2010.10.31 噏噏噏，噏起鵝頸眼都濕﹔嗡嗡嗡，嗡到頭痛，耳又聾

2010.10.31

噏噏噏，噏起鵝頸眼都濕﹔嗡嗡嗡，嗡到頭痛，耳又聾

阿爸阿媽上報紙 - 搬入新街市

柯拿，大家好，

今日係哈囉喂，我成日同人講，澳洲真係一笪福地，佢冇經過大戰，地大，物產豐盛，人口又少，多數人都住喺獨立屋。我曾經去過一個Fair Dinkum Aussie（即地道澳洲人）嘅屋企，佢唔駛做嘢（病？失業？其他原因？），攞緊政府糧，類似香港嘅綜援。佢住喺一間獨立屋，兩廳三房，厨厠車房、陽台、前後花園不在話下（租係政府比嘅），車房有架舊錢七，門前有隻外舷摩打嘅４、５米長嘅鋁質船，仲有一架電單車。雖然同佢冇乜深入傾偈，從呢啲行頭，亦可猜測佢生活如何，一個攞政府援助嘅人嘅生活可以喺咁嘅！

又拉開咗，我係想講吓澳洲嘅哈囉喂。前兩三個禮拜左右，喺商場已可買到魔鬼三义，巫婆衫、帽，流血面具等物品。有啲人會買比細路備用。商店亦可買到分開小包、小包嘅糖果，朱古力啲咁嘢，我哋亦會買啲備用。

到咗晚飯後，大人會帶埋化好装嘅細路，逐家逐户去，細佬就去拍門，大人就離遠住，以免細路遇壞人。屋裹面嘅人應門前，已預備獨立包装好嘅糖果，一開門，見到血流披面，手揸三义古靈精怪嘅ｏ靚仔ｏ靚妹，即刻要交戲，扮作非常吃驚，於是皆大歡喜，跟手派糖，同佢哋遠處嘅父母揮揮手，咁又一單。然後入屋又等第二單。

多唔多呢？就視乎你住個區多唔多細路。新發展嘅，多年青夫婦嘅就多啲喇。我呢區啲細路都大喇，所以拍門嘅唔多。但係又有第二啲嘢！

喺前幾日，我喺信箱收到張嘢，係隔離屋派比左近啲屋嘅，內容話佢喺哈囉喂當晚有大party，會好嘈，而且會嘈到好夜。

點解我會寫啲咁嘢，因為而家隔離正係嘈到飛起！

我諗起當我啲細路仲係細路嘅時候，我都帶過佢哋去拍人哋門。不過而家佢哋信咗教就話唔應該搞哈囉喂喎，話同信教有出入喎？！Those were the days喇！

啊蚊話偉大啲祖國永遠是對的，我又想問吓，解放後嘅中華大哋喺我哋祖國嘅話，咁解放前嗰個又係唔係祖國呢？隋唐宋元明清、秦漢、夏商周、炎黃時期嘅大地，又係唔喺祖國呢又？祖國又點解會有對與錯呢？睇嚟，係要搞清楚祖國大地及其文化歷史、人民﹔同政府、政黨嘅相互關喺也。

啊蚊，你居然仲keep住份場刊，好犀利，可否比個copy我，一係scan咗擺上電郵，一係出年我返嚟攞，可以嗎？唔該晒先！請飲茶又點話。

老鄺頭故事愈來愈精彩。比你提起你帮國術組造嘅第一張墊，我記得喺可以對摺成兩半，裹面係籐絲，外面白色布。不過比我哋玩到黑墨墨。國術組，考吓你哋，有邊個記得屈佬、歐佬及喺呢張墊上發生過嘅「特殊訓練」？

馬仔影呢張相十分經典，樓下郵局，對面清真羊腩佬及向南洋戲院方向行個間齋舖都清晰可見。不過又有個問題（「又有問題？係唔喺呀你！」「乜你唔知我細個係問題兒童嚟嘅咩？」）問題係，呢個EPAS火炬應該唔係三羅嘅作品。點解我會咁講，呢個社徽係樂園轉雅健時設計嘅，當時有個徵集社徽設計（比賽？）活動。收集多個設計後，就作評選，當然三羅嘅設計亦喺最後入選之列，我記唔起三羅個設計係乜嘢樣，但以我認識嘅Bobin Seeker咁前衛嘅藝術家，佢絕對唔會用啲咁直接嘅設計！我好記得三羅係咁講嘅（Direct quote）「火炬可以有好多種解法……亦可以解釋為焚燒本社。」（當然係戲言啦！）如果我記錯，三羅請指正。咁，係邊個嘅設計？等我記下……係…群姐。群姐，我有冇記錯？

喺相遠處，見到「新」鵝頸街市大樓仲係地盤，各位知冇，呢間喺全港第一間街市大樓，市政局收番晒該區嘅小販攤檔，持牌嘅小販用競投方法投得裹面嘅攤檔位，熟食大牌檔亦係喺呢個情況下上樓嘅。我哋熟悉嘅係對面清真羊腩佬及「罅仔」東成。佢哋經營至今。我啊爸亦喺咁樣由街邊搬上街市大厦，個檔攤亦係由我買角鐵，再借用九樓個焊機「打造」而成。可能呢個街市唔係幾「老利」，搬入新街市冇耐，我啊爸就發現有肺癌，咁以後再唔駛買菜啦…！

Hola 人類，認真失覺晒，sorry囉，現已將貴寶號加上，請多加入chit chat行列。

又到每周一相呢個環節嘞，係一幀剪報。講開鵝頸街市，佢係報導街市正式啟用情況，相中鬼佬係人稱沙王嘅市政局主席沙理士。相中檔主就係家慈同家嚴嘞。

新張期內，再送多一張，不過要估，呢張相喺邊處影嘅呢？你又識得幾多個相中人呢？有冇佢哋嘅軼事可以噏下呢？

嚤囉