想起鵝頸，往事心中繞
點解叫鵝頸？
六年後（2016年），我喺網上揾到呢張相，鵝頸街市差不多全貌，勁！
柯拿，又嚟喇，
答Ｋ仔，堅拿道東西一帶就係鵝頸，點解叫鵝頸，唔肯定。
唔知係唔係條大水沆又長又幼，好似鵝頸？
講到橋，我就可以答你，
試想，要跨過大水沆，必須有橋。即係話沿住呢條大沆canal係有好多座橋，
用嚟將堅拿道東西兩邊連接起來。一條一條橋講：
最大嘅一條橋，你成日行過都唔會覺。試想，你喺鵝頸消防局，向西行，
跨過堅拿道東（幾步啫），你嘅右手邊就係著名嘅灣仔大公厠（而家仲係，真犀利），
你已經踩上橋喇。繼續前行，踏落堅拿道西，你過咗河喇。即係話成個公厠係起大水沆之上。
由堅拿道東行入厠所，解決，洗手，離開，踏入堅拿道西，咁就過咗河嘞！
即係話嗰一段嘅軒尼斯道，就係一條橋！就係著名嘅鵝頸橋喇！！
我係網上見過一張相，可以清楚見到橋礅，上面仲有電車行！
喂！咁應該好多條橋噃！
叻仔！再講另一條，呢條橋，我細路仔時，每日應該行幾十次！
你而家企係羅素街口，行過堅拿道東馬路，踏上巴士站範圍，你己經上咗橋喇，
再向灣仔道方向行，踏落堅拿道西，你離開橋喇。
呢條橋嘅兩邊係鐵攔杆，橋上實在係街市嘅一部份，兩邊擺滿小販地檔，即係要走鬼嗰隻。
嗰時，如果你企係橋上大叫「走鬼呀！」埸面應該好壯觀！
我睇住佢拆，佢拆緊個樣，我仲記得好清楚。
人人講鵝頸橋打小人，嗰啲打小人嘅檔就係沿住大沆嘅石壆，由羅素街口一路擺到軒尼斯道，
再左轉上橋，不過只係喺堅拿道東，同埋軒尼斯道橋。因為堅拿道西係街市，嗰度已經攞滿晒嘢，唔會比佢哋喺度打小人也。
我貼上一張相比你參考，中間嗰個細路係我，兩邊大哥哥我唔知佢哋係乜水，呢度就係west bank係〝堅拿〞以西，可以見到石壆嘅高度，對岸就係打小人嘅熱點喇！
其他橋嘅位置，由街市向北（海）數：駱克道交界，謝斐道交界，由告士打道（已經係海皮喇）出海。
由街市向南（跑馬地，上游）數：記憶中只係禮頓道，條水沆沿摩利臣山道，入跑馬地，瀣
愈入愈窄，就算有橋都係好細嗰隻！
多謝Ｋ仔刺激我嘅思巧。
嚤囉
No comments:
Post a Comment