2010.09.22 噏13噏09，一年一度又中秋 -- 從13樓到9樓

2010.09.22  

噏13噏09，一年一度又中秋 -- 從13樓到9樓

左面後面街就係13樓

柯拿，大家好，

我又嚟啦！

啊蚊講起13樓，話要参加青樂同學會，咁又勾起我嘅童年回憶。我都上過13樓，係喺我小學五年班（六年班？總之係五月風暴後嘅事，啊咩應該已入讀士丹利大學！），係我一個叫盧業成嘅小學同學帶我上去嘅（佢家姐係青樂嘅），我唔記得上過幾多次，亦唔記得有過乜嘢活動。但係有一個場景，我記得好清楚。係咁嘅﹕

盧業成同我上到13樓，見一個姐姐，廿歲左右喇。我哋圍坐傾偈﹔喺另一個角落，有一個人食緊即食麵（邊個記得嗰時國產即食麵叫做乜嘢名？呢，湯包裹面仲有磨菇嘅！），邊位？老陳！我第一次見老陳就係呢個埸景，連同嗰種國產即食麵嘅味道，唔知點解，至今難忘！大姐姐當然問吓我哋返學嘅情況，我記得我咁樣講，我話：「我最憎啲人講埋啲得罪我哋偉大領袖毛主席嘅說話！」我唔記得點解我會咁講，但係我的確係咁講過。咁唔出奇嘅，我自小已經喺魚職同埋小販工會出沒，開口埋口講呢啲說話唔係出奇。

三羅同Ｋ仔認為上13樓會鍛煉身體，咁就係誤會咗以為好似9樓咁要撑樓梯。實情係13樓係喺駱克道消防局後門隔離嗰座大厦。係有電梯上落，裹面有拉閘嗰隻（我有冇記錯？）。

我有呢段回憶，有冇資格成為同學會會員呢又？

今日中秋節，蔣家一家四口分開四處地方，都好喇，千里共嬋娟嘛！

於此人月團圓之日，恭賀羊咩榮升山羊博士。講起羊咩，我好難唔記起呢個埸景﹕就係啊咩著住十分鬆身嘅白色鵝仔牌背心，冇肚腩嘅腰但係腰圍尺碼大嘅短褲，喺九樓個廚房煮緊飯比我哋一齊食。我食完飯就去餸欄中學返學。臨行前必學李玉和唱（國語）﹕「臨行喝咩一碗湯，渾身無膽，戇居…..居！」。

俱往矣，數風流人物還看今朝！

唔好講咁多，祝大家：開開心心喫月餅，快快樂樂過中秋！