2010.10.05
噏佢一個冬夏春秋，老咩頭，筆咪收
憶起幾段趣事無憂，各老友，要加油
相片顯示大天台仍未裝修
柯拿，大家好，
多謝兩羅（2+3），就係佢！
我諗咗好耐都諗唔到，卒之被你兩位搞掂，一定要請食飯嘞。
我記得佢應該係一個武癡嚟，成日自己喺大天台紥馬練功。
有時佢有啲唔舒服，例如傷風感冒呀咁，佢就紥馬、打拳，出一身汗，佢話咁就會好番，我以前都信呢一套，我有乜唔舒服都去跑步呀咁，出一身汗。而家先至知道咁樣好危險！實在係應該休息，停止運動至啱！
應該係呀權要考大學，所以就叫老曾嚟幫手，各位應該去揾老曾時，順便問吓佢。
記唔記得呀權教打天罡呢？下次我番嚟，打吓天罡都好噃。
光仔，估中有獎。講吓老夫子。佢讀寶覺，校服喺藍色長衫，放學後上九樓，好多時都打乒乓波，佢動作又大，成日都址爛長衫腳兩邊嘅開义！
鄭少，咁講，我極有可能係同你差唔多時期上九樓嘅，講吓講吓，可能記番起啲人名噃！老咩頭叫各位都寫吓初上九樓嘅情況，鄭少同佢「心有元茜一枝葱」，率先行動，各位都响應囉！
Ｋ仔，如果有機會見到鄭姨，請代我講，呀娣姐個仔嚤囉仔問候佢！謝謝。
呀蚊話寫回憶錄，真係有得諗，我自己就做緊嘞！又講，Dr. Lobo最近好紅喎，成日見報上電台電視，認真犀利也！
老咩頭用咗佢寶貴嘅一夜寫成9-13歷史撮要，幫助解我謎，感激萬分。但係你居然唔記得咗學生樂園口琴組，好多人會唔肯過你，酸梅姐姐唔應該再袖手旁觀，應該講兩句喇！講又講，可能酸梅姐姐記得我點樣入口琴組嘅情形噃！
講起樂園版，各位編輯啊哥啊姐成日忙於爆稿，喺我記憶中，我都有幾篇大作刊登喺樂園版，一篇係講我游渡海泳，另一篇講九樓旅行，文中用好多廣東話，酸梅姐姐睇過，居然笑到肚痛，透唔到氣。呢一幕我記得一清二楚，唔知酸梅姐姐有冇啲啲印象？
啊咩提到「我在魔宮的日子」，呢一年係我眾多個光輝歲月嘅其中一年。實情係1969年讀完洋紫荊香港雞中一後，我無心向學（實情係一向都係咁），咁啱港英成立摩利臣山工業學院，裹面有一個課程叫營造學徒先修班，學嘅係：泥水、造木、油漆、水喉、四個專科。我呢一生嘅工藝技術，完全喺呢一年奠下基礎。又咁啱呢年之後，九樓成日都「大裝修」，咁我英雄大有用武之用。大天台鬼咁高嘅上蓋，老蓮咁厚嘅磚牆，十樓變成室內，拆辦公室，將葡萄園變成密室及貯物室，將九樓以下居民啲電視天線遷移，搞到民怨沸騰（唔知點解又拆得掂），等等偉大工程，我都有幸參與，學有所用也！其中最難忘係有一晚，啊昌揾到架wagon，喺一個風高月黑嘅夜晚，車到一個地盤門口，我哋將擺喺嗰度嘅一包二包嘅水泥搬番九樓…….喂！每包45kg喎！！呢啲水泥係唔係免費嘅呢？唔……！
謎係要慢慢解嘅，大家繼續努力
係咁先，再噏過！
Ps 老鄺，請繼續…
嚤囉
No comments:
Post a Comment