minor，我屋企附近好多。佢哋只係大隻過痲雀啲啲，但係好鬼惡，成日聯群結隊去追趕啲比佢哋大幾倍嘅大鳥。例如啲大烏鴉、大喜鵲等，成日比佢哋追得落荒而逃。佢哋非常勇敢，一隻上去打、第二隻跟住，第三…，隻隻唔怕死！勇敢嘅性格令佢哋得到生存嘅空間。非洲草原上嘅土狼，情形亦一樣，佢哋成群一齊，可以將獅子趕走！

咁究竟怯懦Vs敢，邊樣優啲，邊樣劣啲？

各位，以下呢個問題，你只需要老實回答自已即可。

如果你位公子、公主或至愛要到神洲一行，佢問你，路上見到老婦仆低，我應該扶起佢嗎？見佢受咗傷，應該送佢去醫院嗎？如我揸緊車，路上有人有緊急事故，我應該幫吓手嗎？

孟子四瑞章話「人皆有不忍人之心，今人乍見孺子將入於井…」，重話，呢四端係人皆有之。即係話幫人，係本能！

但如果帮人、替人講公道說話，係好心冇好報，甚至會惹禍，久而久之，邊個重會屎上身呢？以普羅百姓嚟講，咁只係生存之道啫（好似flamingo）。當多數人都「各家自掃」、「河水井水」，並被奉為「識時務」、「顧大體」！咁呢個民族係優係劣呢？又係乜嘢將「惻忍、羞惡、是非、辭讓之心」隱去呢？再對照喺人類大災難時，亦能彬彬有禮、秩序井然、守望相助…，又可以講乜嘢呢？

喺袋鼠國，上巴士、入電挮，男士都會比女士入先，係norm，係禮貌。但佢知，雖然包尾，都係有得上。此等gentlemen，如到訪東方，現實會教訓佢，成日比人上，自己就唔駛返屋企喇！

我亦話比住喺袋鼠國嘅同胞知，記住呢度係澳洲，毋需爭先恐後。大家黄口黄面，佢唔合社會期望，我亦受損。

當排隊永遠上唔到車，你會唔會打尖？

當要暴力至有得食，你會唔會斯文？

當講真話會受罰，你會唔會講大話？

當幫人出頭求公道會坐監，你會唔會縮理好過？

當殺人放火金腰帶，修橋補路冇屍骸，你……

唔好講一個民族優或劣，generalization一定錯！

不如講一個民族嘅普遍行為，

我想問吓，究竟乜嘢塑造一個民族嘅普遍行為？政府？人民自己又有冇責任？

木宰羊

嚤囉

2011.02.13 左行右企電梯級，海德公園任人噏

2011.02.13

左行右企電梯級，海德公園任人噏

倫敦塔橋

柯拿，大家好,

返咗屋企又已個幾禮拜，人愈大時間過得愈快。記得去年七、八月間，喺呢度話比大家知我嘅古巴之旅嘅構想，而家已成過去式。完全明白乜嘢叫做「恍如昨日」。好開心馬仔賢伉儷，咩博等組織bbq，使我同老友們有一曰十分愉快嘅時光，同時又認識好多新老友，無言感激。

開心見到Ｋ仔，bbq日由頭踩到尾，重飲埋下午茶，偶爾被睡公主召見，亦人之常情。Ｋ仔，keep it up！

遺憾嘅係，未能於38年後重上鳳凰山。不過，重有機會。horse宜保重馬體，我哋有計劃今年秋季去雲南、西藏，馬仔請組識登山隊，到時香港見。其二，未能完成紅歌鬥唱之願，今次返港，認識勁人數名，乜嘢舊歌都可隨口噏出，希望有機會可jam吓歌。啊蚊，係你嘅責任組織一下咯喂！其三、見唔到安哥大師，未能同豬朋狗友食焗魚腸歎藍妹，實憾事也！

鬼佬話life is too short to wait，孔子都話人生苦短，有乜願望，go for it，快啲行動，有時等唔到咁多！星期五晚收工返屋企，打開電視，睇到日本大地震引發超級海嘯，邊個知道，有啲仙台人民前一分鐘前重睇緊叮噹、大雄同靜兒，後一分鐘就見到黑澤明！大科學家重話，呢次地震撕開板塊，使以後地震、海嘯變得更頻繁…..！真大劑！

上世紀，偉大領袖教導人民﹕「人定勝天」、「與天鬥、與地鬥，其樂無窮」。大佬，人點勝天？而家兩塊板塊係咁意上下郁兩郁，就搞到你啲「人」雞毛鴨血。大自然用幾分鐘時間，人類窮千百年累積嘅文化、歷史、文明即可化為烏有，生靈塗炭，點樣「其樂無窮」呢又？而家都係講緊個「地」咋！個「天」一定重勁。恐龍點解瓜晒，有辦睇喇！你點同佢鬥？我哋只能keep our fingers crossed. 同埋樂觀咁開心過每一天！就係喇！

唔講啲咁嘢喇！

都係時間總結吓我呢個trip。

我喺倫敦有三個整天，最開心當然係能與大羅見面，係三十年冇見喎！大羅重請我食餐勁！喂，大羅，快啲過嚟袋鼠國，一齊食澳洲龍蝦咯！rock oyster都好正！二羅、三羅呢？幾時嚟呀？

倫敦比我印象係﹕

friendly。

交通friendly，地鐵四通八達，十分方便。Oyster card，似足八達通。搭地鐵，難唔到香港人。

人friendly，問路，問乜嘢都可謂全無難度，人亦十分友善。

環境friendly，唔係講綠色，而係路牌、指示、其他配套等，都係用英文，我係覺得非常方便也。

倫敦忙碌而有序，我成日於繁忙時間喺地下鐵貢來貢去，行人電梯都係右企左行，同香港一樣。行人嘅步伐並唔慢過香港，有忙碌大都會風範。

有幾樣嘢我印象好深﹕

多元文化。你喺街上見到紅黄藍白黑諸色人等，有司機、清潔工、小店老闆甚至有黑色御林軍。小帽大鬍子、包頭包髻、由頭冚到腳burker 通街都係。我住喺雪梨，我能體會多元文化。倫敦比雪梨更甚！當然，呢個係富争論性嘅題目，今日不論。

一日，我喺地鐵車廂內，成車密質質滿晒人，但係靜到你聽到自己嘅呼吸聲，同鬧哄哄嘅中華文化有天壤之別。又一日，有波打，又係喺地鐵，一眾粉絲，扮鬼扮馬，穿紅著綠，嘈到拆天，不過，又唔會覺得騷擾喎。靜若處子，動若脫兔，係咪咁呢？

喺馬路上，點分倫敦人vs外來人？我觀察，過馬路時，倫敦人唔會睇紅公仔，冇車就行，外來人（炎黄子孫除外），就會跟燈號。

一日，我專登去海德公園嘅speakers’ corner, 感受吓言論自由，我唔知呢個傳统始於何時。當權者有胸襟、有信心任人民發表言論。啱聽唔啱聽都任講，實令人羨慕，尤其來自極權之邦嘅人。子曰（乜子？）﹕「防民之口，猶如防川」。古有名訓喇！點解講英文嘅明白，而講中文嘅，反而有語言障碍？中華大地幾時有「海南公園」及、或「承德公園」？如有，家祭毋忘告乃翁喇（希望可以趕得切喺世界末日之前……太悲觀喇？！）。

只得三日，就算齋睇倫敦都嫌太短，遑論英倫三島，相信我會再嚟，用多啲時間遊多啲地方，幾時呢？

下次講古巴。

再噏過

嚤囉

2011/01/30 辛卯唐人叫bunny，不漏洞拉噏kitty

2011/01/30

辛卯唐人叫bunny，不漏洞拉噏kitty

香港、越南司儀，越南華齊賀新歲

柯拿，大家好，

上個星期六、日、一（22-24號），參加咗中大澳洲同學會嘅三日坎培拉家庭營。唔係乜嘢特別好玩嘅地方，不過，大家一齊無拘無束、吃喝玩樂三日，都好relax嘅！幾畤EPAS舊生會又搞番個N日家庭營，大家扶老攜幼，玩佢一個不亦樂乎呢？不過要預埋我至好！

每到如中秋及新年，都係啊翀仔揾外快（Ａ＄）嘅季節，今年亦唔例外。呢幾個週末，一啲多亞洲人住嘅地區嘅市議會Local Councils都會舉辦中國新年嘉年華會。多數喺該小區嘅唐人街，封咗條馬路，擺上各類形特色攤檔，如特色小食、工藝。以及消防，警察、NGO服務機構都會擺檔，宣傳一吓功績。街嘅中間會擺一表演台，表演節目就由早到晚不停進行。有專業收＄表演團體、有附近學校學生表演歌舞音樂、有附近中國酒樓派嚟厨神，即席開火揭示烹飪秘技。……。

醒目仔女一睇，咦，係商機嚟噃！啱晒！所以就有中介人公司負責。每年市議會撥出經費，中介人公司就睇餸食飯，聯絡要比＄嘅同埋唔駛此＄嘅團體。亦揾贊助班水，例如某地產代理贊助結尾嗰個烟花匯演，某電台贊助音响…等。總之大有大做、cheap有cheap做。

不過無論點做，都要有一個（多個）MC，佢唔止係司儀，重要組織成個演出程序，似stage manager多啲。有畤節目與節目間有大空隙（如，有團體甩底，遲到），佢就要表挏督笑，又或高歌一曲嚟〝攝〞場。唔止個腦要轉得快，重要多語言。英文、廣東話、華語Bi Li Ba La炒埋一堆，都唔係易搞！好似今日，啊翀仔係越南埠Cabramatta做MC，就要配多一個講越南話嘅司儀嘞！上星期佢係雪梨華埠做，就淨講中英文就搞掂嘞！唔怕忙，最緊要有收入。

拉開講一筆。我哋叫Chinese New Year, 但政治正确啲就會叫Lunar New Year。又係嘅，越南人、泰國人過新年，唔會掛住個Chinese嘅名，又係啱嘅！所以喺華埠就叫中國新年，喺越南埠就叫農曆新年喇！

唔講你唔知，今年喺中國嘅兔年，不過係越南人嘅貓年。信不信由你。

下週今日，我已身在倫敦。氣温2-8度！希望有陽光。Ｋ仔可唔可以報吓當地天氣過我知呢？

大羅，我來也！

再噏過。

嚤囉