2010.11.13 停戰紀念日，試食口噏噏

2010.11.13

停戰紀念日，試食口噏噏﹔

十一月十一日早上十一時，安息號（ Last Post ）響起，全部人企定定

-- 由我铺頭影出 --

柯拿，大家好

過咗嘅星期四係一戰停戰紀念日，世界各地都有紀念活動，袋鼠國亦冇例外。上回我話袋鼠國十分好彩﹔呢個地球，自有人類以來，有人話，冇一日係冇大大小小嘅戰爭。係唯有呢片袋鼠大地，touch wood，乜仗都冇打過。最巴閉就係二戰時，日本仔有兩隻潛艇靜雞雞咁駛咗入雪梨港，又乜都冇做過，可能係探聽軍情。但最終都被人發現咗，當然用魚雷招呼佢哋。結果兩隻嘢中咗招，負傷逃離雪梨港，不知下落。直至冇耐之前（2009？）用聲納探測到呢兩隻嘢嘅殘骸葬身於離雪梨港不遠嘅海底！袋鼠政府將呢件事話番比日本仔知，並安排葬身潛艇內嘅官兵家屬到該處海域做法事祭治等。

雖然國內無戰事，但袋鼠佬亳不吝嗇咁到世界名地參加戰争，一戰、二戰、韓戰、越戰……以至重未搞掂嘅伊拉克、阿富汗，都有袋鼠腳印。

所以每年11月11日，都十分高規格咁進行紀念活動。聯邦政府喺坎培拉戰争紀念館（到雪梨旅行，必到之地）舉行嘅紀念儀式，由澳洲聯邦總督 the governor general （憲制上，英皇係澳洲嘅元首﹔而總督則係英皇在澳嘅代理人，即係肥彭！）主持，全部嘅聯邦政要都會出席。而各州份亦有盛大巡遊活勳。各老兵或陣亡老兵家属，均執靚個look，胸前佩戴用血、汗、生命換番嚟嘅勳章參加遊街活動。

該日，全國所有商場內，一到早上11點，PA響起安息號，全部人都freeze。行緊路嘅要停，揀緊番茄嘅就繼續手執番茄企定，嘆緊麥記嘅都要口咬豬栁蛋，即刻企起身...。好似小學生喺小息完後，響第一次鐘嘅情景。到安息號完咗至回復正常。我喺舖頭，如果用緊機器，就要熄機企定定﹔如果同客講緊嘢，大家都會收聲企定。呢啲行為，澳洲佬自細耳濡目染，大家都會咁做，並將之視為愛國嘅一種表現。

笑話一則，真人真事。喺上世紀，有一個剛移民袋鼠國冇耐並才德兼備嘅美貌女子（大家都識嘅，唔講名喇），一日，去超市買嘢。行吓行吓，見到有靚葡提子。唔，睇個樣都幾靚，不過唔知甜唔甜，想話買多啲返屋企食。不過，如果唔甜咪好大劑！等我試食一粒先。佢搣咗一粒放落口，正當佢嚐嚐睇吓夠唔夠甜之際，忽然發現周圍嘅人企晒喺度，重眼睥睥咁睥住佢。心諗，喂，試粒提子啫，駛唔駛咁誇張呀？於是就急步離開。點知周圍嘅人重係企定定咁睥住佢走！越走越睥，越睥越走……。佢返屋企，同佢英明神武嘅郎君講起，先至恍然大悟。聰明嘅看官，你哋唔駛我多講都知道發生咗乜嘢事喇！

不如又講吓聲韻學。講述一個字嘅讀音，有好多種方法。例如常用嘅方法係用英文字母將音拼出，再加上數子標出聲調，咁係一種。今次我想講嘅叫做「切音」，又叫「反切」。方法係用兩個字去讀出一個字音。第一個字，只取其「開聲」，而第二個字，只取其「收聲」。開聲加收聲就變成要嗰個字嘅讀音嘞。...... ！唔明？唔緊要，舉例你實明。

例﹕

我要寫（唔係講）比人知，個「鬼」字點讀，第一，用個「國」字，只要其開聲（即係kw），第二，用個「偉」字，只要其收聲（即係ai）。將開聲收聲一齊讀，「國偉」就讀成「鬼」音嘞！於是可以寫成﹕

       鬼 - （國偉切）

啊群姐話嗰個設計火炬社徽，又唔肯畫佢出嚟嗰個籃球組青靚白淨嘅啊偉，就係張國偉。各位而家知道因乜解究呢個青靚白淨嘅啊偉，佢個花朶居然叫啊「鬼」。

習作（一）﹕

出身國術組後轉足球組（喺維工讀嘅）名字盧國威嘅人，佢個花朶又係叫乜呢？點解？

佢有個妹同細佬都係國術組嘅，又叫乜名？又點解呢？

習作（二）﹕

咁又係邊個諗出呢個方法幫以上二人改花名呢？

又到每周一相呢個環節嘞，首先要揭曉上次個幅相。係喺翠坪山影嘅。相中有我、啊珊，淑姐、顏送、二羅、章國強（邊個重記得？）、黄仁忠。

好可惜，呢期冇人中，金多寶就撥落下一期喇！

翠坪山係九摟成日去燒嘢食嘅地方。幾時又重遊故地呢？

好嘞，今次有兩張相，第一張係比啊蚊嘅，你話分唔到二羅、三羅，快啲攞住張相去問吓人。

第二張相，掛起個黑板寫住問答比賽，好可借影到好多背脊。呢個活動你記得啲乜呢？你嘅背脊又喺唔喺相裹面呢？LKH你一定好多嘢講！

下次再噏

嚤囉