又玩雪板 snowboarding，好過癮
Mates:
由七月十二日至八月一日
今次係我第一次用中文寫嘅博客，以前唔用並唔係因為我英文好叻，啱啱相反，找啲英文只係有限公司而已，呢個係有目共睹嘅，事實係當初我唸起要寫博客係因為我要做背囊友去中東，我一來要揾個方同屋企聯絡，二來都想喺旅途上留底紀錄。但我又唔識用中文輸入法，唯有用英文啦！咁樣比較方便一啲。到咗我中東旅行後返番屋企，我都繼續用英文寫，係因為我想喺我仲記得啲嘢嘅時候，寫一啲我嘅過去，同發生過喺我身上嘅事，一來當我有一日老人癡呆嘅話都可以幫吓啩，二來我啲仔女都可以因此而對我嘅歷史有多啲認識，啊仔睇中文就完全冇問題，但係啊妹妹就好有問題，所以我繼續用英文寫。不過正如啊珊話：用英文係好難將你嘅內心完全表達出嚟，而且時間亦用得較長。至於比妹妹亦可以睇呢樣野，我係可以同佢一齊睇嘅；而且佢啊哥都可以話佢知啫！
對上一次嘅博客係喺雪山上寫嘅，再對上一個已經係喺五月時寫嘅。有興趣嘅老友可以睇番嘅。
今次雪山之旅都可謂成功，一來, 我係未試過連績四日滑雪，第二係對滑雪板snowboarding技術嘅掌握有好大嘅進步，我非常開心。
旅程係喺七月十二日星期一嘅中午由雪梨出發，中途又要喺坎培拉停車食晚飯，又要停雪山下一個叫Cooma嘅小鎮去租雪具。去到賓館時，已是瞓覺時份啦！
第二朝一早起身，食完旱餐就撘旅遊車上雪場，一路上領隊不停咁話﹕雪場最近冇乜雪。好似想話過你知，唔好玩唔關佢事喎！呢條友仔吖！（喺對上嗰個博客, 可以睇番嘅）上到雪場一睇，雪係唔多，不過對我嚟講，已經夠玩。不過細佬仔又或者初學嘅人就慘啲，因為較低嘅地方係冇乜雪。呢一日我滑得非常過癮，雖然攰啲，但係可以温習番舊年嘅技術。
第三日搭車上雪山時落起大雨，需知道落雨滑雪係最慘嘅。因為佢攪到你成身由面濕到底，非常辛苦。車停咗後，一落車，原來係雪，係落緊大大雪而唔係雨，咁就正到無倫啦，老友！終於呢一日喺雪山係冇停過雪；而且係好大好大嗰隻。你會問，咁咪好辛苦？你如果試過落雪時滑雪，你就會知啱啱相反，如果温度夠低，而你件雪樓雪褲又夠防水嘅話，係冇問題嘅。呢晚我返番旅館時，全身係乾嘅。
第四日撘車上雪埸嘅時侯，車行得好慢，當過咗國家公園收費站後，先知道原因。原來一晚大雪，攪到成條公路積咗雪，根據規例：如果唔係四輪驅動嘅車，都要喺驅動輪driving wheels上裝雪鍊，以防冼軚。發生危險，咁就大鑊啦。雖然落咗一晚雪，早上雪停後就非常好天，非常好太陽。咁嘅天氣就最正啦！夠凍，好天，雪又多又夠軟；不過好大風。好彩我件雪褸雪褲夠勁，所以乜嘢問題都冇。
呢日係第四日上雪場，又係行程嘅第五日，滑雪滑到下晝兩點就要收檔啦！經過咗三日嘅自我訓練後，技術當然大有長進啦！呢日天氣晴朗到不得了。太陽猛到飛起，因為夠凍嘅關係，所以雪地仍然好正，滑雪係完全正斗嘅！不過因為日頭好猛，滑緊嘅時候就覺得熱，甚至出晒汗。講到表現囉喎，今日係最正嘅。我甚至可以跳起噃，當然著地仍然有啲問題。經常ＰＫ喺雪地上並唔係少見啫，但係我都非常滿意自己嘅表現！
四日喺雪場有四種唔同嘅天氣，都幾得意嘅呢！
呢四日喺雪場上，徐咗第一日攰到抽筋（因為隔咗成年，當然要啲時問去適應番嘅），中午要停一停食晏嚟補充體力外，其餘三日都係由頭滑到尾，中間並冇午餐時間，只係有兩、三次停低食吓朱古力。連去厠所都冇！！就咁由朝早到下晝四點幾來往於吊車站之間，十分過足癮！
喂，老友，咁又五日啦。愉快嘅時間過得特別快。收拾好行李同埋心情番歸，又預備聽日繁忙嘅工作日啦。冇偈啦，你要玩就要＄，要＄就要做嘢啦喂。
我星期五由雪山返來，番到屋企已經係夜晚十二點啦。
當我喺雪山嘅時候，啊珊已經決定喺星期日（七月十八)返香港幫佢啊爸處理啲家事等等。當日我車佢去機場，辦理登機後，入閘，佢一個人又踏上征途嘞！
由佢飛香港嗰日到今日（八月一號）屋企平靜如水﹕我﹕早上去gym, 之後落去鋪頭開工; 收工返歸叮飯, 當然有餸又有菜食。睇吓電視, 又一日啦！
星期一, 我要去學西文, 所以妹妹要自己攪掂晚飯。
星期二, 妹妹有補習學生嚟, 所以六點前我會番到屋企。但係晚餐佢要自己攪掂。
星期三, 如無意外我可以同妹妹食飯, 但係多數佢都會同啊Chris出街, 又係一枝公食飯啦！
星期四, 晚上妹妹又有補習學生, 所以佢又要自己食晚飯先。到我番到屋企嘅時候, 佢多數都已經補緊習嘞。我又要靜雞雞咁叮飯比自己囉。
星期五, 通常我會打電話循例問吓妹妹喺唔喺屋企食飯, 佢多數都話同啊Chris出街喎。好似呢個星期五, 佢哋就去咗退伍軍人俱樂部食餐啦。
星期六, 我會早啲放工返屋企, 今次唔使問嘞, 我返歸之前, 妹妹已經返咗教會, 而且會好夜至返。我當然會同佢保持聯絡啦！
星期日, 肯定晏起身, 大約九點啦。食完早餐, 洗吓衫, 晾吓衫, 攪呢攪咯, 又到下午, 唔知做咗啲乜, 又到晚餐時問。翀翀本週較忙碌, 冇約飯局。
咁又一週嘞！
周而復始, 萬象更生。新嘅一週又嚟啦。
星期一, 我要去學西文………..
………………………………….
努力工作, 揾銀去旅行！
差啲唔記得咗添, 上星期六我參加咗中大澳洲校友會嘅週年會員大會, 喺大哥成嘅大都會酒家舉行。睇嚟都有百幾人出席嘅; 主題係七味人生（有冇記錯呢？）。喺我嚟講,最重點嘅當然係會長嘅會務報告。今次郭會長因事唔可以出席現真身作會務報告，但係採用數碼科技預先製作影音片段喺大會中播放。呢樣嘢亦都係幾得意！當然其他人嘅發言亦好有份量嘅。今次幹事會只有八人, 仲差一個人先至夠九個。 喺大會中亦無人加入, 即係話呢個係一個小相公幹事會。不過開講都有話﹕唔理大相公抑話小相公, 食得糊嘅就係好相公！喺呢度預祝幹事會來年事事順境, 想嗰樣有嗰樣。
跟住就係食餐勁嘅時候嘞, 又有走地雞等佳肴。酒過三巡, 又係暫別嘅時候嘞。在此好多謝巫馬田, 佢不辭勞苦接送我, 等我有機會坐吓靚賓士, 無言感激！
拜！
No comments:
Post a Comment