2010.08.15 翀youtube 廣告
哈囉，大家好，
首先向大家講聲你好嗎。
安哥傳呢篇文章，跟住比兩個選擇我哋揀。當然有得揀好過冇得揀。不過如果啲選擇好以選特首咁，只得兩個﹕一係振英哥，一係唐唐哥。咁樣嘅選擇未免過少嘞。不如我又趁吓熱鬧，比多一個選項大家。
你知啦，而家人人有冇事都上一上youtube睇下個世界周圍係點嘅樣。我提供呢個選項就係﹕首先入咗youtube先, 然後按 Saichung1。咁就攪掂。
其實呢個係世翀嘅youtube專輯。世翀係邊位？咪係我個仔咯。好、又講吓少少歷史先﹕
喺五年前，當佢入咗大學後，佢加入咗學生會，而佢間大學亦有所謂〝中國同學會〞，並非發哥船頭尺嗰個。所以佢就用大學嘅名義取得一個社區廣播頻度（唔係好似香港民間電台咁，又要拉，又要鎖咁慘嘅），咁就開咪向大氣發聲啦！就因為佢有廣播經驗，所以冇耐就喺澳洲嘅官方特別廣播服務電台（SBS）其中嘅廣東話頻度主持〝年青人節目〞，而家仲做緊。
佢嘅名叫世翀，佢改咗個名叫細聰。而個節目名則叫做士必架。實在即係speaker！
因為個節目係面對講廣東話嘅年青人，所以如果香港有演藝人到訪袋鼠國嘅話，佢都會以記者身份去訪問佢地嘅。對上一次係陳豪同鍾嘉欣應澳洲TVB邀請嚟做節目，世翀亦同佢兩個分別做咗兩個全澳洲獨家訪問節目。呢兩個訪問亦放咗喺佢個youtube專輯裹面。
呢個選擇O唔OK嘅？
希望大家踴躍收聽啦！
廣告？
梗係廣告啦！我為啊仔宣傳一吓，亦係人之常情啫。
係咁先，祝大家笑口大開！
嚤囉
No comments:
Post a Comment