2010-12-19 開口鞋，猛噏hungry; 袋鼠婦，大叫honey

2010-12-19

開口鞋，猛噏hungry; 袋鼠婦，大叫honey

咁多鞋要補，收鋪都完唔到

柯拿，大家好，

好咯，成半年嘞，啊珊今天早上已返到雪梨喇。因為個helper重遊緊日本，所以接完啊珊同夏澄，我重要返工。啊Christ又話要同我一齊去機場接夏澄機喎。

多謝馬仔拉埋馬車，送佢哋機場，你知啦，鍾意買嘢吖嘛！如果冇馬仔拉馬車，都幾leir hair也。鄭少又百忙抽空，會面傾吓偈。喂，幾時到我？簡珠又拋低千億生意陪伴左右。各位嘅濃情美意，銘記心中！

經過五年大學，世翀終於畢業喇。好彩重即刻揾到工，而家已經返緊工。佢喺SBS（Special Broadcast Service）做Programme Director. SBS係聯邦政府廣播機構（類似港台），有自己嘅電視，同收音機頻度。而收音機要走向數碼化，所以開多幾個頻度。而世翀讀緊書時已喺SBS電台開咪（parttime嚟嘅，而家重一路開緊咪），所以對申請呢份工係有一定著數也！返咗工冇耐，佢認為呢份工so far都好啱佢，都好有挑戰咁話！我就祝佢開工大吉、一帆風順、步步高昇…..咁話啦！

如想聽吓世翀把聲，請上youtube ，鍵入saichung1，就OK。（廣告）

接近耶，平安之歌高唱，唔好講三鹿奶，豆腐渣等食物，又或鴿子頒獎儀式啲咁沉重嘅問題（遲吓先）。軟性啲，講吓文化差異。

我初到袋鼠國就發現呢個分別，唐人打招呼係點頭，Aussie係擰頭，但唔係兩頭擰，而只係快速咁擰向一便，一路笑笑口咁講how’s going， mate? 其他，鬼（英、美、加…）又係點呢？

有〝人〞嚟小號配鎖匙，我唔駛一分鐘就搞掂。承惠6個袋鼠幣。嘩！唔駛一分鐘，你咪好發達，平啲得唔得！………？如果係袋鼠，佢會話，Wow ,you’re a legend. It’s service. Keep the change.

有人攞隻開口鞋嚟，佢會話，你睇我隻鞋好肚餓, my shoe is hungry. 如果袋鼠，就會咁講，my shoe is talking to me. 可能Aussie從來冇諗過擘大個口係hungry。

有人攞對鞋嚟話要整，我話，ok，承惠60蚊。唓！買過新重好喇，都係百零蚊啫。袋鼠就話，cheaper than buying new ones. Give it a go.

我哋唐人比較含蓄，心裡愛人愛到死死吓，口都唔肯講嗰三個字。不過啲袋鼠就愛得太過份。我喺舖頭成日比人叫sweet heart、honey、love、darling…等，可惜多數係啊婆。

喂，係唔係隻隻袋鼠都係咁嘅款呀？梗係…唔係啦！不過係我嘅一般印象也！

………

諗到多啲再噏過

嚤囉

Ps 今日放工返歸，收到馬仔電郵，內附精讀。大謎已解，恕小弟愚昧，仍有零散小謎未解者。咁喇，鳳凰山嚟個大解脫啦喂！