2010.09.30 噏完又到老咩頭，嚤囉身世之來由 - 九樓煮飯記

2010.09.30   

噏完又到老咩頭，嚤囉身世之來由 -  九樓煮飯記

跑馬地翠屏山，係大遊行首選地點，圍圈玩集體遊戲（1973年）

柯拿，大家好，

馬仔指控老咩頭喺湯、飯中加料，搞到今日香港政局咁大劑，究竟係真唔係，呢一層要疑犯簽供畫押至可定案。

不過我想老咩頭講吓一啲歷史時序嘅問題，我1968年升中，入讀香港雞（當時進步力量仍未進駐，校徽係洋紫荊），我上九樓十分有可能就係呢一年，好可惜我對我第一次上九樓係完全冇晒記憶！！

我點識上九樓，應該係咁嘅。升中後，我仍活躍於魚職同小販工會，我係工會文宣隊嘅一員，國慶及其他慶祝日子，酒會舞台上都留有我嘅影子，口琴演奏，話劇，表演唱（即係一路跳舞一路唱歌咁解），相聲，三句半……無所不為！我記得我自編自演過兩齣話劇：一齣係講美國佬登月，當然係話佢浪費巨資而唔理國內貧民死活！另一齣係講香港奴化教育，叫人去讀愛國學校！呢兩齣巨著都喺小販工會天台公演。

當時我有個同屋住，佢喺寶覺讀（佢係老夫子嘅同學，老咩頭記唔記得老夫子？啊送應該都記得老夫子），佢叫黄麗芳。佢對我講，「你而家係中學生，應該參加一個學生團體，好過上工會。」咁我就上咗嚟喇！照計應該係68至69年間嘅事，嗰時叫學生樂園，街坊叫呢度做學生工會！

當時波枱開喺室內，並未有國術組，我加入嘅係口琴組（係咪由老咩頭領導？）口琴組成員仲有死火德，飛仔Ｘ（唔記得咗個名，新法嘅），夏淑儀，曾vulture（啊蚊，唔係貓sir），老妖。當然仲有酸梅姐姐喇！，有冇死佬仁份呢？

老咩頭記唔記得第一次係中總搞variety show，有口琴組表演，高佬吹小號，vulture同我表演你套相聲，唔記得晒啲稿，喺台上大爆肚，台下笑得最大聲嗰個就喺老咩頭你！當然仲有海仔飾演孱仔華同我笑口棗嘅話劇！

拉得太遠，

我嘅問題係，我應該係68年下半年至69年間上九樓嘅，喺邊個同我上九樓嘅？邊個招呼過我？邊個叫我入口琴組嘅？

我食老咩頭煮嘅晏仔，應該係介乎70年尾至72年我讀緊餸欄時嘅事。老咩頭話長毛上過九樓食過佢煮嘅飯，實在係幾時嘅事？我有冇可能喺九樓見過佢呢又？

希望老咩頭可以替我釋疑！

恭祝怪俠一枝梅展覧馬到功成，會場內人山人海，會場外車水馬龍……等等！總之all the best啦！