2012.09.12 如果斯文噏得佢掂，駛乜爆粗鬧禮義廉

2012.09.12

如果斯文噏得佢掂，駛乜爆粗鬧禮義廉。

柯拿，大家好，

星期六收早，四點鐘拉閘鬆人。路路暢通，唔駛半粒鐘就返到屋企。例牌冲個靚涼，換返舒適嘅笠記牛記，泡壺靚茶，坐低晾起對腳，一面嘆世界，一面下載收音機節目。坐吓坐吓，咦，好似有啲嘢未做，係乜呢？……呀hah，差啲唔記得，原來要去投票。嗱嗱聲，就咁著住笠記牛記，踢住爛拖鞋，跳上車。票站就喺屋企附近一間小學，唔駛五分鐘就到。

票站門口疏疏落落企咗啲拉票嘅人，見人就畀張單張。冇標語，冇橫額，冇嗌口號。不同嘅候選人團隊（乜鬼團隊！只係小貓一兩隻），互相有講有笑，絕冇鬆踭踢腳篤背脊，氣氛和諧。

侯選人係乜水？政綱係乜？我一概唔知。選邊隻鬼？……你同我定，早幾日，已經問定大少爺、大小姐，佢兩個都係自由黨Liberals嘅fans，我諗都費事諗，攞咗選票，就喺自由黨條友個名旁邊戙個「1」字，掟落票箱，就投咗票啦。

喺袋鼠國，投票唔只係權利，而且係義務，18歲以上公民，必須要喺三級政府選舉中投票，冇投票者要罸錢。都有唔駛強逼嘅，例如太老（唔知幾老？）、原住民、身在海外者。呢啲人有權選擇投、或者唔投。上次阿珊喺大選時身在香港，佢可以選擇去駐香港領事館投票，不過佢要同啲friends wit wet，所以冇去投票，冇耐，就有信寄嚟屋企，我回信解釋清楚就冇事啦。

其實，作為普通公民，多數人對政治都唔會有好大興趣。留多啲時間，去玩又好，去揾銀又好，同家人相敍又好。不如好似侯寶咁，做吓義工，派吓月餅。anyway，做乜都好。好做唔做，做乜去搞政治？政治，留返畀政客做。

好可惜，人係一種絕對信唔過嘅動物，佢坐咗上位，貪念就出晒嚟，就會唔捨得個寶座，就會利用權力去謀取私利（包括有形嘅、無形嘅）。對唔住，人人都係咁賤格，可能係程度唔同而已；人又係咁，鬼又係咁，全世界一樣。所以就要有制度，去昅實呢班友。

1215大憲章以來，西方式民主制度都玩咗800年，雖然冇話完美無瑕，但肯定係操作得十分成孰。袋鼠國嘅多黨制，兩黨政治，互相制衡。政府有反對黨昅實，反對黨有對口嘅影子內閣，無論教育、財經、醫療、福利….，一一有專家用公帑昅實執政政府嘅一舉一動。反對黨唔只係「是其所是、非其所非」（唔好學亡國興話：是其是，非其非），而一定係雞蛋挑骨頭，而且有乜依郁，一定彈劾政府，而且隨時取而代之。執政政府見有人昅住，都唔敢太離譜。

因為養咗隻反對黨watch dog，普通袋鼠國民生活得幾舒適，飲吓啤酒，睇吓Rugby好過喇。

上周，青年學生逼爆公民廣場（好名字！），連過氣社運老兵都出嚟撐場，重搞到絕食咁悲壯。一方面，我好佩服佢哋嘅道德良心。另一方面，我覺得好可悲，餐餐都要人上街show up去爭取呢啲，爭取嗰啲，而且郁吓就係十萬八萬，重好似話唔夠數。大佬，唔好以為唔駛錢，呢啲全部係社會成本。

如果有好啲嘅辦法去爭取，邊個會熱辣辣坐喺百萬大道煎pat pat；

如果有好啲嘅辦法去爭取，邊個有大餐唔吼，去玩絕食；

如果有好啲嘅辦法去爭取，邊個有屋企唔瞓，去廣場露營；

如果有好啲嘅辦法去爭取，邊個唔想斯斯文文理性討論，而要大聲爆粗；

如果有好啲嘅辦法去爭取，邊個會烈日下帶埋BB去遊行；

如果有好啲嘅辦法去爭取，邊個會……etc

蘇東坡話 「但願生兒愚且魯，無災無難到公卿」，駛乜咁轟轟烈烈，如果可以平平凡凡，安安穩穩，絕對係福氣。英雄？係逼出嚟，而且多數係悲劇跟尾。英雄，最好唔駛做！

再噏過

嚤囉