紅棍着草避鄉窮，豬作盤川遇恩公。丹東冥門過不入，伶仃盡嘆煙酒濃。
佳譽環球業績勇，布衣美食勝富翁。一噏世紀傳奇夢，回歸親情自從容。
佳叔傳奇
十九世紀，東方古老大地，亂過亂世佳人，世界列強，紛紛東渡嚟搵着數。一場貿易糾紛，演成兵戎相見，英國佬喺珠江口虎門搞唔掂林則徐，改轅易轍，沿東邊海岸打到上京師，大清道光皇帝見勢色唔對，即刻投降。1842年8月29日，東西兩大帝國，喺南京簽訂和約，史稱南京條約。其中影響最深遠者，當然係割讓香港呢一條。此後 1860 北京條約，1897 展拓香港界址專條，呢三條條約就定下近代香港嘅界域。最具象徵意義嘅，就係羅湖分成華界英界，界南界北，所住嘅人都冇變，但係政治制度、社會形態，逐漸各走各路。就係呢條邊界，保護住香港呢口水井，唔受北方河水污染，一百五十年不變。
英清南京條约
1841 年，香港島只有 3650 人。1851 年，走太平天國之亂，香港多咗三萬人。跟住，清帝國滅亡，再有大量人口由廣東地區到港，到 1914 年，人口已經增加到五十萬。人類，逐水草而居啫，邊度安全，邊度搵到食，就去邊度。香港人，亙古以嚟，最叻就係用腳投票。
就係呢條羅湖邊界，造就咗以下嘅故事。佢影響近百年，四五代人嘅命運：
上世紀初，一對夫婦，男嘅叫郭根，係廣州人，女嘅叫李秀珍，清遠人，亦趕上呢個移民潮，為尋找更好生活，定居英屬香港。
當時鬼佬往喺維多利亞山半山，而大清遺民就散居各地。維多利亞城（港島）分成四個環：由西至東，就係西環、上環、中環、下環四個區，而家嘅灣仔銅鑼灣，就係下環區。「灣仔」，意思就係小漁村咁解，而家皇后大道東、大王東、西街之間嘅洪聖古廟，就係當時嘅海邊地帶；「船街」，嗰時係修理漁船的小船塢。隨住人口增加，灣仔同鵝頸開始大規模移山填海工程，加埋跟住嘅起樓工程，呢度在在需人。郭根亦成為建築工人，參加建設新香港。呢個時候，喺呢笪英屬香港地，移民只要肯努力工作，應付兩餐，應該問題唔大。
三十年代灣仔新填海區
1932 年 7月 3 日，星期日，歲次壬申年五月三十日（屬猴，巨蟹座）上午八點，灣仔利東街李五姑留產所，一個男嬰走出母體，要探索呢個世界。佢係郭拫同李秀珍嘅長子，個名叫郭少佳，佢就係呢個古仔嘅主人翁。我喺佢後輩，我叫佢佳叔。
佳叔係長子，可惜亦係郭家嘅獨生子，因為佳叔兩歲時，父親就因病去世，留下孤兒寡婦。成百年前，香港邊有社會福利？好多人就此被迫流落街頭，乞食為生。我細個時，喺街市，婦人抱住BB 坐喺街邊乞食嘅情景，見盡唔少。
上天眷顧，好彩佳叔香港有個姑媽，姑丈係行船嘅。佢哋雖然唔係乜嘢大富人家，不過，所謂多個人多雙筷，求其大家有粥食粥，有飯食飯，兩餐一宿，都負擔得起嘅。姑媽唔單止照顧兩母子起居，仲畀佳叔讀私塾。私塾就係類似私人補習。我記得我細路仔時，好多大人都唔識字！嗰時社會好窮，公營教育制度仲未建立好，有機會讀書嘅人，已經唔少嘢。稍微負擔得起，又重視教育嘅人，會夾埋幾個家庭，一齊請個老師教佢哋嘅細路讀書，就係私塾，廣東人叫「卜卜齋」。意思係：如果尐細路讀書唔聽話，私塾老師手上把「戒尺」就會兜頭扑落去，發出卜卜聲，個名就係咁解嘞！
佳叔係叻仔，讀書難唔到佢，仲因為有卜卜齋嘅訓練，寫得一手好字。人生難料，點估得到，呢手好字，大大影響佢嘅一生。至於影響尐乜？喺度，先賣個關子。
三十年代，係動盪嘅年代。佳叔出世前一年，正係九一八事變，女真老巢變咗滿州國。及至佳叔五歲，正係七七廬溝橋事變，日本全面侵華之時，冇耐，日本仔已經打到落廣東。好彩嗰時，中、港仲有條羅湖邊界，日本仔仲有些少忌憚英美。但係到咗 1939 年，第二次世界大戰打起嚟，日本仔愈打愈心雄，仲同德、意結盟，組成軸心國。1941 年12 月 7 日，日本海軍偷襲珍珠港，向英美宣戰，第二日，12 月8日，日軍空襲香港啓德機場、太古船塢、金鐘海軍船塢（俗稱「多吔」 dockyard ）及灣仔一帶。日軍司令酒井隆（戰後判為戰犯，於南京雨花台處決），當晚已經由太古船塢登陸港島，仲繼續向香港勸降。其實，較早前，港督楊慕琦接受英倫指令，已經積極防禦，由十二月開始，已經拉開香港保衞戰嘅序幕，但實力懸殊，唔使幾日，日軍已經佔領成個九龍，守衛軍全綫退守港島，於是又展開咗維港炮戰。
日軍轟炸港島
炮彈無情，12月8日嘅灣仔地氈式轟炸，空襲警報響起，佳叔同姑媽一家人都嚟唔切走入附近防空洞避難。炮彈就炸中柯布連道屋企，樑樑柱柱，跌到一屋都係。姑媽仲畀一舊大石壓往雙腳，幾經辛苦至救返佢出嚟。大門口又畀大石塞住，要喺旁邊開個窿至走得出間屋，今次炸彈炸中都冇傷亡，佳叔母子、姑媽一家都算上蒼庇祐喇。
嗰晚，唯有去朋友屋企借宿暫避，佳叔諗起屋企有一餅乾罐米。嗰時，冇米就註定餓死，佳叔一個人走返屋企，途中，被炸死炸傷嘅市民都未及清理，佢檻過屍體，終於捧返罐米返嚟，大家唔使捱餓，全家人都讃佳叔叻仔，佳叔當時只得九歲。
香港保衛戰結果係點，已經寫咗喺歷史，雖然香港孤立無援，仍然勇敢負隅頑抗。守衛軍纏住日本仔打咗三個禮拜，傷亡慘重。為免繼續生靈塗炭，楊慕琦終於喺 1941 年 12 月 25 聖誕日，宣佈投降。香港進入三年零八個月嘅日治時代。喺香港歷史中，呢個就係「黑色聖誕」。
由兒童踏入少年時期，佳叔就喺日治時代經過。姑媽屋企喺柯布連道，附近嘅皇后大道東就改名叫做明治通，向北行出海皮，灣仔著名地標，位於高土打道（又改咗日本名，叫「東住吉通」）嘅六國大飯店，就成為日軍俱樂部，改名叫做「千歳館」。佳叔一出街，就一定見到成街日本仔。三年零八個月咁難捱，不過。捱吓捱吓，終於都有個結束。
高士打道六國大飯店，日軍俱樂部，改名叫做「千歳館」
所謂惡有惡報，美國佬兩粒原子彈搞掂咗日本仔，一九四五年八月十五日，日本仔投降，倫敦即刻宣佈恢復對香港嘅殖民地統治權。八月三十日，英國海軍少將夏愨忽怱抵港，代表英國從日本仔手中收返香港，以誌繼續英國統治，呢一日，就係香港重光紀念日，並定為公眾假期。夏𢡱少將抵港開始，香港就實行英國軍事統冶，集中搞掂日本仔移交手續。直至第二年，一九四六年五月一日，曾經入過瀋陽戰俘營嘅港督楊慕琦，返返香港，繼續英國殖民地民官式統治。
和平後，好多人喺大陸回流返香港。香港係福地，復元得好快，戰後一年，香港人口已經回復戰前水平。此時，佳叔已經係十三歳，係入中學嘅年齡。雖然經歷三年零八個月，佢亦從來冇正式讀過小學，佳叔嘅「卜卜齋」功力並冇減退。佢成功考入當時頗具盛名嘅德明中學。德明中學有強烈國民黨背景，由胡漢民及陳濟棠等人，喺1934 年集資創辦。取名「德明」，係因為孫中山個乳名就叫德明。初創辦時，校址喺九龍旺角，後來喺馬師道灣仔碼頭附近設立分校，佳叔讀嘅就係呢間灣仔分校。，
嗰時讀書冇政府資助，就算讀到好叻，如果冇錢交學費，學校都好難留得你。佳叔母子，寄居姑媽屋企十年，單係食住，都唔算係一個大負擔嘅，但額外嘅學費，始終係一個難題。喺德明讀咗一年，佳叔唔想令屋企難做，就考入咗另一間學校，培中中學。雖然唔似德明咁具名氣，但都算係一間正正規規嘅學校，更重要嘅，係培中可以畀佢半工讀，佳叔日間返學，到放學時就留低打掃學校，工錢就作為學費。如是者，半工讀，三年就完成初中課程。各位，一九四八年香港，好多人都目不識丁，初中畢業，絶對唔係小嘢。你估佳叔會唔會變做商行、銀行職員，打白領工呢？
錯晒，十六歲嘅佳叔，居然出嚟行蠱惑！點解會變成咁？
青春期，當然係反叛時期，古今皆然。佳叔入左培中中學，不幸識到尐不良少年，佳叔年少氣盛，亦加入成為一份子。講開又講，由一八四二年香港開埠，至二十世紀四五十年代，香港社會，未甩貪污之風，警匪一家，兵即係賊，賊即係兵，一般人為求自保，都會或深或淺同黑社會有尐聯繫，尤其係做生意，或者小販之類，如果冇尐有勢力人士照住，好難搵食。所以嗰個時代入咗黑社會，未必係乜嘢壞人，佢哋只係尋求庇護人士而已。
不過佳叔又真係入咗黑社會搵食，佢所在嘅堂口就係聯樂堂，即所謂「單耳」，而且已經紥職紅棍，平時都有四、五條𡃁，跟出跟入。日常做嘅，都係蠱惑仔做嘅嘢，間唔中見到有錢肥佬肥婆，肥肥白白，佢都會去老笠，搵返尐使用。喺佢愈踩愈深之時，原來灣仔警方已經留意咗佢。1949 年，一單老笠案，灣仔差館拉咗佳叔，告佢行刧。佢拉咗去中環域多利拘留所（而家係博物館、法定古蹟）候審，唔准保釋。
域多利監獄
喺候審期間，警方整理證據，又安排認人手續。喺認人前一日，佳叔唔知惹咗尐乜嘢菌，又或者畀毒蚊虰親，對眼又痕又痛，佢搏命用手捽眼。監倉嘅污漕環境，咪只有愈捽愈衰，佢對眼周圍腫到雞蛋咁大，消唔到腫。第二日，警察帶佢去做認人手續，佳叔個樣變成咁嘅款，證人根本認唔到佢。到上庭時，係首名華人裁判官羅顯勝主審。基於疑點利益歸於被告，佳叔當庭釋放。佳叔自知呢單嘢的確係佢做嘅，佢被判無罪，亦係得益於羅湖呢條界，因為呢度係英界，行嘅係英式法律。
法庭判佢無罪，警方梗係唔信喇，不過冇計，呢度唔係華界，唔係公安大晒。當時灣仔差館有個華探長，佢個名，同後來獨立嘅星加坡總理個名一樣：李光耀。
佳叔出冊後，一日，李光耀探長同佳叔講：「你尐嘢，我一清二楚，我追實你，你冇啖好食，不如你同我合作，做我條針，當然有你好處，如果唔係，我實釘死你。」佳叔自知大鑊，如果唔應承李光耀探長，以後肯定出入監獄。但係要佢做探長條針，佢梗唔制，江湖兒女，義字先行，二五仔所為，佳叔點會做。
正是左右做人難，佳叔唯有着草一途。咁走去邊呢？哈哈，原來天無絶人之路。呢度又要拉開一筆，講返轉頭。
當佳叔拉咗入域多利候審，佢居然喺監倉認識另一個囚犯 --- 簡華。簡華因行刧罪判咗幾年監，當時就係喺域多利服緊刑。佢兩個之前素未謀面，但係一見如故，簡華叫佳叔去佢新州（近落馬州）鄉下先住落嚟，再等佢放監，大家再作打算。
咁着草就有着落喇。行過羅湖邊界，佳叔喺簡華新州鄉下住咗落嚟。冇耐，簡華就放監喇，兩個獄友終於喺新州團聚。
噏下噏下，原來已經噏到四九年尾。人民解放軍，將國民黨趕去台灣，1949 年中华人民共和国成立，解放軍繼續南下，10月28日，廣州市人民政府成立，葉劍英為市長。
佳叔住喺簡華鄉下時，大陸已經解放，而佳叔仍然未夠膽返香港屋企。所謂長貧難顧，長時間寄人籬下，始終都唔係辦法，佳叔點都要搵尐生計。
解放後，解放軍喺廣州，以黃埔軍校模式，成立咗廣州軍幹學校，希望提高軍隊水平。參軍嘅人都要經過考試，當時，大陸人，多數都係文盲，耍通過考試，一尐都唔容易。佳叔見咁好機會，一定要試下。當時由落馬州去廣州，都要幾個錢水腳，途中又住又食，去到廣州又投棧，又點都要置一件似樣尐嘅衣服，實在都要一筆盤川㗎。錢從何來？
「包喺我身上！」簡華拍拍心口。點包？成屋搵勻，冇一件嘢值錢。哦，醒起豬欄仲有一千0一隻豬，呢隻豬養咗好耐，係全家生計之所在。而家要幫佳叔籌水腳，賣豬係唯一嘅辦法。睇住簡華阿媽一路喊一路賣豬，呢個感人嘅畫面，佳叔今生今世都唔能夠忘記，佢心諗：「得人恩果千年記，呢個大恩，一定要還。」帶住賣豬錢，執好包袱，佳叔忍住淚離開新州，北上廣州，尋找新生活。
我問佳叔：「咁多嘢唔好做，㸃解要參軍？」「搵食咋！」佢答。
都話喇，考試難唔到佢。軍幹學校畢業後，佳叔卒之成為中国人民解放軍，駐黃埔軍區嘅其中一員。一如佢所講，參軍冇乜人工，不過，兩餐一宿，鞋襪衣服，供應充足。以當時大陸生活水平，喺部隊裏面，咁已經係人間天堂。
參軍後，佳叔簡華時有保持往來。一日，簡華邀請佳叔出席一個同鄉宴會，席間，簡華有一個同村兄弟，佢係兩廣縱隊嘅一個營長。當宴會去到高潮之際，營長由腰間揪出薄殼手槍，向天鳴槍助慶，真係夠晒有型。經簡華介紹，營長邀請佳叔過檔兩廣縱隊，此後，佳叔成為兩廣縱隊一員。
1950年6月25日北韓肥佬金揮軍南下，韓戰爆發。當時大陸解放後唔夠一年，百廢具興，中国，人就夠多嘞，不過，邊有物資打仗？當時冷戰高峰，蘇聯老大哥即刻借出軍需（要還㗎！），推中国人過鴨綠江，同美國佬死過。佳叔所在部隊兩廣縱隊，因為韓戰需要，被編入東北野戰軍，隷屬林彪麾下。即時轉移到遼寧丹東候命。根據資料，韓戰結束埋單計數，志願軍（其實係人民解放軍）死亡70至100萬！佳叔今次候命丹東，其實係敲緊死亡之門。
據說林彪並唔贊成韓戰，另一方面，又因為冷戰升級，人民解放軍希望加強華南海岸守衛能力，就將兩廣縱隊由四野徹出，返返廣東。佳叔被編入海岸炮兵團，駐守外伶仃島，握住珠江水道，保衞共和国南大門。海岸炮兵團係技術兵種，整編後，佳叔係海軍陸戰隊尉級官兵。
佳叔命硬，過地獄門而不入。離開冰天雪地、炮彈連天嘅殺戮戰場。一個屈尾拾，走入亞熱帶小島，呢度魚躍浪濤，鳥語花香，唔係天堂係乜嘢。
成個外伶仃島都係軍事基地，島上佈置咗三門 130 坑道海岸大炮。當時，解放後冇耐，人民解放軍嘅科技都依靠蘇聯，島上蘇聯軍事專家作威作福，不可一世，島上嘅官兵，多數人都唔鍾意呢尐蘇聯專家。不過，又咁講，所有島上嘅軍事科技知識，作戰技巧，都嚟自蘇聯，解放軍要靠佢哋傳授先進科技，就要低聲下氣喇。
佳叔每日嘅常規工作，就係海岸巡邏。如果遇到敵艦，就利用老大哥所教技術，用儀器將敵艦座標、移動數據傳呼返控制中心，控制中心就會發出指示， 130 大炮就搞掂目標物。聽起上嚟，好似好緊張，似乎分分鐘有機會海戰。其實，佳叔喺外伶仃島服役期間，和平到飛起，從未打過一場真正海戰，除咗常規演習外， 130 大炮，從未真正向敵人發過一炮。
130 坑道海岸大炮
人民解放軍係共和国天之驕子，操練有素，個個養到大大件件，係就係衣食無憂，可惜人工奀奀，無乜錢使。不過，外伶仃島駐軍，挾住天時地利，雖然冇乜錢喺袋，卻原來，茫茫伶仃洋，居然定時定候，就有物資，四方八面不停供應。點解如此，且聽我道來：
話說韓戰爆發，中美交惡，美國向中国實施全面禁運。不過，禁運又點阻止到小規模而頻繁嘅走私活動，大量禁運物資，好似螞蟻搬家，用小漁船過伶仃洋，經珠江口偷運入大陸。佳叔就係駐守呢個海域，佢唔係海關，走私其實唔關佢事，不過間唔中得閒得滯，如果想搵尐煙酒嘆，佳叔同尐軍中兄弟，揸隻炮艇仔駛出基地，喺伶仃洋截住一兩隻走私船，煙酒小食供應不斷，食都食唔晒。佳叔駐守伶仃島，其實都非常寫意，執勤時就係訓練、演習、保養裝備。下班後，又有文娛生活。此時，佳叔又識玩小提琴，仲拉得幾首歌𠻹。而家回想起，呢段外伶仃島軍旅生涯，原來，居然係佳叔一生人最優悠，最無憂無慮嘅一段日子。
除非轉做職業軍人，否則多數軍人都會喺入伍幾年後脫離部隊，回復平民之身。1953年 ，上級指示佳叔帶埋自己個人資料、黨案去廣州接待所等候調職指令。佢以復原軍人身份，加入廣州國營第一機械廠。軍人嘅專業就係保衛，所以佢就加入廠嘅宣傳保衛科。
以當時社會文化水平嚟講，佳叔雖然喺保衛科，但絶對唔係大老粗。佢有中學文化水平，而且寫得一手好字。機械廠設有黑板、壁佈，用嚟公佈廠內工人需知事項，以及黨同国家嘅宣傳資料。呢尐壁報，就係佳叔大顯身手嘅舞台。講真，廠嘅公佈，黨国嘅宣傳，絕對係八股文章，睇到都想瞓覺。不過，由佢寫上壁佈，就變成書法。壁佈牆經常圍住大堆人，佢哋唔係想睇政治宣傳，而係要欣賞佳叔嘅龍飛鳳舞。芸芸觀眾中，有位畫綫組嘅女工友，佢對佳叔嘅書法特別欣賞，雖然大家唔同部門，見到面嘅機會亦都唔少。大家由壁佈書法開始講起，到工作、生活瑣事、無所不談 ，冇耐，呢位女工友，就變成佳嫂喇。結婚，人生大事嚟㗎，梗係影響佢一生喇。呢段婚姻或多或少，都係由佢嘅一手好書法撮合而成。佳叔從一個吊兒郎當、任性不覊嘅青年人，變成一個孭起一頭家嘅大丈夫，心態轉變好大。呢段婚姻，絕對係佳叔重要嘅轉捩點。
喺國營工廠，做保衛科嘅廠衛，絶對係優差，人工高、權力大，仲唔使照顧生產，咁嘅筍工，係国家留畀復原軍人嘅優差。如果忽然有個廠衛，話佢想放棄筍工，做一個機械部門嘅學師仔，人工勁減不特止，仲將自己地位打到最低。你會唔會話佢「黐綫㗎？」佳叔真係咁做，點解？
原來，佳叔喺離開炮兵團調職廠衞時，心裏面已經有一個念頭，就係要離開大陸，返返香港。以當時嘅政治形勢，有呢尐諗法，已經係死罪，所以只好收埋喺心裏面，唔講得出嚟。不過，佢好似鴨仔游水，上身唔多郁，對腳就係喺水底搏命爬。佳叔不動聲色，但係就默默（又密密）部處。首先，要練就一身好本領，方便喺將來打拼。做廠衛毫無技術可言，佳叔申請轉做車間學徒，佢目標明確，好努力鑽研技術，成日捉住師傅傳授技術，好快就升做師傅仔，當然技術係有返咁上下。
結婚後唔夠兩年，1957年11月12日，喺正孫中山生日呢日，佳叔佳嫂生咗一個肥肥白白嘅BB女，取名筱珊。而家BB女出世，佳叔嘅移港計劃就要加快實行。1958年 年4月佳嫂又懷第二胎，哈，咁就係最佳時機，實行返港計劃嘅第一步：佳叔向廠領導，申請佳嫂落香港生仔，好彩佢人緣好，雖然手續非常繁複，過五關斬六將，終於獲得批文。佳嫂終於喺年尾，頂住大肚，帶埋大女落香港，兩母女，都係住喺姑媽柯布連道屋企。
郭家長女
1959 年2月，郭家長子喺香港出世，取名詩華。為咗向廠領導表示，郭家唔係要長住香港，佳嫂就抱住啱啱出世一個禮拜嘅詩華再返廣州，不過就留低長女係香港畀嘛嘛照顧。香港出世嘅詩華，要喺廣州住多咗十幾個月，先至再次得到批文，由佳嫂帶返落香港。至此，郭家移港計劃已經完成四分三。佳叔繼續出盡渾身解數，1964 年，終於獲批准落香港，用咗五年時間，郭家一家四口，整整齊齊團聚香港。
長女與嫲嫲李秀珍
郭家大仔、大女
一家四口，咁大棚人，邊有可能再寄人籬下，隔姑媽屋企兩條街，高士打道 59 號三樓，佳叔租咗一間騎樓房，一家四口終於有個小小自己嘅家。雖然係小小一間房，窗口就對正維港，望正對岸尖沙咀火車站鐘樓。個時，高士打道就係海皮，向東再行就係灣仔差館，再過尐就係灣仔碼頭，向海全部四層高石屎樓，所有天台裝滿霓虹廣告招牌，入夜後照亮維港海岸。當然其中一個歷史最耐嘅招牌，就係近灣仔碼頭嘅「味之素」招牌。紅紅綠綠霓虹招牌下，佳叔倚窗環視維港兩岸。數唔盡嘅點點小燈光，喺成千上萬一排一排嘅樓宇內射出，每一粒小燈光，就代表一個住宅單位。佳叔諗：「揾其中一個係屬於我嘅，真係咁難？我就唔
信！」佢畀自已一個挑戰。
高士打道维港海旁
組織家庭，雙方最好有共同奮鬥目標，大家努力前行。如果冇咁理想，另一半未必完全贊同理念嘅話，起碼都唔好係反對派啩？如果大家理念差天共地，一世流流長，咁點可以並肩行埋人生之路？佳嫂係簡單女子，只求安安穏穏。嫁夫生子，兩餐一宿，日出而作，日入而息。日常姊妹暢聚，竹戰為樂，已經係人生快事。落到香港，生活逼人，住又唔好，仲辛苦過做女嗰陣。佢唔明白，千方百計走落香港為咗乜？原來遠喺家庭草創之初，歧路已經出現。千算萬算，任佢點計，佳叔偏偏計漏咗最貼身嘅人！
一家四口，團聚香江後，正正係佳叔要將人生計劃實踐之時。佳嫂喺照顧一對仔女之餘，又會去酒店做清潔工以幫補家計。佳叔嚟講，以佢喺國營機械廠練就嘅一身技術，要搵一份工，絕無難度，好快就喺西環搵到工。佢喺工作搵錢之餘，從來冇放棄創業嘅理想。第一份工做咗年幾，佢就不斷轉換工作環境，目的係考察行業內嘅運作情況。而佢嘅工作能力，好快得到行內人肯定。
一日，有機械廠由意大利入口咗一架羊毛紡織機，個老細知佳叔技術耍家，就畀佢一個挑戰：要佢模仿呢架機器，造一架出嚟。佳叔當然不負所托，老翻咗一架出嚟，行得走得，價錢仲平好多。於是大批生產，供應當時發展蓬勃嘅香港紡織業。呢次成功，當然賺咗一筆錢，佢喺行內個朶更響。機械廠老細仲提供資金，幫助佢買機器設備。佳叔終於喺灣仔利東街有自己嘅第一間廠。呢位老細，可以話係幫助佳叔，踏出創業第一步嘅恩人。
香港地，大人一早出街搵食，就留低細路喺屋企，呢尐係常態。嗰時細仔北華已經出咗世，一日，兩兄弟落樓玩，佢哋行過高土打道，細路唔知危險，沿住海邊堤岸嘅石級，兩個落下低尐，落下低尐，卒之拖鞋踩踩到水面！玩玩下，一個大浪衝埋嚟，兩個細路好快就冲咗出海中心，可能得到馬祖娘娘庇佑，佢哋浮吓浮吓，好彩始終喺水面。附近停咗美國軍艦，水兵見到兩個細路遇險，即刻用小艇救咗上船，又有熱飲又有零食招呼，然後交返灣仔差館。佳叔接到通知去差館接返兩個仔，恍如隔世！心諗，「好險，郭家仲要繼後香燈㗎。」
拖住兩個仔返屋企，一段往事湧上心頭，係駐守外伶仃島嘅日子。一日，佳叔正喺伶仃島基地做緊例行海岸巡邏，忽然翻起大風浪，離遠有艘小漁船好似好唔掂咁，冇耐，漁船就畀大風浪打埋岸邊，佳叔即刻指揮救援，將漁船一家數口救起⋯⋯，佳叔記返起呢個片段，心諗：當日，我係海軍，救起一家人，今日，又係海軍救起我一對仔。我一個善念興起，救人一家，而家又有人幫返我，令郭家得以延續家業。以後都要廣結善緣，造福後代。
灣仔差館海皮
住得太近海皮都好危險，況且，而家搵多咗錢，就唔住房仔咯。一家五口就搬咗去駱克道新樓，住得大尐，又舒服尐，又放心尐。佳叔一家努力工作，必有回報。冇幾耐，就喺機利臣街，買咗佢哋嘅第一層樓！佳叔終於喺維港岸邊，放射出屬於佢嘅一點燈光。
利東街間廠做咗一陣，因為貴租就搬咗去西環。後來佳叔買咗船街兩個相連單位，一邊做屋企，另一邊係工場。另一方面，喺青衣工廠大廈，又成立自己工廠，取名「佳業」。訂單嚟自歐州，澳州，短短十幾年間，佳叔已經喺呢行打響名堂。
喺青衣工廠附近，佳叔偶然認識一位女士阿芳，佢已經有仔有女，當時，身世頗為淒涼，好似搵兩餐都唔係好掂咁。佳叔樂於助人，佢建議阿芳，可以喺工廠大廈附近做流動小販，賣咖啡奶茶三文治。仲親手幫佢用木材造一架流動茶檔。阿芳努力經營，茶檔生意唔錯，佢嘅生活難題就搞掂喇。眼見佢工作勤懇，手快腳快，佳叔此時正係用人之際，就叫阿芳唔好做茶檔，全力喺青衣工廠幫佢手。佳叔真夠眼光，廠務工作，阿芳好快上手，對外接單，對內控制成品質量，短時間就已經可以獨當一面。佢讀書唔多，不過好勤力，好快就可以用電腦嚟工作，佢仲可以攞住字典同鬼佬客人溝通。有一次佳叔同阿芳嚟澳洲會客，當時我都在場。以一個讀書唔多嘅人，阿芳嘅能力實在好得，佳叔冇睇錯人。
青衣工業大厦，佳業大本營
佢嘅能力唔單止在於工作，阿芳嘅廚藝亦好唔錯。佳叔青少年時期都係貧困，冇乜食過好嘢。做廠後就搵到個錢，佢唔使著靚衫，住靚屋，佢就最鍾意食靚嘢，飲靚酒。每日辛勤工作後，佳叔會去荃灣街市買靚餸，新鮮魚蝦有之，靚菜鮮肉有之，再交帶烹調方法，阿芳就會如法炮製，十之八九，唔會令佳叔失望。阿芳由七十年代幫佳叔工作，直到今時今日，佢偶然都會嚟佳叔度，煮餐靚嘢過佢食。此是後話。所以話，緣份嘅嘢，就係天意，如果冇遇到佳叔，阿芳佢嘅一生又會點樣過？
荃灣街市
社會營商環境並非一成不變，佳叔亦不斷改變自己，去適應日新月異嘅市場變化。七十年代，大陸正在改革開放，在在需財，亦在在需材。佳叔挾住自己行內嘅技術知識、海外市場連繫，成為第一批返大陸支援改革開放嘅先鋒香港廠家
當時大陸鎖国三十年，對海外市場完全無知，更無論現代化生產技術。大陸要同世界接軌，經濟起飛，就要對香港廠家禮貌周周。佳叔喺大陸得到特殊禮遇，所以好享受嗰種高人一等嘅地位，而且搵錢亦容易，自此就將生產重心轉移到大陸。
大陸招港商投資做廠，表面上政策寬鬆，其實只係權宜之計。每日對住你嘅一張張謙恭笑面背後，其實就係一個個惡毒嘅心，佢哋等緊有一日，學晒你尐嘢，有毛有翼嘞，就取而代之，仲加多一腳踹落去，務使你永不翻身。呢個道理，佳叔瞭解得一清二楚，所以喺享受盈盈笑面之時，亦不忘處處設防。
幾精明都好，幾十年生意，邊會永遠一帆風順，梗有低潮，梗有畀人跣一鑊甘甘地嘅時候。
江門係佳叔嘅根據地，當地有個叫蕭永樂嘅富商，佢要同佳叔合作設廠。呢位蕭先生係有心人，但係唔得閒照顧盤生意，就叫佢老妗梁祺生打理間廠。點知呢位梁生不務正業，又信謡言，以為佳叔資金周轉有困難，原料供應仲處處托手踭，搞到間廠無法生產，幾經轉折，最後呢位梁生一死以謝天下。顯然，佳叔覺得呢次係個失敗嘅投資，係一個入骨入肉，慘痛嘅教訓。佢總結經驗，認為做生意，必須杜絕謡言嘅源頭，經常提醒自己，有尐人，成事不足，敗事有餘，永遠唔係生意夥伴。仲有，喺大陸做生產，其實唔一定需要有自己嘅廠，於是佢改變攻略。
佳叔係精益求精嘅人，出品精緻，好多對品質有高要求嘅客戶，都專誠要搵佳叔定貨，「佳業」就係質量嘅信心保證。喺星馬、歐洲、澳洲都有穩定訂單。佳叔收到訂單後，就預備材料，定下生產計劃。搵相熟並且有信心嘅廠接手生產。其中，如果有技術問題，佳叔會親自指導。由開始至結束，佳叔同阿芳，都要牛咁眼𥄫實成個生產過程，以確保符合定單要求。完工後，又要監督成個付運工序，唔畀人出到蠱惑。最後亦係最緊要，由頭到尾，負責生產嘅廠，都唔會接觸到落單嘅客人，咁就長做長有嘞。呢個做生意模式好成功，如是者由七十年代開始，做到 2010 年，佳叔一直住喺江門，樂不思蜀，從未諗過再返香港。
而家回帶，睇返七十年代。佳叔喺香港埋頭埋腦鑽研技術、擴展業務，根本冇時間照顧屋企。而佳嫂又有自己生意。大家都睇唔好對方嘅生意，雙方各執一詞，冇辦法溝通到，矛盾、衝突就一發不可收拾。與其日日面阻阻，佳叔索性搬去青衣工廠住，之後上埋大陸定居，四十年嚟，再冇返過屋企。話雖如此，佳叔都係舊式古老人，雖然唔返屋企住，仍然視呢個係老家，過時過節、有家庭聚會，佢都會盡量出席，詩華要留學、北華要置業，發展生意，等等，佳叔都會出錢資助，講到尾，大家都係一家人。
不過，前十幾年，仔女都係佳嫂，棉乾絮濕，一手一腳湊大，離家嘅老豆，喺缺席審判下，仔女偏向同情被遺棄嘅阿媽，就係必然嘅判決嘞。
大女，大仔，細仔及姨媽一家合照，荃灣十三米半
踏入千禧年，佳叔過晒花甲之年好耐，年紀大，機械壞，佢發覺自己有青光眼，又咁啱，佢識得江門市人民醫院嘅院長。院長個女係眼科醫生，而且親自操刀，呢個係小手術，唔便留醫。手術做得好好，自此，佳叔對大陸醫療有咗信心。
2010 年4月，佳叔發現有胃癌，做手術切徐係唯一方法。佳叔有咗上一次眼手術嘅良好經驗，以為照辦煮碗，應該冇問題。點知大手術同細手術嘅分別咁大，大陸醫院完全唔顧及䕶理服務，病房管理亂七八糟，衛生條件又差到離晒譜。佳叔喺手術後患上嚴重感染，送入深切治療，命懸一綫。佳嫂、仔女都趕去醫院睇佢，情況危急到不得了。阿珊知道佳叔病成咁，完全係醫院嘅衛生環境造成，要保住條命仔，一定要離開呢個地獄醫院。所以阿珊千方百計，安排特別醫療交通運輸，卒之將佳叔送返香港。好彩佳叔福大命大，加上平時身體都唔錯，喺香港完善、先進、合人道嘅醫療照顧底下，卒之逐漸康服。
領教過大陸地獄吏醫療，佳叔結束晒大陸生意，搬返香港。落葉歸根，一家人卒之重聚香港，重聚之時，原來已經係四十年後嘅事！
喺香港調養身體之餘，佳叔念念不忘嗰尐，喺佢生命軌跡中，曾經出手相助，幫過佢嘅人。趁住仲係行得走得之時，佢返咗幾次大陸，探訪以前嘅生意合作夥伴、朋友。又順便再遊故苑，重溫美好舊夢。
不過，最令佳叔瞓唔着嘅，就係簡華一家。
故事開頭，已經講過簡華賣豬籌盤川嘅經過。其實，後來簡華嘅仔曾經喺佳叔工廠打過工，佳叔當然以親子侄咁對待。一日，佳叔正在出差在外，唔知發生咗乜嘢誤會，簡華個仔離開咗工廠。佳叔得知呢件事，想話約簡華兩父子瞭解，但已經見唔到佢地，從此，四十幾年，失去音訊。佳叔幾十年來耿耿於懷，覺得對唔住恩人。
2014 年，阿珊得知老豆呢單心事，又探聽得到簡華已經移民荷蘭，即刻係荷蘭嘅華文報紙登尋人廣告。幾經轉折，終於聯絡到簡華家人。簡華家人行事低調，對往事亦唔願多講，只透露簡華父子早已仙遊，更加婉拒佳叔想話去墓前拜祭嘅請求。雖然未能盡心意，但係終歸總算有個了斷，佳叔亦可以放低呢個心靈包袱。希望簡華父子，放下塵世恩怨，早登仙界。
人世間分分合合，幾時到你計算？緣起則聚，緣滅則散。散完可再聚，聚久又必散。呢尐都係天意，我哋可以做嘅，就係珍惜每個見面時間。
點可以忘記 2010年4月25 嗰一日，我喺雪梨參加緊一個中大校友嘅旅行分享會，iPhone 響起，香港嚟嘅電話，話佳叔喺江門醫院病危。阿珊即刻買機票。一個人飛香港直踩江門。
而家諗返起上嚟，阿珊佢唔夠兩歲就落咗嚟香港，佳叔又要到 1964 年返落香港，一家人至可以團聚，喺嬰兒至入小學時，兩父女分隔中港兩地，見唔到面。得到佳叔喺香港，佢又要為自己事業拼搏，又有幾何有時間兩父女可以談天說地？到咗阿珊入中學，佳叔同屋企嘅矛盾愈嚟愈深，索性搬咗去青衣工廠住，再唔返呢個屋企。此後幾十年，阿珊畢業、工作、結婚、生仔，仲喺1992年移民。計起上嚟，幾十年嚟，兩父女一齊嘅年數，兩隻手數晒。大家又冇乜溝通，誤會又一大籮，嫌隙又深，父女感情又點會好。
大女結婚敬茶
親情呢單嘢又真係奇妙，就算嫌隙幾深都好，阿珊一聽到呢個消息，眼淚就滾出嚟，話晒都係老豆。
病，從來都唔係乜嘢好事，不過，因為佳叔嘅病，就修補咗父女嘅關係。喺養病期間，阿珊經常飛返香港陪老豆，佢哋多咗衷心嘅交談機會，大家都知道要從對方嘅立場睇問題。當瞭解對方嘅感受，就會明白大家以往所做嘅事、所作嘅決定，都係有佢嘅原因。再唔講，呢尐原因，好多時難分對錯。緣份嘅嘢，邊個可以講得清楚？
2016年1月，阿珊嘅蔣家大小姐專程由澳洲飛香港探望公公，呢個鬼妹仔原來同公公好好傾。佳叔呢五年喺香港，佢嘅思想、人生觀，對人嘅睇法，一定有好大嘅變化。2016 年初，佳叔仲話自己信埋耶穌，真係神蹟嚟喎。2016 年 5月，外孫、孫新抱就會有新成員出世，佳叔等緊睇個外曾孫出世，四代同堂喇！
佳叔與大小姐
2016 年，佳叔踏入人生嘅第九個猴年，今年 7月 3 日，同埋 舊曆五月三十日，係佳叔嘅八十四歲生日。活到今時今日，佢對人世間嘅責任已經完成，並無虧欠任何人。剩下要做嘅嘢，就係享受每一日，佳叔最緊要放開心情，開開心心過每一天。
詩云：
紅棍着草避鄉窮，豬作盤川遇恩公。
丹東冥門過不入，伶仃盡嘆煙酒濃。
佳譽環球業績勇，布衣美食勝富翁。
一噏世紀傳奇夢，回歸親情自從容。
再噏過，
嚤囉
