2010.09.19
噏背後，噏身前，雪梨奧運十周年
2000年 蔣家於雪梨奧運主場館
今年9.18……噢！唔係講日本仔打東三省。今日不談國是，亦不談風月！講吓十年前，即係2000 年9.15，正係雪梨千禧奥運開幕之日。
自二戰前柏林奧運會開始，燃點火炬成為開幕禮嘅焦點。你哋一定記得洛杉磯奥運，拳王阿里用聖火點著箭頭，再由射箭運動員將箭射入成百米外看台上嘅火炬，將佢點燃。以及發福李寧老闆吊威也走勻全場再點著火炬嘅場景，至今難忘。
雪梨奧運主場館建成後，人人四圍去揾個火炬喺邊度。揾勻全塲都揾唔到！究竟個火炬喺邊度，成為談論焦點。到開幕日9.15，仍未見踪形！
最後一棒火炬接力，由原住民跑手Cathy Freeman（佢卒之攞咗呢屆女子400m金牌）舉起火炬跑入一個水池內，正式係在水中央。但係火炬呢？佢點乜嘢呢？佢企咗一陣，將火炬垂低，用火炬嘅火熖喺佢周圍水面劃出一個火圈包圍住自己，然後再高舉火炬好似個自由神像咁企喺度。
時間一秒、一秒咁過去，喂，乜冇嘢發生嘅？成分鐘左右（嗰時，一分鐘好似成年咁長），只見個水上火圈徐徐升起，全世界到一秒至知道，原來個火炬就收藏喺水池裹面！
至於點解遲咗昇起，原來真係機械失誤！原本設計係Cathy一點著周圍嘅火，個火炬即刻自動昇起，點知唔work！當全世界等緊之時，佢內面工作人員嚇到褲都濕埋，最後都攪唔掂，即刻決定用人手將火炬絞起，好彩設計時預咗可以用人手！
賽後檢討，研究死因，發覺裹面有粒繼電器relay瓜咗！而呢粒嘢係made in….
（嗱！嗱！你又講埋啲咁嘅嘢…）
China！
（都話你條友，冇嘢好講！）
我作為一個有中國背景嘅澳洲人，我成日同啲澳洲鬼講，喂，裹面有成千個零件，只喺壞一個啫，其他冇壞喎，應該公平啲睇吖，係冇！
…………………………………………………………………！
為紀念呢件事，我今日（禮拜日，9.15要開鋪！）踩單車去 Sydney Olympic Park, 有相為證
嚤囉
No comments:
Post a Comment