2010.08.18 噏得就噏，好過撈汁

 2010.08.18 

噏得就噏，好過撈汁

老友，

啟榮晨運有二胡伴奏，認真犀飛利，唔係好多人可以得到咁好嘅侍遇者。

咁樣啟榮應該晨多啲運至得啦！

噚晚收到啊木嗰個電郵，一打開唧，就見到燭光掩掩映映﹔仲聽到叮叮噹噹嘅仙界音樂。跟住画面一幅一幅咁轉，又見到啲又似詩，又似詞，又似佛偈嘅文字。內容又好似好深，又好似好淺，又好似好勁咁嘅人生哲理。

點解人到咗咁上下，就會寫啲咁得意嘅物體嘅呢？真奇怪。

呢個星期六係袋鼠國嘅大日子，係聯邦大選，即係選國會議員同執政黨。通過一人一票嘅不記名投票選出下一屆聯邦政府由邊個黨執政，勝出政黨嘅黨魁就係總理。總理又訂出內閣成員，如財長、部長（唔係酒樓部長，而係國防部長等等）嚟組成政府，治理國家。輸咗個個黨（第二多票嘅黨）就成為反對黨，佢個黨魁就成為反對黨領袖、影子首相。佢哋亦組成影子內閣，又有對口嘅影子部長。例如影子財長、影子移民部長等等。

執政黨由人民授權組成政府去管理國家嘅﹔而反對黨亦係由人民授權組成影子政府去昅實現屆政府嘅！佢哋去挑戰政府嘅政策，揭露政府嘅不當行為，並不構成破壞社會和諧。更唔會比人拉咗去告以顛覆國家罪。因為大家都知道政府唔等如國家！

我哋咁上下就要顛覆政府一次，用咩方法？用選票囉，一張紙咋，唔駛飛機大炮喎。

幾時我嘅故鄉都可以咁嘅樣呢？

唔…………………！

 

嚤囉