2010.12.12
攞景手痕驚為天人，講雞噏豬等緊天書
夏灣拿舊城區，海明威打過躉嘅酒吧
柯拿，又嚟喇，
活到今日，方知乜嘢叫做真人不露相。
放工返尾企，喫過炒河，坐低打開電腦，開啟馬仔電郵，見五言絕詩一首，一頭霧水。再碌落去，見博士短文，仍不知就裡。再向下碌，就見馬仔豪文。喂，識你咁多年，而家先知你寫嘢咁掂。風雅頌，賦比興，隨手殺出，氣定神閒。不過，我睇第一次，只明一半，再翻睇，明到六、七成，再睇多次，全文先至大概掌握。以我咁嘅資歷，都搞成咁，正如羊咩博士話齋，我哋啲弟妹，好多應該睇到「蒙」過蒙正也。大佬，喺香港雞時，我哋都有「精讀」，睇嚟你都要出番本解讀天書，益吓我哋至得嘞！等緊你！
再者你字字豬雞，焉能馬筆停題，祈望加速洩露各家機密，繼續癲馬行凶。則係我哋呢班好事之徒嘅大幸也。
係嘞，Ｋ仔你返乜嘢工呢？工時長嗎？唔好太辛苦喎！
周仔提供嘅路線實在過癮，究竟係你嘅旅遊經歷，抑或係轉述討論區？我好鍾意聽人講旅行故事，願聞其詳。
多謝啊鳴，啊皮關心。實在我選擇路線，安全永遠擺在第一位。我上次去以色列同約旦，好多人覺得危險，純粹係電視畫面嘅印象。如果你睇吓網上嘅討論區，及旅遊書，你得嘅印象就完全相反。古巴亦然，上網睇吓過來人點樣評價古巴嘅治安，你就知道佢同海地，波多黎各，委內瑞拉等中美國家十分不同。
我都好想啊珊可以同我一齊去，但我知咁樣嘅旅行方法並唔係佢杯茶，anyway我亦好享受做獨行俠嘅經歷。多數人知我一條友去都問「啊珊比你一個人去咩？」我喺呢度一定要多謝佢對我嘅支持，無論精神上及實質嘅準備工作，佢都幫我、撑我，十分感激。不過，我每到一個令人感動嘅哋方，我都會諗，如果啊珊喺度就好嘞！有好幾次，當我有呢個感覺時，咁啱啊珊就比到電話我，令我好開心。不過古巴對通訊管得好嚴，唔知有冇咁方便？上次我每日都可以將遊記上咗blog，今次唔知得唔得！
我己book好民宿，在行程上，民宿主人（佢識英文）應該可以幫到我。打算會喺夏灣拿留4日，再向東行900公里，到此小島最東面嘅Santiago de Cuba，再折返向西，到中部Santa Clara 探訪哲古華拉，再到島之最西部Vinales ，再折返東返回夏灣拿，就飛返香港同大家傾偈喇！
而家又砌緊去古巴前喺倫敦嗰4日嘅住宿同行程。打算住Hyde Park附近嘅YHA（近景點啩？）。我做一個行程先，再會請教大羅。各位如有倫敦資訊，請提供，就此謝過。
羊咩博士，記得呢首歌嗎？
美麗的夏灣拿
那裡有我的家
明媚陽光照新屋
門前開紅花
…….
可能我對夏灣拿第一個印象，就由呢一首歌開始。
再噏過。
嚤囉
No comments:
Post a Comment