2010.10.15
淨係噏，未夠薑﹔有相睇，至鏗鏘
柯拿，大家好，
近排較忙，返到屋企好似條蛇咁攤喺度，懶得很！
馬仔，你要相信我，我1969年入嘅香港雞，就係山光道一號，至於幾時由洋紫荊變成一本書，問吓面青，可能知道答案。至於當時（中三）有乜水同班﹕我啦、馬仔、雷公、衰文、蔡凝芳、王文仕…其他你哋唔識嘅！忽然醒起，實在陳世昌都同班讀過幾個月嘅！
相中當然有蔡凝芳，坐喺前排，面青快啲認吓！不過比你提起，符仔曾讀香港雞，佢著住白裙仔個樣而家浮喺我腦海中，佢唔同我班，好有可能佢係中四入嚟，而且係讀理科，馬仔你應該知道啩！
Dr.Lobo 係啊蚊嘅賢弟呢件事，直至今年四月我喺香港先至知道。我比佢早入師範兩年啩，82年（？）我上獨木舟教練班，就係由雷雄德教，當時雷夫人（豬飽）都上緊教練班。到87年，我上中大PDP体育課程，當時Dr.Lobo係中大導師。估唔到，呢個Doc. 喺72年上過九樓游泳班，啊蚊記唔記得我都係其中一個游泳輔導！有機會，啊蚊，請問吓Doc. 知否蔣健輝＝嚤囉？
啊蚊又提起暉女，暉女好細個上九樓，冇記錯嘅話，佢同世豪差唔多時間參加學生樂園時期嘅花兒朶朶，係咪由楓姐帶？抑或酸梅姐姐？又或群姐呢？雖然暉女唔属於任何常規組別（籃球組？），但佢經常喺九樓大活動中出現，例如雅健第一屆水運會。大家記得佢係划艇選手，攞過亞洲錦標賽、廣島亞運同東亞運獎牌。但係你哋唔知嘅，係我曾經同佢一齊上過划艇班。1984年，我TI老細情商咗香港划艇會幫我哋啲体育導師開辦咗一個划艇班，由當時喺英國請嚟嘅總教練任教（此君後來成為暉女夫婿），當時暉女係獨木舟選手,Dr. Lobo應知此事。但佢想轉投划艇，所以鬼佬教練就安排佢同我哋一齊喇！當然後來佢嘅成就，我哋拍馬都追唔上喇！
井少，我已將全部硬照scan晒，所以揾相方便得很，我會陸逐將舊照登出，大家可以回味，下次我番香港，我會帶晒啲相，如果大家都將相數碼化晒，然後大家可以攞番份copy就好嘞！喂，二羅，九樓啲舊相有冇人搞吓？如果冇，比啲時間我，我可以scan 晒佢噃！
多謝老鄺續講童年經歷，請繼續。我都要繼續努力至得！
May B，唔好太辛苦，保重身体，仲有排捱喎！
係咁先，
嚤囉
No comments:
Post a Comment