2010-12-24 平安日 排隊買海鮮；噏快樂，昅吓邊個先

2010-12-24

平安日，排隊買海鮮；噏快樂，昅吓邊個先

魚檔隔籬就係我鋪頭

柯拿，今次要講聲 iFeliz Navidad！

一年容易又聖誕，節前節後，對補鞋舖嚟講，係淡靜嘅。好彩小號亦賣些少〝林審〞嘢，又做一啲刻字工作，所以生意尚算滿意。

講起刻字engraving。唐番都有好大差異。袋鼠絕唔介意比30皮我去刻一件20皮買番嚟嘅物品。點解？佢哋覺得刻上去嘅訊息比嗰件物件更加重要。多數刻嘅有小飾物，例如襟針、鍊墜、介指、手鈪、手鏈；禮品，例如錫杯pewter mugs、電筒，瑞士軍刀；獎牌……等。

最藉得一提嘅係一次，有個男士（廿零歲啩）嚟刻一隻介指。 

What do you like on that? Mate.

I’d like to have〝 will you marry me〞 engraved on it.

Are you sure?

Positive.

咁我就大筆一揮，搞掂！

第二日，佢帶埋一個靚女嚟舖頭，重有另一隻介指。

I’d like to have this one engraved as well.

Sure, what do you like?

咁我又大筆一揮，又搞掂！

從此佢哋喺唔係過住愉快嘅生活，我就唔知。不過我幫咗佢搞掂人生大事，就十分明顯嘞！

今日有個澳洲仔攞個不銹綱tray嚟，佢要我刻〝don’t lend to the Aussie” 。問吓大家，點解佢要咁做？（參看照片）

聖誕前夕，係買海鮮高峯，袋鼠國民呢晚團年，盡量一家人一齊喫團年飯，但唔可以有紅肉，所以就要買海鮮。呢一日，所有魚檔都十分旺場。近雪梨city嘅魚市場就更誇張，Xmas 前夕嘅前一晚，已經大排車龍，十分壯觀。我工作嘅商場嘅魚檔一早就排長龍（相中所見右邊就係小號）。但唔好以為全部〝鬼〞都係咁，今朝有個Kiwi見到人龍，就同我講，話佢大開眼界，而家佢至知，原來袋鼠家庭要買海鮮團年。敢問楓葉國民、Yanki、Pommy及其他一眾過耶誕嘅民族，佢哋又係點團年呢又？

我喺舖頭，日常就要同人打招呼。到臨近聖誕，喺講Cya之前都加句merry Xmas。不過唔係人人受嘅，你就要執生喇。睇嚟似中東、回教等，你就唔講啦。但猶太人，我就分唔出嘞！不過，我嘅經驗，多數都幾包融嘅，無心之失之嘛。但係，反而啲客就keng住keng住，如果生客，唔知我嘅背景，多數唔敢先對我講merry Xmas，我講咗先就OK喇！政治正确，認真討厭！

以前啲人都將屋企稍作佈置以迎佳節，不過都只係聖誕樹，小量小裝飾、燈串而已。隨住啲人有多個＄，加上中國製造，平到你唔信。所以呢十年八年，喺雪梨，有好多裝飾得好誇張嘅屋，加上互相鼓勵，人人鬥多，所以揸車四圍去睇燈飾變成聖誕前後嘅一個節目。喺各小區地方報紙local paper重會有個list，話比人聽，邊度有靚燈飾睇！相中嗰間屋係我鄰居，佢嘅佈置只算係普通。

Ｋ仔話熱辣辣嘅聖誕，冇錯，新南威爾斯地區東岸屬地中海氣候（睇番中二地理），夏天又乾又熱，正係山火季節，記得前年黑色boxing day嗎？不過今年又唔同喇，唔知係聖嬰或聖女嬰現象，我哋過咗一個唔知幾多年一遇最凍嘅十二月。唔止咁，所有水塘，全部滿瀉。成個澳洲東部多雨到離奇，四圍水浸。有農民話，未見過啲河咁深咁大水！我哋同維多利亞省接境嘅雪山區（係我每年滑雪之處），居然係夏天落起雪！（如果喺北半球，就係六月飛霜，唔通啲寃案真係勁成咁？）。所以雖然係夏天，呢個聖誕絕唔係熱辣辣也。

每年聖誕都會聽到呢支歌，Rudolph the red nose reindeer。佢又會令我想起一個人。邊位？

雅健為改建搞電影籌款（橫衝直撞出重圍, 片名我都記得，勁唔勁！），笑片，講如何逃出納粹魔掌。佢用呢首歌重新填詞。佢用結他自彈自唱比我聽。呢首歌從來都未喺任何宣傳活動用過，不知如何，我居然可以記到今日！而家寫出嚟等佢見吓光。

（調寄Rudolph the red nose reindeer）

社需要大家關照

同學又齊努刀

更不分年紀長幼

相關心相幫助

到這裡無需谷氣

同學又齊嬉戲

現在社需要再建設

但係欠缺消費力

同學為社盡能力

電影銷〝飛〞搏晒命

（因為）社得到大家關照

同學又齊努力

更不分年紀長幼

相關心相幫助

到這裡無需谷氣

同學又齊嬉戲

係賴子良寫嘅，兩三年前，我睇電視（星期日檔案？）知道佢中咗風，好彩係康服緊，佢重喺海濱大道當街唱tell Laura I love her，非常積極人生。By any chance有人見到佢，唱呢支歌比佢聽，佢一定會好感動！

老咩頭晚宴就到喇

當然要恭祝羊咩博士，牛一快樂

羊羊得意，

廿七號當晚，大家一於喺温總領導下

放肆呢餐骷髏肉

就此普天同慶之日祝大家

愈嚟愈年青

愈嚟愈開心

再噏過

嚤囉