2010.12.05
古靈精怪噏一餐，巴士背囊靚海灘
一個月後.......加勒比海曬白白
柯拿，大家好，
呢個星期四，一早如常開舖，不過，冇耐就即刻拉閘走人，擒擒青驅車去機場。因為夏澄第一次自己搭飛機返香港，大家都好緊張。喺機場見到佢同埋啊Chris已經到咗，睇嚟佢都非常輕鬆。同佢哋食咗個Hungry Jack做晏仔，就埋位check in啦。今次威水喇，因為買唔到經濟位，就改買premium（做緊特價，唔係邊有錢！），所以唔駛點等就埋到位辦登機。第一次solo travelling，所以佢堅持要自己搞登機。睇嚟冇乜難度。入閘時間到嘞，再三叮囑過關注意事項，然後循例喺departure嗰度影番張標準相，然後拜拜。佢行入禁區裹面，我重裝個頭入去睇住佢。話晒都係第一次自己一個人，都有啲緊張嘅。之後我同啊Chris坐喺大堂，再用電話同佢一路聯絡。佢過咗immigration、安檢，到達登機閘口，都第一時間通知我。跟住佢話佢已經上咗機，咁我就同佢講拜拜嘞！咁樣喺大堂同啊Chris坐咗成個鐘，跟住又車佢去火車站攞番佢架車。所以都傾咗好多偈，對佢及家人有較深入瞭解。
雪梨機場停車場收費都唔少嘢，我停咗約4個鐘，承惠52袋鼠幣！
馬仔，我唔識點樣將相壓縮，不過我會學嘅！多謝你比我嘅地址！
Ｋ仔，當年喺東涌（？）下鄉，係要上山嘅。因為先要搭船去梅窩，經银礦灣再上山先至可以下鄉接受再教育。又，因為袋鼠國一般打工仔入息都好平均，高唔會好高，低又唔會好低。所以都唔會好緊張要讀得書先至揾到食。因此返學就係玩，一般嚟講，唔係太過緊張學科成績也。
至於成班友攤喺馬路，馬仔自首，話係佢導演嘅，地點係清水灣（實在我己唔記得，係馬仔話嘅）。似乎係足球、籃球、國術組聯合行動噃！打橫攤喺路中間嗰個梗係我啦！後面作晒狀踩人嗰個就係青靚白淨嘅鬼嘞！點解呢張相咁大？我鬼知咩！我係電腦白痴嚟ｏ架。
各位，我要連續工作一個月（7日1周，因為個helper去日本旅行），可能唔夠時間噏咁多嘢，所以每周一相被逼暫停。再者，我嘅旅行計劃已進入衝綫階段，所以要多啲時間做預備也！
原本4月起程，而家決定提早兩個月。機票己定。行程如下：
二月三日 雪梨飛倫敦（香港轉機）
二月四日至六日 倫敦四日遊，大羅，歡唔歡迎呀？咦，重凍唔凍呢？
二月七日 飛夏灣拿（經巴黎）
二月八日至廿二日 古巴15日遊
二月廿二至廿三日 飛香港（40幾個鐘，問你怕未？）
二月廿四至廿八日 留香港四日，馬仔，鳳凰山喎！
三月一日 飛雪梨
希望可以用15日，孭住背囊，認識一下呢個共產主義國家，而家重砌緊古巴嘅行程，多數會搭巴士同住民宿。西班牙文都係一大挑戰！
各位如識人去過古巴，或有任何有關資料，務請話比我知，再三叩謝。
正是：
古靈精怪噏一餐
巴士背囊靚海灘
遊過小島東至西
樂在其中靠腳行
再噏過
嚤囉
No comments:
Post a Comment