2011.01.14 問題試答

2011.01.14 問題試答，

首先，多謝咩博送來甲子宴禮包，內容十分精彩。好彩緊記林副統帥教導：學習毛主席著作，要帶著問題學。活學活用，學用結合，急用先學，立竿見影，在用字上狠下功夫。

鬼知你去咗個墳場，重要係鬼佬嗰隻。然後望住啲我唔地除嘅字？？我即刻記起林副统帥以上嘅教導，馬上谷歌一吓，○Ｋ，得咗！試答如下。

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

本世紀六十年代中，因屬金記同門，份屬學兄學弟，少年羊咩認識小喇叭於風球高懸之中，兄介紹以英特納雄內爾觀，想此對其日後世界觀之形成，有重要啟廸作用也。至於向左傾斜成點，以及九樓時菜炒雞心，對心理發展有冇影響，此乃後話，不多談。

四十多年後，2009年夏天某日，咩博、長毛小喇叭重遇於東方之珠某地，承諾到訪法國巴黎時，一定要到呢堵牆。

距離艾菲爾鐵塔八公里路程，有一座拉雪茲公墓P’ere Lachaise Cementery。喺公墓嘅東北角，有一堵牆，牆上有法文刻有Aux Morts de la Commune 21-28 Mai 1871.

1871年5月21日，200名巴黎公社員於此受敵軍圍困攻擊，到5月28日敵軍占領公墓，147名公社戰士就喺呢堵牆下，高呼Viva commune英勇就義。

2010深秋，公墓裡面楓葉開始變紅。一個落住微雨清凉嘅早上，咩博攞住一支（得一支？）紅玫瑰，走到石碑。放下玫瑰，對公社社員表示敬意。退後企定，凝望碑文。「紀念公社死難者一八七一年五月廿一至廿八日」。咩博嚐試用法文讀出碑文，雖然有好重嘅Hongie accent，不過，佢哋應該都唔會好介意啩？

此時 ，耳畔響起國語版嘅國際歌La internationale, 法文原歌詞係1871年6月鮑狄埃Eugene Pottier所寫，佢亦係公社社員﹔當時用馬賽曲嘅譜唱出。要到1888 年狄蓋特Pierre Degeyter再重新譜曲，就係咩博而家唱出嘅國際歌嘞！

口哼住La internationale, 腦閃出Uni de la Staney。六十年代中葉，一個仲夏風暴，青年咩博被派入史丹利大學深造。學院內有唔同專科供學員學習。例如木工、印刷、造鞋、時裝，美食等。（Doc，喺九樓厨房，你曾對我講，你曾喺學院屬下Stanley’s  Kitchen美食殿堂研習厨藝。學到炒飯前要用蠟捽落個鑊度嘅，記得冇？喺九樓煮飯比我哋食時，有冇靜雞雞重施故技呢？）

一次，有人組織一個午夜快閃音樂時段，曲目係在此剛學會嘅國語版La internationale。羊咩同學亦收到一份手寫歌詞。時間一到，有人領唱，羊咩同其他宿生一起和應。舍監當然好唔likie，嚴厲懲罰在所難免，全體快閃黨均被打鑊金。當年領唱者已騎鶴西去，唯此一學院經驗，永誌羊心。

眼望住碑文，微雨洒下，黑色大褸、面、頭髮、鏡片都淋濕咗，唔知是雨是淚？

回首前塵，窮半世紀尋覓蓬萊，認定英特納雄耐爾乃人之造極境界，並且「一定要實現」。身體力行，希望呢片東方古老大地，人人可以免於苦難、恐懼。在位者皆為被選出之天下為公之賢與能，民皆講信修睦，人不獨親其親，子其子。使老有所 依，壯有所用，幼有所長，鰥寡孤獨廢疾者皆有所養。但現實係：高妙境界可望不可即，相反，重越行越遠。居然走咗去北歐瑞士，又橫跨赤道，殖地於袋鼠之鄉。再回望此藍色小行星，半世紀以來，所有號稱奔向馬記蓬萊之邦，其所作所為，已毋須多作評論。正是

心嚮住蓬萊，想身處蓬萊，仰望蓬萊所在，已被浮雲掩蓋。

想找到蓬萊，偏不見蓬萊，遍歷人間世外，費盡勞力錢財。

遙看，天邊飛鳥﹔原野，夕陽照耀。

頓覺，寕靜舒泰﹔恨怨，漸似開解。

方知卻原來，不必盼蓬萊﹔已是埋藏心內，蓬萊就是愛。

愛，唔係講嘅﹔要做至得！實際行動：

比多啲時間你嘅家人、身邊嘅人、愛你嘅人，以致需要你嘅人……。

一念及此，咩博充滿信心，緩步離開。心情雖然仍舊沉重，但塵歸塵，土歸土。過去嘅已成歷史。今夜星宿將再現，明晨朝陽亦會重臨。鬥士丟下包袱，輕裝再戰江湖。

微風吹起石碑牆地上半紅楓葉。有一日，我會再嚟探吓你……。

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

問題試答完畢，請咩博、桑主食、馬仔賜教

嚤囉