2010.10.24 噏到打大風，風大冇陰公。

2010.10.24

噏到打大風，風大冇陰公。

温總高帽 look ，型！

柯拿，大家好，

多謝馬仔幫我糾正記憶，解開符仔、麗姐、Ｂ女之謎。獅子進駐香港雞係喺我哋中四時，所以我哋冇上過佢堂。記否中三上體育堂，要攞晒啲波呀啲咁嘅嘢行，全班一齊行去跑馬地，然後体育先生（馬仔，記唔記得佢姓乜名乜，不過，好似當時佢仲緊Ｕ，兼職教体育也？）就叫大家排好隊形，一齊做廣播操，冇錯，就係風行全國嗰隻「（國語）現在開始做廣播體操，起步…走！」，之後，我就會跟佢圍住跑馬地跑圈。其他人就各式其色，踢波，吹水不一而足，認真多樣化。

多謝羊咩博士邀請，我諗多數都嚟唔到嘞，因盤川有限，亦要預留明年兩個計劃之用（安哥大師，盤川籌措進度如何？）。

濃情厚意，就此謝過。不過飲唔到骷髏湯，係非常失望者。在此十分欣賞及恭賀温總厨有如斯光輝成就。又，借問聲Doc. 如無介意，可否告之，邊時邊刻，至係貴耳，順貼之時呢又？

老鄺回憶點滴十分精彩，而且非常獨特，請繼續。互相chit chat，可刺激大家嘅思路，將閉塞咗好耐嘅記憶打通番，點點滴滴盡量重收，到老到郁唔到時睇番，一樂也！更有可能可以醫老人痴呆ｏ忝！

建議老鄺，寫完一定要keep好佢！

由Ｋ仔講開水產生物學，到羅氏昆仲講埋文字訓詁學及高等方程式數學，我又有一問題，唔知係邊門學問：到底共產黨領導中國人民走向光明呢單嘢，又係幾多年一遇呢又？

如果問題太過白痴，可以不予置評，繼續風花雪月。After all我哋都唔係受到恩澤嘅人﹔好大程度都係旁觀者，而且，一、我唔夠偉大，二、唔係光榮，三、唔夠正确。不過有時望吓自己個樣，再睇吓皮膚嘅色水，又好似有啲lah更。所以，對神州大地嘅日出日落，月圓月缺，好天落雨，花開花落等自然現象，都噏番兩句咁啫。不過，至於幾多年一遇，遇咗之後點收科，以後仲有冇咁好彩繼續有得遇等等，呢啲內遇及外遇嘅問題，都只有喺受到熱帶氣旋包圍下嘅人至有能力搞也。

我喺咪講緊氣象學呢？！

不如講吓音樂：

「風繼續吹，不忍遠離….」

嚤囉

寫在時晴時雨之際