2010.11.07 噏喊驚咪嚇親，大排細牌點樣分。

2010.11.07

噏喊驚咪嚇親，大排細牌點樣分。

上世紀中鵝頸街市，堅拿道西，有頂係固定細牌，路邊係走鬼檔

柯拿，大家好，

人生真奇怪，有啲「記憶」或印象，你以為千真萬確，點知原來唔係咁嘅！！我一直覺得九摟對灣仔道個大招牌係有火炬社徽放喺中間，中英文名稱則放兩邊。直至馬仔提醒，至驚覺。印象，有時係可以咁唔可靠！所以大家即管噏，自然有人將你嘅故仔完美、延長、糾正……等等。

至於Bobin當然係Robin之誤，再三致歉。而點解會寫成咁呢, 因為Bobin係Sewing machine 嘅底線，所以手快打錯咗。Robin亦毋須太過介意年少時用Seeker作名，老實講，我覺得你好型（當然而家重係）。講起Seeker，我哋喺九樓都扮嘢唱好多英文民歌，其中有如morning town ride, Georgy girl, I will never find another you等, 係由樂隊組合The Seekers所唱。直至移居袋鼠國，至知道原來佢哋係澳洲樂隊。到前10年8年（？），The Seekers又告別樂壇，喺雪梨（我唔會叫悉尼）開告別演唱會（但係佢哋成日告完別又會reunion嘅）。我當然一早買飛捧場啦，唔講你唔知，原來門票全場只得一種價錢，好似係約120袋鼠幣。先買飛就得靚位。是日也，當然全場爆滿。一入場，四圍望吓，對比起其他多數fans，原來我吔都可算係年輕嘞？！anyway, 都算係完咗一個心願啦。喺2千年雪梨奧運，The Seekers喺閉幕禮唱The Carnival is over, 當時，我哋一家4口都在場。

馬仔又指正我另一個字，「仲」字，應該係「重」嘅誤寫。馬仔你係啱嘅，「重」即係炒多鑊咁解，如重陽，就係9、9，九係陽數。行行重行行，就係行完又行。但係讀「虫」音。而「仲」個音就fit晒嘞，不個當然冇炒多鑊嘅意思。所以，我都認為馬仔係啱嘅，以後我會寫「重」，大家就讀「仲」啦！

社慶三周年嘅場刊，啊蚊話佢有，我都問緊佢攞。

馬仔你重記得家父牛一大「牌」延席嘅事，認真感動。但我記性太渣，當日賓客名單，我已忘得一乾二淨。好在你自首。睇在你自首有功，而家獎勵你供出當日在場者名單。獎品？梗係重重有賞嗰隻，包你滿意，如果你唔滿意，我都會滿意。話時話，二羅當日會唔會在場？馬仔，咁地點又係唔係登龍街口嗰間大牌檔呢？

好嘞，又到說文解字嘅時段嘞。今日講個「牌」字。舊時生活艱難，由大陸因種種原因南來嘅人，好艱難揾工做，據我啊爸話，佢啊爸（即係我啊爺）因為生得高大，所以落到香江可以做咕喱。而好多人揾唔到工，最簡單就係做小販。我記得細個時，通街都係小販，販賣貨物，技術，工藝。甚至有啲乞兒，我覺得佢哋都係小販，賣演技，博愛心。

言歸正傳。咁殖民地政府聽咗成龍話，「中國人係要管嘅」呢個大道理，於是就發「牌」嘞！牌分多種，首先有固定牌（行中人稱〝梗牌〞）同流動牌﹔流動牌，顧名思義，持牌人係冇檔口嘅，佢哋要孭住（如飛機欖）、担住（如衣裳竹、臭豆腐）、推住（豆腐花，糖水）啲貨通街行，除非有人買嘢，否則唔可以停低擺梗喺一笪地方，差人拉到，就會告阻街。

而固定牌，即係政府喺路邊，或一笪空地內劃出地方，寫上編號，持牌人可在編配咗嘅小空格內擺賣。固定牌又分「大牌」同「細牌」，係以牌檔嘅晒士分嘅（我講過我係數字白痴，以下數字，不可太認真）。細牌檔大約3呎Ｘ4呎，而大牌檔（嗱，個名出現喇）則係約6呎Ｘ８呎（？？）。喺街市內，大牌細牌都有，大牌好多時係賣雞蛋，臘腸等，細牌就多數賣菜等等。但亦唔係一定嘅，都有大嘅菜檔。

而固定牌亦再分乾貨（布匹，衣服…）、濕貨（菜，豆腐…）及熟食（粥粉麵飯，奶茶咖啡…），以便擺喺唔同嘅分區，如乾貨區、濕貨區、熟食區等以方便做生意同顧客。做熟食一般都需要比較大嘅地方，而法例亦容許熟食大牌檔喺檔口方格外擺兩張枱及八張櫈（有冇人會擺咁少？）。

所以呢啲就叫持有「熟食」「大牌」嘅「檔」，就係熟食大牌檔嘞。

其實，就係小販牌嘅一種。我細個去嘅小販工會，全名係港九持牌小商販聯誼會。因為根本唔係工人，所以唔係工會。

不過叫排檔亦冇錯，因為好多時佢哋都係好多檔，一排、一排咁擺喺路邊，舊時成條羅素街就係典型啦！所以用形態嚟陳述，叫做排檔亦冇錯，不過，又點解「大排」呢？係咪一大排、一大排咁解呢？anyway, 約定俗成啦。

以上故仔提供多一個參考比大家茶餘飯後吹吓水，多啲嘢噏咁解。

久有凌雲志，重上鳳凰山。

千里來尋故地，舊貌變新顏。

到處鶯歌燕舞，更有潺潺流水，高路入雲端。

過了寶蓮寺，險處不須看。

獅子動，荊旗舞，是特區。

三十八年過去，彈指一揮間。

可上九樓攬月，可下淺水探咩，談笑牌檔間。

世上無難事，只要肯登攀！

（水調歌頭，重上鳳凰山）

 嚤囉，山寨於袋鼠國2010春

主席嘅教導，銘記心間﹔馬仔嘅建議，莫敢忽從。一於咁話，時間再約。四月尾好嗎？會唔會太濕？否則出年年尾亦可。

老鄺之老，乃係尊稱﹔一如長毛，不分男女，成日叫人「啊哥」。

你講到走鬼，我當然都玩過呢個遊戲。而家回過頭來再看，亦係各為其主。當中各自有其生存嘅一套規則。幾時要走，幾時唔駛﹔幾時小拉交差，幾時大舉掃盪，就好似非洲獅子面對成千上萬嘅岭羊一樣，自然有一套微妙嘅平衡法則。呢套法則又講唔出，又寫唔到，總之大家心照，有得食就得嘞！唔似而家特區五大豪門，要大小通吃，斗零都賺盡咁冇人性。

我哋有細梗牌，理應唔駛點走鬼。但係開起檔嚟，個個都有咁出擺咁出嘅啦。一走起鬼嚟，都要將擺出去嘅收番入格仔內。有一次，收唔切，咁啊爸就拉個正着。當然求情叫比個機會啦！小販隊話，不如咁啦，你執些少貨，用籮蓋装住（作為呈堂證物），比你個仔（即係我），當係拉佢。因為一來，啊爸唔駛番差館落案，即係繼續揾＄﹔二來，告細路都罰得輕啲，唔駛破咁多財。呢啲就係無形嘅規則，大家都留番啲餘地比對方可以走盞。

各位，你試過比人拉未？就係呢次，我應該未夠12歲，比人喺堅拿道西拉咗，坐豬籠車連同證物一併車番灣仔差館，落案控告無牌賣嘢同阻街之罪。唔記得幾時之後，我去維園側铜鑼灣地方法院，裹面有兒童法庭受審。我坐咗入去等叫名，大人叫我個名，佢話，嚤囉仔，而家告你幾時幾日，喺邊度無牌擺賣兼阻街，你認唔認罪？

我認！

大人又問，你有冇嘢講？

我冇嘢講！

大人判案, 好，而家罸你5蚊雞，出去比錢、next！

咁我又有多些少特別啲嘅人生經驗喇！

當然細個見得呢啲嘢多，就會諗起殖民地統治、種族矛盾、走狗、漢奸等，思想就自然會左傾。估唔千盼萬吩，回歸懷抱，呢啲嘢不但無减，重變本加厲。北望神州，不平事，黎民百姓受不公平對侍，無從申訴，諸如此類，每日幾單？you tell me。

老鄺講喊驚令我想起舊時啲人有病點解唔去公立醫院（你梗係話，冇錢囉。不過我哋而家嘅全民醫療制度，又係始自何時？）？呢件事係發生喺我啊哥身上50年代初，我重未出世。佢發高燒，唔知聽乜嘢三姑六婆衰佬講，用一隻生雞，監生破開兩邊，〝噏〞喺心口，話咁就可以址晒啲毒出嚟！我啊哥之後冇我咁精靈，唔知同呢單嘢有冇lah lung？

至於喊驚可醫百病，我就打吓問句都唔信嘅嘞！〝喊驚後〞，〝病好番〞，只係兩個擺先擺後嘅獨立事件，並不一定有因果關係。呢啲只係羅輯ABC而己，無需勞煩醫學界介入，佢哋重有大把正經嘢要做。

酸梅姐姐開聲講兩句，老鄺係咪有所悟呢。

不過，唔講唔知，原來老鄺都識打小人！有機會應作表演，以免傳统文化煙滅，重可以向UNESCO申請人類非物質文化遺產。一旦成功，鵝頸橋就可以聞名天下啦，我呢個喺鵝頸橋長大嘅，都與有榮焉喇！至於女装舊鞋，我大把，紅黄藍白黑，高低踭，粗幼踭…you name it。老鄺，開聲送到，你重可以嚟小號揀，包食宿又如何。

袋鼠佬可以一睹二羅（有冇你張相？）同你啲機械人嘅風彩，係福份嚟嘅。由我屋企去昆士蘭科技大學，不遠，只係千多公里唧。我今日用Google唔駛１分鐘就見到喇，不過，見唔到機械人，睇吓日曆，原來比賽係噚日。（國語）「同志們，我來得挺晚了」。不過，我都用個架撑實部laptop睇吓有冇用，都盡吓人事咁啦！記得捧盃時比番個獎我噃。

就噏住咁多先

嚤囉