同啊媽慶祝生日
Reply Email to Andy Cheng今日要雞咁腳快啲收工返屋企，因為妹妹有補習學生嚟，所以要喺六點前歸家。返到屋企冇耐，佢個學生已到。快快手手攪掂餐飯，唔好嘈住妹妹同人補習吖。坐低拎起個膝上電腦睇吓電郵，好開心睇到鄭少俾我嘅一封電郵，我要喺度同你嗲番幾句。
我哋上次見面係幾時？我問啊妹妹，佢話係喺佢三年班嗰時，你哋一家人到澳洲嘅時候。斬吓眼已經十年啦！仲記唔記得嗰啲好大隻嘅蚝呢？好可惜，我哋啲同胞中意食蚝，所以好耐已經再食唔到啲咁大隻嘅蚝咯。
你提到我去中東旅行嘅事。就正係想喺有心有力嘅時候做啲想做嘅嘢，唔好剩係唸，要去做。已經活到今時今日，仔女嘅嘢你又理唔得咁多，經濟壓力又因為仔女入咗大學而輕咗唔少。而家正係多啲為自己想做嘅嘢而去努力嘅時候嘞。喂，遲一年就冇一年啦！
我以前成日諗：乜嘢時候我可以退休？我而家嘅諗法係：做得幾耐得幾耐！一來，做得表示我体力還可以；二來，去玩都需要銀両支撑。好彩都算係自己生意，工作嘅強度應該可以作適當嘅調節啩！我而家嘅口號係：努力工作，揾銀去旅行！
安哥先牌發電郵俾各好友，講述好多人生大道理。好可惜其中充暮氣，太過強調年紀（不是年幾）老邁。（其實安哥仲keep得好fit，實在唔駛咁灰嘅！，此中嘅奥祕同埋我嘅睇法，就遲啲至講）。而家講番旅行呢單嘢，其實我好希望可以孭起背囊四圍去，可惜要揾兩餐晏仔，冇時間又冇銀，唔可以話去就去﹔歲月不留人，十幾廿年就咁過去（唔好提個老字）。雖然歲月被神偷偷走咗唔少，但依然年輕嘅我，夢想又點會冇咗呢又？所以今年三月就不顧一切，孭起背囊做其背囊友可也。對我嚟講，今次係成功嘅。絕對喺我本人生記錄部裹面，添上七彩嘅一頁！至於我喺旅行前、後嘅心路歷程，可以睇番我個博客嘅喎。
我喺旅途上嘅所見所聞所感，亦寫喺我嘅博客裹面，馬仔亦將佢輯成morlaw’s planet，喺呢度當然好多謝佢啦！
電郵中你提到十年前功虧一簣嘅事，實在好可惜; 不過再接再勵，冇壞嘅噃，希望你可以＂重拾舊歡＂，再上征途。
而我依家就計劃緊下一個旅程，初步構想係去古巴，途中停留一個國家，可能係中美洲，墨西哥啩？睇吓點？！如你可以提供資料，快啲快啲。
喂老友，尼泊爾我都唸過，睇吓有冇合作嘅空問呢又？
你又提到人生走到呢一處，家庭、揾銀、理想‧‧‧等等又點攪呢？我冇辦法提供任何意見。但係我自己就係咁做嘞﹕工作？咪繼續開工囉，都要錢駛，不過盡量抽時間去玩啦！鬼佬話work hard, party hard嘛。家庭？梗係重要啦！你嘅另一半，你要同佢過埋下半世！仔、女都有佢哋自己嘅天地。有一日，佢哋會理首於佢哋自己嘅家庭，事業，兒女……; 就好似我哋而家一樣，所以趁而家佢哋未太忙碌嘅時候，多多珍惜相處嘅日子啦！
好嘞，講吓一啲近况。翀翀今年年尾就畢業啦，而家喺一間律師行做緊實習。佢自從入咗大學後都已十分自立。我哋唔駛幫佢交學費，佢自己做兼職同埋補習，已夠自己開銷。總之乜都唔駛點理啦！最近佢仲自己搬咗出去住，佢成日都十分忙碌，考試啦、實習啦、補習啦、返教會啦等等，但係我哋都盡量揾時間喺一齊嘅，食飯呀、飲茶呀咁。今年年尾就要揾嘢做啦！佢已經有一個穩定嘅女朋友嘞，佢亦係由香港嚟澳洲嘅。
妹妹今年係大學一年級學生，佢讀緊法律及歷史双學位。而歷史佢專讀古埃及史！一定好過癮嘞！佢有個鬼仔男朋友，個男朋友好鍾意踢波，妹妹成日去睇佢比賽。男朋友仔已可以揸車，所以成日車出車入，攪到妹妹都唔係好着緊學車，所以佢到而家都仲係L牌。
啊珊係好忙碌嘅，佢要番三日工，又要做鋪頭啲數呀、落單、銀行啲嘅嘢、交稅等等，係好踢腳嘅。佢仲要留番一日同班中大師奶聚會、打牌。再者，佢係今屆及上屆嘅澳洲中大同學會嘅會長。今年會卸任會長，但來屆佢仍然係幹事。
至於我，可謂冇乜太大變化。頤望係多啲時間四圍去玩，咁就正到無倫嘞！
至於年尾會否返港，實在難講，不過多數都唔會嘞。事関我如果三月成行嘅話，當我番袋鼠國前，我會經港，可能逗留三五日嘅。而啊珊因為佢啊爸嘅緣故，佢已經返咗兩次香港。實在佢而家仲係香港，所以到年尾佢返香港嘅可能性就好細嘞！不過世事難料，啲嘢好難講得埋者。到時至算啦。
好嘞，就講住咁多先。
保持聯絡啦喂！
係咁先。
No comments:
Post a Comment