2011.01.16 噏瑣事，兩位甜姐兒﹔想招積，必要睇地域。

2011.01.16

噏瑣事，兩位甜姐兒﹔想招積，必要睇地域。

柯拿，大家好，

我鍾意講故仔，大家都知道。睇咗大party嘅相，見番好幾張Ｎ年冇見嘅面孔。正如酸梅姐姐話，我地都係喺人生某段軌跡，神奇地交匯在一起。儘管交滙嘅時間不長（酸梅姐姐話佢喺九樓只係2年時問（what? Only 2 years!），但喺記憶及感情上，深得不成比例，唔知各位有冇同感。

我同酸梅姐姐交滙嘅時間係當我讀緊紫荊花香港雞及摩工（70至72？），我印象中嘅酸梅姐姐當然係靚姐姐一名，梳住孖辮，鍾意著白恤衫、深色西褲。好鍾意笑亦容易喊。有一段時期，口琴組成經常喺佢上環屋企開檔。喺戰前舊樓嘅地下（有冇記錯）。兩件瑣事：

有一次，酸梅喺大笪地（上環新填地）買咗一架白色、書形嘅錄音機，開捲式嗰種。用咗冇耐，酸梅話架機壞咗，就攞比老妖睇。老妖搞咗一輪，拆開電池盒。原來只不過喺酸梅換新電時，將正負極調轉咗啫。老妖話：唉！女仔….。

有一次，酸梅話佢可能有近視，老妖話，不如去眼鏡鋪驗眼，又唔駛錢嘅！於是我地一行幾人，有vulture同死火德（？），去到鵝頸消防局斜對面嘅眼鏡鋪。門外真係寫住「免費驗眼」，入去。老闆娘一睇，幾條靚仔、靚妹入嚟話配眼鏡，都唔知係唔係混吉嘅。小姐先坐低，揀個眼鏡框。喂，我哋冇諗住此錢噃，但係騎虎難下，酸梅唯有揀眼鏡框、眼鏡片等。小姐承惠幾十蚊（唔記得幾＄？）。落住５蚊訂得唔得？殺你！跟住入去驗眼。小姐，你有100度近視……。原來驗眼唔係唔駛錢嘅！唔知酸梅姐姐後來有冇去攞眼鏡？……..?

喺酸梅姐姐旁邊嗰位甜姐兒係邊位？好彩睇咗馬仔電郵，就知酸梅姐姐同玲姐於當晚合唱紅梅讚。喂，馬仔有冇片睇？

玲姐，唔知幾多年冇見。我印象中嘅玲姐，永遠雍容華貴，柔情似水，我未見過發火嘅玲姐。我嘅國語造藝，就係啟蒙自佢，乜嘢音母、韻母，都係玲姐所教。有一課係咁嘅：

「買菜，買菜！」

「賣的甚麽菜？」

除咗國語班外，玲姐婉轉嘅歌聲，都係我唔會忘記嘅。

又見到啊昌及徐仔賢伉儷，又講多一個故事：

72年（？），灣仔道同軒尼斯道交界。咦，前面有一堆人群，本住倒瀉「史」一定去睇嘅香港精神，我同啊昌即刻行埋去睇吓有乜嘢睇先。穿過人群，原來差人做緊嘢。做乜嘢就唔記得嘞（拉小販？），你知我哋嗰時幾憎差人。啊昌噏咗句「黃皮狗」，比差人聽到。二話不說，兩個差人走向我哋，一人周住一個。啊昌被個差人推咗入大厦內。而我就老虎蟹都唔入去。差人話，

而家我要搜你身。

點解？

我懷疑你收埋違禁品

我要睇吓你對手（我老豆教嘅）。佢死死氣要比對手我睇，需知，嗰時條街有幾多人圍住睇熱鬧。佢搜我身，梗係冇嘢搜到喇。此時，我見到啊昌拉咗上警車。差人話，你可以走嘞！我話，我唔走，我要同佢一齊。於是我都上埋衝鋒車。上到車，同啊昌坐埋一齊。搜我嗰個差人擰轉頭XYZ我，我此時，梗係冇咁招積啦。咁嘅環境，我唔會叫佢刷咗牙先鬧我！

一干人等車去灣仔差館，入到雜差房，我哋坐喺木長櫈。雜差走嚟問叫乜名，住喺邊等資料。最後差人落charge告啊昌襲警，就冇告我。但我可以講，我哋冇比差人墊住電話簿用大鎚打心口。除咗推推吓外，所有電影有關雜差房嘅情節都冇發生喺我身上。

開庭當日，老囉頭陪啊昌上庭。兩人打晒呔，着起大褸扮晒嘢。差人作供話同啊昌糾纏時，令佢嘅手指尾受傷，此話引起全場哄笑。大人最後判啊昌無罪。公義必勝！

公義必勝…喺香港。

問答遊戲：

某日，喺唐山大兄法院門口，有差人做緊嘢，你估嚤囉仔會唔會咁招積去淋人芝士呢又？

點解？

答中冇獎。

再噏過

嚤囉