2010-11-28 成功天水圍，唔止噏得威，重要落地砌

2010-11-28

成功天水圍，唔止噏得威，重要落地砌

柯拿，大家好，

多謝啊鳴比我哋睇到啲大嚿熊嘅真面目及其所作所為，原來飽暖（你睇佢哋着住靚皮草，就知有幾暖）之後，真係會咁諗嘅。啊鳴，你要再揭露多啲真面目比我哋睇啦！

當然要恭喜二羅，努力必有回報，而家係踏出第一步，老友，好多挑戰喺前面等緊你（死囉，活到而家，重有咁多挑戰），努力。你大鑊喇，咁多人支持你，係咪要定期作出匯報咁話呢！

講起挑戰，我喺舖頭，間唔中有啲客同我講：mate, I’ve got some challenge for you. 我就會咁講：I don’t want challenge, I want money.

啊蚊講起下鄉，我哋都搞過啲咁嘅嘢，印象中係東涌？捉蜆喂鴨？有冇人記得呢？

今期，呢個地球都好多嘢沸沸揚揚，北韓金家又喺度搞三搞四、偉大祖國當然有好多值得講嘅話題、我嘅故鄉東方之珠又有直資學校賬目混亂嘅問題。不如就講吓教育。唔講香港，講袋鼠。

先作簡單介紹：正規教育由5歲幾開始，之前叫學前教育pre-school，再細啲叫playgroup。多數由NGO（如教會）團體開辦，要比錢嘅，所以，我哋窮等人家，唔可以一星期去足5日，因為太融喇。不過，低收入家庭，政府係有津貼比嘅。

正規教育，由小學開始。公立小學多數叫Public school，由kindy （ kindergarten）一年，再上一至六年級，即小學共七年。中學high school，由七年班至十二年班。十年班時考一個會考school cert，不少人考完school cert就去做嘢，又或者進入工業學院Institute of Technical And further Education簡稱TAFE讀張cert或dip（好似IVE），再做嘢。不過多數人都會讀埋11、12年班，再考HSC（即higher school cert），入大學就靠HSC嘅成績喇！

 學校又今為公立及私立，多數人都入公立學校，名義上係免費嘅，因為經費所限，學校都希望家長可以捐啲銀比學校作日常駛費，例如日常維修，或加建設施（如裝冷氣）等。每年開學，家長都會收到大信封叫捐錢。多數都好樂意捐，又唔係好多，學董伯伯話：學校好，細路都好吖！不過冇錢或者唔想捐，係冇人逼你嘅，啲細路亦唔會被岐視。細路入學係分區嘅，你住嗰區，嗰區學校就一定要收你。

政府亦尊重個人嘅選擇自由，所以就有私立學校。有啲係貴族學校，學費都講緊每年10萬8萬袋鼠幣，重未計學乜學物，又去瑞士地理考察之類。有啲較中產嘅教會學校，多數係家長想子女喺該宗教氣氛下成長。雪梨就有伊斯蘭教學校，女仔都要包頭包髻，不過就冇儒釋道學校。政府會按人數，將錢過比私校，以體現人人有接受並選擇教育之權利。

又為咗要照顧個人差異，喺某啲公立小學內，會設 opportunity class（唐人叫精英班）。又設立selective schools（唐人叫精英中學）。但實際上selective schools有academic（唐人最鍾意），sports，同music嘅。

有冇名校呢？當然有！每年HSC放榜，坊間都會將學校以成績排隊，愈排得頭，就愈名啦！去年，全New South Wales排頭十間中學，有8間係公立學校（咁當然全部係精英中學啦），教會學校及貴族學校，成績並不突出，當然唔會太差。公立學校，包括精英中學十分平民化。即係話有錢冇錢同成績好壞並無必然關係。相反，讀貴族私校嘅人，因為佢哋穿戴誇張（又闊邊帽又棗紅外套）所以反而會被啲公校學生取笑，並唔會因為佢哋有錢而特別羨慕佢哋。因為自信唔係用錢建立起。

讀大學係要比錢嘅，不過唔叫學費，叫做HECS（higher education contribute scheme），可以每半年選科之後即比﹔又可以唔比住，到將來揾到錢，要比稅時再逐啲逐啲還。如果不幸（或幸運）揾錢太少甚至失業，就唔駛還住，到好啲收入再還過。如果讀緊大學時家境太窮，重可申請＄援助，叫Austudy，如有老婆／老公，仔女，政府幫你養埋，重有租金津貼，包你唔駛瞓街、包餓你唔死，重有書讀！有咁大隻蛤乸隨街跳，問你怕未？我識得有港人，移民到此，仔女讀完大學，回流返港，咁以後都唔駛還HECS！咁就太過份喇！

咁係咪讀唔成書就大劑呢？咁又唔會喎，因為到大家出嚟打工時，一個政府醫生、律師，同一個政府園丁、清潔工，除稅後所得分別並不十分大。又或者一個有自己生意嘅醫生、律師，同一個有自己生意嘅水喉匠、電工比較，邊個收入好啲都好難講！

因此，呢度讀書就可以好輕鬆，當然如果你選擇要入啲競爭大嘅學科，就一定要好緊張成績喇！就好似大多數唐人、印巴人。所以排得愈頭嘅精英中學，就愈多唐人、印巴人。即係話，讀書嘅壓力唔係學校比你，唔係制度比你，更唔係社會比你，而係你自己嘅要求而己。

信不信由你，呢度啲學生好鍾意返學，因為返學就等如玩。至於年尾report永無話唔合挌，只會話進步中。所以皆大歡喜！

又到每周一相呢個環節嘞，上周問，同淑姐飲汽水嘅美少女係邊個，連佢自己都唔知，所以答案係……一個謎。歡迎有能者繼續解謎。至於啊蚊估係白雲沙士，我睇都啱咗八九成，恭喜你喇！

好嘞，呢張相你又可以諗起啲乜嘢呢？

再噏過

嚤囉