2010-12-12 勿理博士，噏乜嘢詩

2010-12-12

勿理博士，噏乜嘢詩

呢

一篇

唔係詩

只係將啲

中文字

擺成

咁

安哥好嘢，成日都揾到啲熱話題。一陣又上河、一陣又美女示範「健身」操、有時又叫人小心食飯。都好嘅，出發點都係想人活得健康、開心啫。不過，咁多年相識，都有啲要求嘅。就係你都撩幾隻字，講吓你嘅睇法係點。你想我哋信佢？抑或提防受佢騙？又抑或叫我哋團結起來做啲乜嘢？又抑或只係想比啲笑料我哋調劑一吓沉悶嘅生活呢？如果知道取向，大家就因住、因住咁，免傷和氣嘛，我識做喇（不過…有時…）。但係如果唔知，會錯意就唔係幾好意思喇！

呢位傳說中嘅勿理學教授（如果被人屈，就要出聲喇），寫咗首長「詩」，重係中英對照添，等啲鬼子佬都睇得明。

詩中，我只睇到3樣嘢：你們、我們，仇恨。

但， “你們” 係邊位？外國政府？外國NGO？外國人？白求恩大夫、金正恩元帥、馬卓安、肥彭、珍芳達…。邊可以鐵板一塊？例如詩中話自由貿易Vs搶飯碗。有啲“你們” 都不知幾高興，可以輸入平價物品，可以將生產線搬出國外，利用大量亷價勞工，免徐環境成本等等。另一啲 “你們” 因為生計受損， 當然誓死反對。但佢哋一邊反對，又不知不覺中喺大量入口中國貨中得益，就係因為大量亷價日用品嘅供應而改善生話。我初到袋鼠國時，不時見到人打大赤腳四圍走，唔係因為好free，而係鞋貴！但今時今日，鞋多到冇掟擺。

咁 “我們” 又係邊位，國家領導人、黨員、幹部、工人、農民，城管vs個體户、拆遷人員vs “釘子户”… 。不同人站在不同立場，所堅持嘅嘢亦各異。

南京大屠殺時， “我們” 的人民走難避入 “你們” 鬼佬的勢力範圍而執番命仔。又比較一下大清帝國時，有幾多個“我們” 的人死于八國聯軍，英法聯軍。對比起清國人死于太平天國、焾軍，真係大巫見小巫（威水嘞，呢個太平之亂嘅死亡人數係入咗建力氏紀錄大全！因為敵對兩軍，每克一城，都屠城！遭央嘅又係平民百姓）。解放後嘅唔講嘞，學校冇教，有興趣就自己摷料。

勿理學教授用簡單２元化睇問題， “你們”就係施壓者， “我們” 就成日比人鬧，係受害者。咁即係散播種族仇恨，

重有就係將人民同政府混淆起來，如果有人譴責某啲政府行為，佢就將全國人民搬埋出嚟做檔箭牌。就話譴責政府就等於譴責全國人民。實情係，你睇英美加澳紐香港，邊個政府唔比人批評。澳洲人批評澳洲政府係愛國嘅表現。想唔比人鬧就做好啲，唔係鬧返人。而且係唔係鬧得啱，政府講係冇用嘅，最終決定權，應該喺全體人民手上。

好彩Ｋ仔派去羽毛球場，如果老頂派你去田徑場執鉛球就大鑊啦！

正經嘅，保重身體為上，你識做嘅！

更正，上一篇，馬仔寫嘅係七言絕詩至真。

嚤囉