2010.09.12 噏高噏低冇話虧，開心再見堅拿道西 -- 覆老照片電郵

2010.09.12 

噏高噏低冇話虧，開心再見堅拿道西 --  覆老照片電郵

2016年，我又揾到呢張堅拿道西

柯拿，大家好，

多謝安哥大師轉載香港古老照片，

其中最感觸嘅係堅拿道西嗰張，呢條街係我出世後至十幾廿歲，

經常出沒嘅地方。照片映住嘅係街市對面嘅街鋪，

而街鋪對面（映唔到）係一列街市，面對街鋪嗰面係雞鴨檔，鮮魚檔，牛肉檔。

另一面，即面向堅拿道東，係豬肉檔。隔住豬肉壋同堅拿道東之間，係一條大坑。

呢條大坑係將黄泥涌，跑馬地一帶嘅水，一路引出海。

堅拿道就係Canal Road ，喺西面嘅路就係Canal Rd West. 堅拿道西也。

信唔信由你，我細時見過有舢舨撑到入而家羅素街附近，冇講笑！

個出海口大約喺而家伊利沙伯大厦附返。而家喺堅拿道東及西中間嘅行車天橋，

就係起喺大坑上空。我睇住佢起！

嗰時我啊爸啊媽就係呢個街市擺檔！

我成日話豬肉佬叫我打嗰筋斛比佢睇，

就係發生喺呢度！

勾起我好多回憶。我嘅回憶錄喺呢度會大書一筆嘅。

為咗多謝安哥，我又回敬一張舊相。

你哋討論肥瘦問題，Ｋ仔攞埋上帝出嚟﹔喂 God要理埋安哥嗰肚腩？

咁邊有時間搞掂以巴冲突，分吓庄閒好冇！

三羅又話讀書唔多。講笑啦，駛唔駛咁學術呀？！

嗱，咁嘞，可能你哋成日見安哥而家個樣，睇慣晒，冇晒感覺。

我貼出呢張相（應該未夠30年嘅！），相中嘅安哥，打開衫紐

肚腩隱約可見，大家有眼睇。邊個肚腩性感啲，大家話嘞，唔使咁複什嘅！

嚤囉