2010.11.21 我噏正體，你噏簡體；強權壓服代價貴

2010.11.21

我噏正體，你噏簡體；強權壓服代價貴

十樓大天台 - 常識問答比賽

柯拿，大家好,

開心聽到啊鳴同娉霞講佢哋喺海外嘅住活體驗，其中講到廣東話、國語，正體字（唔係繁體）同簡體字嘅問題。唔講你唔知，實在呢個問題嘅源起係8964個單事件，（又關事？）梗係喇，聽我道來。

第二度我唔知，我只講袋鼠國。喺上世紀90年代前，移居此間嘅華人以講廣東話嘅為主，如果講國語嘅話，大大多數係由台灣嚟嘅。所以你去唐人街，又或者華人團體，都係以廣東話為主。如果有人問Do you speak Chinese？ 答：識，有乜嘢幫到你？Spoken Chinese 就係廣東話！當時嘅统計，華人中，有八成左右講廣東話。

華人多數來自香港、台灣、星馬，所以所謂中文，就一定係正體字，絕唔會寫簡體。大多華人都鍾意佢哋嘅細路識寫識講中文（雖然多數都唔係好成功）。所以除咗盡量同佢地講多啲，每週六都會帶細路去中文學校。呢啲學校多數由華人團體所辦。而所用嘅教科書，有啲用香港嘅，但更多嘅係用台灣書。我對仔女就係讀台灣書嘅，不過用廣東話教。點解台灣書？因為台灣駐澳僑聯免費送書比中文學校，唔駛＄，當然個個都樂意採用！所以嗰時絕無正體vs.簡體嘅問題。

袋鼠國嘅教育及考試系统中，亦有中文，高中會考就有中文科。考生用正體中文作答當然冇問題，但為咗遷就由大陸嚟嘅學生，用簡體亦得。

呢啲就係上世紀嘅情形。

1989年夏天，全世界華人都出嚟行街，袋鼠國亦冇例外。重有意無意間行咗去大唐出使袋鼠國衙門。當時嘅工黨政府總理波比霍克，因為未見過好似廣場咁嘅大場面，佢又十分眼淺，當記者扑佢咪時，佢居然流下袋鼠淚，呢段馬尿片段喺全世界播出。同時，馬尿可能令下巴重量減輕，所以佢下巴輕輕咁講：「而家所有（！）喺澳洲嘅華人，都可獲得永久居留身份。」嘩！發達喇！當時有好多（唔知幾多萬？）真真假假由中國嚟嘅「學生」，即刻唔駛返學，馬上名正言順可以揾工做。兩三年後，佢哋入籍袋鼠國，正式成為Aussie，即刻申請啊爸啊媽，啊哥細佬妹，然後以幾何級數咁伸延開去。冇幾耐，華人數目就取代意大利人，成為袋鼠國第一大少數民族。

隨住香港移民減少，大陸移民增多，而家講國語vs廣東話應係64之比。不過傳统唐人埠或飲茶地方，仍以廣東話為主。

呢啲都冇問題，各有各噏啫。

前幾年，有新中國背景嘅團體，居然入信袋鼠國聯邦政府教育部，要將簡體字成為唯一（！）書寫中文。即係話考試只准用簡體字。正簡之爭各自嘅論點，呢度唔講嘞（我梗係撑正體啦，你睇我點寫電郵就知啦）。但最乞人憎嘅就係成日用13億人去壓人。所以袋鼠國有頭有面嘅文化人，例如陳耀南教授就聯埋一齊反擊，去信聯邦政府痛陳是是非非，正體字廢不得。袋鼠鬼佬知鬼你哋班唐人搞乜鬼，不過知道有唔同意見，就從善如流，以不變應萬變ie 維持現狀。當我哋鬆一口氣之際，有背景人士千里傳音：「你哋咪咁得戚，I’ll be back！」

2010年11月24日，有人嚟我舖頭，問：「Do you speak Chinese？」我答：識，有乜嘢幫到你？

到今日，我重係鐘意講：雪梨、布里斯本，維珍尼亞，夏彎拿等。

大國掘起，乜都想控制。

上周音韻學習作，啊蚊提出：鬼，應該係「國位切」（委音），佢係啱嘅。因為鬼係第2聲；而「國偉切」係第3聲，屬有聲無字，即係有呢個音而寫唔出字。但係讀歪少少，冇所謂啦！「國威切」當然係龜，但係佢細佬同個妹就無辜喇，無端端叫做龜好龜妹。好彩佢哋又冇乜所謂啫！咁有文化修養嘅名係邊個改嘅呢？係啊囉，佢親口話比我知。面青，佢有冇同你堤起過呢？

鄭少，我解開咗你30多年嘅謎團，跟住你問我個朶嘅源起。我已經喺個blog度交代得一清二楚，我而家唔話比你知，等你返香港同羊咩博士賀牛一時，順手問吓周圍嘅人，睇吓揾唔揾到料？

Ｋ仔話佢有眼無珠，唔識劉劍鳴，等我略作介紹啦，佢係乒乓球組嘅，同我啱啱相反，佢係屬於斯斯文文、青靚白淨嗰隻。佢讀新法，喺新法銀樂隊吹單璜管，亦喺九樓演奏過。劉劍鴻（國術組）係佢嘅賢弟。Ｋ仔，你見到鄭少，你可以問佢，佢個劉家好熟。

好嘞，又到每周一相呢個環節嘞。由黑板可知，呢幅相係做緊常識問答比賽。相嘅右手邊隱約見到老夫子、啊昌、淑姐、何立基，同另一個電工組嘅維工仔（乜名？）。同我一齊嘅係劉劍鴻（邊個記得點解佢會叫做猴踎？下次開估）。比賽主持人係輝sir，地點係十樓天台。詳情已唔多記得，唯一記得嘅情節都比啊蚊踢爆咗，不過情節有些少出入。我記得輝sir問我所有數學問題，我諗都唔諗，即刻嗌pass。我哋落後緊，時間已無多，啊輝sir問湖南省會簡稱乜？我答：湘（我梗識！偉大領袖故鄉我點會唔識），鈴……，夠鐘！答多條我就追平手喇，即係啱啱輸咗，我即刻大叫多一聲：傷！全場爆笑！

啊蚊我應該唔同你同組，可能係對手。

再噏過

嚤囉