2010.08.22
噏完再噏過，然後笑呵呵
柯拿，大家好，
而家係星期日朝早，但係故事應該由噚日講番起﹕
禮拜六，一如普通嘅一日，起身，去GYM，開工……;但係一定要準時收工，因為一來，我要喺六點前要去到票站投票﹔二來，要同翀翀、妹妹打氣。佢哋要喺票站幫自由黨Liberal Party拉票。翀翀、澄澄都加入咗自由黨青年團，即所謂young liberals﹔而翀翀比較投入，佢咁上下就話去坎培拉、墨爾本等咁嘅地方去開會。屋企有唔少翀翀同前總理何華德、部長及議員所映嘅相。
講番票站。我所屬嘅選區有四十幾個票站，我可以去任何一個站投票（其實，再誇張啲咁講，我係可以喺全國，係！全國！任何一個票站投票嘅，海外都得）。你估好似喺香港五區公投嘅時候，專登攪到啲嘢鬼咁複雜嚟隊低選民嘅投票意慾咩？
我去嘅票站係當區一間小學嘅禮堂。而喺票站外嘅空地通道上，候選人所屬嘅黨派就有工作人員擺檔口拉票嘅嘞。喺當眼嘅地方，會貼上宣傳海報，但係唔係好多。當有人行入票站時，各黨派人員都會向選民派上單張。單張上當然印有候選人個貓樣，亦有候選人嘅政綱同埋理念啲咁嘅嘅嘢。不過呢啲只係例行公事而已，因為多數人喺行入嚟之前，已決定咗選邊個嘅嘞！我哋攞呢張單張，最緊要係要知道喺邊度寫上個〝１〞字（選senate）。同理喺眾議會House of representatives嗰張選票上填上次序。因為你如果唔喺呢張選票內，填上先後次序（ｌ、２、３…）比每個侯選人，例如只填一個、两個…嘅話，呢張就係一張廢票informal vote。但如果你信任一 個政黨嘅，又或者唔想用腦嘅話。好似我咁，囉張單張，依單張上嘅建議，照填可也！當然人人都有權填上自己鍾意嘅次序嘅喎！講開又講，正如我噚日所講，選senators嗰張票足有４呎咁長！
我去到自由黨嘅檔口，見到翀翀同妹妹喺度拉緊票，派單張及叫人選自由黨等等。我梗係同佢哋打氣同讚佢哋做得好。至於影相、video等當然更係指定動作啦！
再睇吓成個票站氣氛，４個字﹕安靜和諧。冇掟蕉、冇粗口、冇師奶走入社民連人群內話佢比長毛非禮、冇撕爛對手嘅海報、冇指手劃腳話人係賣賊、 …！！
所以〝和諧〞呢單嘢，唔係由政府指令嘅，係出自人民內心嘅。…….唉！
好！唔講啲冇癮嘅嘢。我走入票站，登記咗我係乜水（誰），攞咗两張一長…長….一短嘅選票，寫上我嘅意，放入票箱，投下我作為公民神聖嘅一票。咁就攪掂。下一屆乜嘢人可以組成政府，乜嘢人可以做國會議員，就由全體人民一人一票咁決定啦！冇邊個張票係值多啲，喺街邊嗰個露宿者，同政客、大有＄佬等嘅票值係完全相等！
我選邊個呢？哈，我諗你都估到喇，唔使講啦，呀嘛！
投完票出嚟會番翀翀、妹妹，問吓食飯點樣？佢哋話仲要做埋監票至走得。今晚，我又得一枝公食飯喇。
食完飯，我唔係好得間咋。我又要開機洗晒呢個禮拜嘅衫，然後坐定定，將電台嘅節目下載落電腦，再下載落MP３，咁成個禮拜就有嘢聽啦！
Z
Z Z ZＺZＺ
一宿無話，又到禮拜日。一早起身，即刻打開電視，睇吓選成點嘅欵先？我所屬嘅選區，自由黨大比數獲勝，翀翀妹妹一定好開心嘞。不過，呢個選區一向都係自由黨嘅safe seat，所以都冇乜驚喜啫！
至於組成政府，就睇吓嗰個政黨可以得到幾多個議度嘞。如果有個政黨可以得到７５席以上，就成為多數黨，可以組成政府。例如上屆２○○７年大選，工黨得到８８席，自由黨得到５９席，咁，何華德自由黨政府就比工黨推冧咗啦。工黨上台後，當時嘅黨陸克文（識講國語嗰條友仔）就成為總理嘞。而自由黨亦由執政黨變成在野黨。两年後，工黨內鬨，女副總理吉拉廸Julia
Gillard被拥成為黨魁，於是亦成為總理。而陸克文雖然被逼退下黨魁及總理位置，但係佢民選國會議員嘅身份係冇人可以剝奪嘅！佢唔會因為黨內鬥争，而好似趙紫陽咁比人軟禁至死。更唔會好似共和國主席劉少奇、彭大將軍…………等被人鬥死為止。陸克文仍然開國會。佢今屆仍然參選。今早嘅消息，佢喺昆士籣Queensland其中一個選區嘅議席繼續獲選為國會議員。即係話出年我哋又見到佢喺國會行嚟行去。但係佢可以坐喺邊一忽呢？就要由工黨內部决定嘞！
截至星期日，已經數咗７○幾個％嘅票﹔結果係﹕
工黨得７○席，自由黨得７２席！其餘票數散落喺各小數黨及獨立議員嗰度，呢次大劑嘞！電視評論員話，澳洲政局陷入political turmoil。
跟住會點呢？有以下嘅可能性
１）工黨、或自由黨獲得領先數目嘅議席，但係唔到大多數，即所謂懸空國會hung parliament。仍然組成少數黨政府。但係咁樣治理國家，難度就好大嘞。
２）工黨、或自由黨知到自己唔夠班，所以連同其他小黨、或獨立議員組成聯合政府。當然咁樣嘅話，自已嘅獨立性就打咗折扣喇。
３）…………鬼知咩
到中午，Christ又嚟車咗妹妹去街喇，我就喺屋企寫埋呢篇嘢。
今晚約咗翀翀、妹妹等食晚飯。我會問吓佢關於大選後嘅嘢。
再嗡過！
嚤囉
ps 如要睇照片，請登入我飛事卜
No comments:
Post a Comment