2015.07.05
「一戰歷史之旅」土耳其巴爾幹之行回望
柯拿，大家好
今朝九點開「鋪」，照例又係捧出自製早餐，坐喺車房，一路暵煎蛋腸仔熱咖啡，一路就守株待兔等客到。再攞出 iPad 睇網上新聞，就梗係指定動作喇。睇到國際新聞話，奧巴馬同古巴領袖 Raul 卡斯特羅，四月喺巴拿馬美洲峰會握過手後，美國將古巴從資助恐怖主義國家名單中剔除，兩國仲達成協議：７月20日重開大使館。美國由61年開始，對古巴實行全面禁運政策，冇咗對外貿易，古巴窮到連阿媽都唔認得。2011年，我 Solo 去咗古巴成20日，哎唷都叫做親身感受過。好多人去古巴，係要睇二三十年代美國古老車，仲可以通街行嘅情景。我會話，去就快尐好去，你估古巴人真係好鍾意坐老爺車咩？美國佬解禁後，經濟環境就會唔同，到時，尐老爺車劏得八八九九，想睇老爺車，就要去博物館喇。就好似有尐鬼佬，要嚟香港睇古老帆船同埋紅色人力車一樣，就算畀你睇到，都係假嘢。
人生如旅遊，好多嘢，冇得返轉頭，過咗就過咗；及時行樂喇，老友。我今次土耳其之旅，亦係抱住呢隻宗旨。
多年前，我喺商場開鋪，有做旅行社嘅同我講：土耳其好鬼靚，好值得去。不過，又有好多人，雖然未去過，但係一講起土耳其就好驚。點解？你睇過午夜快車就知喇。又完全未去過一笪地方，但係可以因為一齣戲，就對嗰笪地方嘅印象差成咁，可見電影宣傳嘅威力係幾咁大。
近年嚟，IS 恐佈回教組織喺敍利亞崛起，搞到中東地區雞毛鴨血，不少恐佈盲毛由世界各地去IS 參軍，佢哋就係經由土耳其入敍利亞。再加上呢班恐佈黐線佬，全無人性，最鍾意搞手無寸鐵嘅平民，三唔識七都可以斬頭，話係聖戰，你都咪話唔驚。加埋庫爾德族人喺土耳其東部邊境，畀IS 同埋土耳其軍趕嚟趕去，嗰度冇日安寧。外面睇，土耳其就係一個危地喇。
開講有話：危地勿企！同人講起我嘅行程，好多人都話：「而家去土耳其？」連屋企最錫我嗰個都話：「諗吓其他地方得唔得呀，你？」個個係咁講，搞到我每次睇新聞，都睇下土耳其有冇斬頭新聞。最後發覺，揸車出街遇到意外嘅比率，較畀人斬頭嘅機會高好多。我日日都要揸車，睇個樣，去旅行比較安全，所以計劃照舊。真係要多謝太座，佢雖然對我嘅旅行地點非常不滿，但係從來尊重我嘅生活態度，絶對唔會阻止我，而且一如既往，幫我找晒旅行尐數，又喺香港換尐美金、歐羅返嚟，等我喺旅途中可以無憂無慮。有賢內如此，乎服何求呢，又？
呢個行程，我畀個主題佢，就係「一戰歷史之旅」。1915年4月28日，澳紐軍團登陸土耳其，展開加里波利戰役，2015 年就係百年誌。所以一定要今年去，冇得妥協。同土耳其隔住愛琴海嘅巴爾幹半島之上，就係觸發大戰嘅薩拉熱窩，唔係好遠啫，梗係要探一探當年奧匈帝國費特拿皇儲遇剌嘅現場。順路去埋有「亞得利亞海明珠」之稱嘅克羅地亞作為配菜，一個月行程就大定嘞。
終於，成個行程，全部實現，而且仲加咗尐額外節目，實在係非常滿意。今次最具特色嘅，反而係個配菜 ——克羅地亞。克羅地亞好鬼靚，我聞名已久。網上搵單車團資料時，發覺南部海岸 Dalmatian Coast 好流行踩單車旅行，可惜，好多團一早就爆滿。多謝旅行社老友 Peggy 幫我搵到個好有特色嘅團，使呢個配菜行程變成 highlight。
呢個 highlight 遲吓再講，而家先順序由土耳其講起：
講起土耳其，好多人就聯想起 Indiana Jones 裏面，描述遠東地區嘅情景：吵鬧髒亂嘅街道，密集無知粗魯嘅人群，一場打鬥，街市雞籠裏面嘅雞雞鴨鴨飛晒出嚟，總之亂晒大籠。土耳其係咪咁嘅呢？
第一日去到伊斯坦堡，自己出街四圍行。條街真係好多人，但絕唔係髒亂吵，相反，我感覺好有活力。街道乾淨，人好斯文、友善，其實，好有安全感。伊斯坦堡有千百年國際都會嘅歷史，做生意嘅人都好識講嘢，佢哋好努力推銷，但唔算太 pushy，都好有禮貌。喺呢度行街，識英文就乜都搞掂，絶冇困難。土耳其，絕對唔係第三世界國家。
土耳其係跨越歐亞嘅古老帝國，同時亦跨越宗教歷史，千幾二千年前東羅馬帝國、君士坦丁輝煌嘅歷史，點滴痕跡，今日仍然到處可見。
今次嚟土耳其，主要係要去加里波利 Gallipoli ，踏足昔日澳紐軍團作戰過嘅戰場。我逗留咗喺加里波利半島三日，實地去瞭解呢個戰役，絶對唔敢話知道全部真相，但係從名方面知道多咗，又搞清咗好多疑團，目的算係達到咗嘞。
五年前，我去過約旦，喺回教世界中，約旦已經算幾開放，但係都冇得同土耳其比。土耳其有 98％人口係穆斯林，我第一日喺旅館，房裏面枱頭擺咗支紅酒，我差唔多每日晚餐都飲啤酒，乜唔係話穆斯林唔飲得酒咩？哈，土耳其就可以。茶室食肆，男男女女坐埋一齊；街上行人，少女群內，有尐 Tee 裇熱褲，有尐包頭包髻，一齊行街買嘢；海灘上，春光明媚 ⋯⋯，呢個回教國家，一尐都唔保守，起碼外表如此。咁，同世界各大都會冇乜分別喎。Ibro 係穆斯林，佢同我哋一齊去吧飲酒。我問 Ibro ，佢話，鄂圖曼係一個大帝國，唔係小城邦，人口眾多，好難統一信仰，所以適當嘅包融就係統治技巧，加上伊斯坦堡係貿易重鎮，客人來自世界各方，乜人未見過？呢種包融觀念，遺留至今，所以現代土耳其喺 1923 年建國後，國父 Atuturk 以世俗化嘅憲法取代伊斯蘭律法 sharia laws，以保持土耳其係一個親西方價值，多元嘅現代化國家。不過，Ibro 話，而家係有一尐極端嘅穆斯林，想改變呢個狀況⋯⋯。唉，我祝佢好運喇。
我留咗喺土耳其十二日，畀我一個好好嘅印象。伊斯坦堡一般嘅旅遊熱點我都去過，又游過黑海、愛琴海嘅水，去過特洛伊古城、棉花堡、以弗所古城等。當然仲有好多地方未曾踏足，實在有餘地再去一次，不過要尐恐怖份子生生性性，快尐滅亡，唔好搞亂個世界，咁我哋就多尐選擇喇。
而家講返個變咗 highlight 嘅配菜：
由土耳其飛克羅地亞，喺 Trogir 港上船。個團叫做 boat and bike tour，隻船就係大本營，嗰八日，食住都喺隻船上，根本就係一間流動酒店。隻船由海港開出後，每日就由一個島去另一個島，所以，佢哋又叫 island hoppers。隻船有時停喺海中心，我哋就喺船邊游水。日間就喺島上活動，一係踩單車，一係安排遊覽，或者自己四圍行街、游水、曬太陽 ⋯⋯ ，乜都得，非常靈活，總之夠鐘就自己上返船。單車踩咗五日，每日朝早一定係踩上山，尐斜路都唔係小嘢，不過上到山之巔，望見咁鬼靚嘅景，就乜都抵返晒喇。跟住又一定係衝落大斜路，返返碼頭上船，嗰種快感又係好過癮。
咪以為運動量多咗就可以減磅，相反，我一定肥咗唔少。船上好食好住，平時梗有零食、生果擺喺船尾大㕔，任食唔嬲。行過口痕又一塊薯片，口痕又一塊菠蘿，成日口擘擘，個口停不了。餐堂又有啤酒咖啡賣，方便到飛起。最衰嘅係個㕑，佢煮嘢鬼咁好食，唔似出面餐廳咁商業化，直頭好有屋企 feel，每餐都食到過晒龍。有好嘢食，就一定要飲啤酒，每日起碼一支，個啤酒肚睇嚟都好大劑也。每餐都咁講：「食完再減喇。」
船又分級數，我係窮人一個，梗係要住尐最平嘅喇，不過佢擺咗烏龍，搞錯咗船艙，唯有將我升級去另一架貴尐嘅船。計起嚟，呢個升級，都賺咗成500蚊袋鼠幣。哈哈，傻人有傻福。
呢個單車船旅程，滿意到不得了。如果要搵尐尐遺憾，就係見唔到到斑點狗。據講 Dalmatian dogs 係源自 Dalmatian 地區，個名都係咁叫喇，可惜，十日喺 Dalmatian coast ，完全見唔到一隻 Dalmatian dog！
今次要多謝大小姐，我舊年生日，佢送咗個 GoPro action cam 畀我，今次我踩單車、游水都戴住佢，影咗好多上山落海嘅相，我嘅記憶，又更加立體，更加全面喇。
絬束咗八日海岸漂泊生涯後，搭巴士南下克羅地亞最南城市 Dubrovnik 古城，估唔到，呢個古城真係又靚又好玩。我唔覺意，仲參加咗個一日團，去咗隔籬嘅黑山共和國 Montenegro ，由朝玩到晚，只收 38 歐羅，認真抵玩。如果有時間，Dubrovnik 係可以留三、四晚慢慢 hea ，絕對唔會悶。
古城 Dubrovnik 好靚，但係美麗背後又有眼淚。1989年後，蘇聯解體，東歐各國思變。克羅地亞聯同波斯尼亞，宣佈脫離南斯拉夫獨立。塞爾維亞點會放過過佢哋，1990 年，米諾索維奇揮軍南下，Dubrovnik 古城就係轟炸目標，克羅地亞人為保衛國土而戰，呢場戰爭，就稱之為護國之戰 the Homeland War。1995年戰爭結束，二萬條人命就此斷送。好彩，克羅地亞都爭得自己嘅獨立，而米諾索維奇亦畀美國佬拉去國際法庭，控之以戰爭侵犯人道罪，佢喺判刑前，2006 年死於海牙法庭獄中。我同 Dubrovnik 旅館老闆女講起，轟炸時，佢就喺城裏面，到而家，都感受到佢嘅傷痛，同埋對戰爭嘅無奈，又係喎，一界平民，可以做得乜？
最後一站，亦係點睛嘅 finale —— Sarajevo ，薩拉熱窩係我夢?￤ﾻﾥ求要去嘅地方，佢係波斯尼亞及黑塞高雲拿聯邦 Bosnia and Herzegovina 嘅首都。 同克羅地亞一樣，波黑 1992 年宣佈獨立，就畀塞爾維亞攻打，薩垃熱窩又係首當其衝。香港有日本仔佔領三年零八個月，薩拉熱窩就畀塞爾維亞圍城三年十個月三星期零三日。塞爾維亞狙擊手，專揀平民開槍！畀戰爭、仇恨糟質咗咁多年，行喺薩拉熱窩街頭，建築物外牆彈痕累累，地上面一個二個窿窿，到處都係戰爭嘅傷痛，呢尐就係波黑人民爭取獨立嘅代價。做個自由魂，抑或做隻亡國狗，波黑人民用生命嚟作宣示。
其實嚟波黑，除咗首府薩拉熱窩外，仲有好多地方可以一遊。最出名相信係 Mostar 鎮嘅古老大橋。我就同埋兩位小姐，包咗架車去玩咗一日。唔係講笑，計起嚟，呢條古老大橋，同香港都有尐尐 La lung，且聽我道來。1993年，大橋喺波黑獨立戰爭中摧毀。2004年重建完成，當時歐盟嘅外交事務專員，代表歐盟嚟主持大橋重建啓用儀式，當然會發表講話呼籲民族和諧 bla bla bla 。呢位專員，就係末代港督肥彭喇。
嚟薩拉熱窩嘅最大目的，就係要親身行過，親眼睇過，當年奧匈帝國皇儲被槍殺嘅路徑。我終於喺行程嘅最後一日，搵咗個歷史系碩士，坐喺餐廳路邊餐枱，一路飲咖啡，一路聽佢講呢段歷史嘅前因後果。跟住再帶我沿路線行一次，搞清楚呢單行刺事件嘅好多細節，我滿意到不得了。回想第一次知道有件咁嘅歷史，係四十幾年前坐喺班房聽先生講書。點諗到四十幾年後嘅呢一日，可以親臨現場，回味一百零一年前往事。旅行樂趣，亦在此矣。
前後總共成三十日嘅行程，喺十三號由薩拉熱窩經土耳其飛返香港，好開心可以同四十年冇見嘅同學重聚飲茶。其他死黨同學仔，再次聚埋，食飯吹水，不在話下。
十七號飛返雪梨，跟住想點？諗諗下次去邊度囉。唔係乜嘢？天干地支都兜咗一個匝，唔使諗嘞，有得去好快尐去玩。講完！
再噏過
嚤囉
https://www.facebook.com/media/set/?set=a.849127818497973.1073741967.100002022875470&type=1&l=134854f11d
土耳其藍清真寺內
柯拿，大家好
今朝九點開「鋪」，照例又係捧出自製早餐，坐喺車房，一路暵煎蛋腸仔熱咖啡，一路就守株待兔等客到。再攞出 iPad 睇網上新聞，就梗係指定動作喇。睇到國際新聞話，奧巴馬同古巴領袖 Raul 卡斯特羅，四月喺巴拿馬美洲峰會握過手後，美國將古巴從資助恐怖主義國家名單中剔除，兩國仲達成協議：７月20日重開大使館。美國由61年開始，對古巴實行全面禁運政策，冇咗對外貿易，古巴窮到連阿媽都唔認得。2011年，我 Solo 去咗古巴成20日，哎唷都叫做親身感受過。好多人去古巴，係要睇二三十年代美國古老車，仲可以通街行嘅情景。我會話，去就快尐好去，你估古巴人真係好鍾意坐老爺車咩？美國佬解禁後，經濟環境就會唔同，到時，尐老爺車劏得八八九九，想睇老爺車，就要去博物館喇。就好似有尐鬼佬，要嚟香港睇古老帆船同埋紅色人力車一樣，就算畀你睇到，都係假嘢。
人生如旅遊，好多嘢，冇得返轉頭，過咗就過咗；及時行樂喇，老友。我今次土耳其之旅，亦係抱住呢隻宗旨。
多年前，我喺商場開鋪，有做旅行社嘅同我講：土耳其好鬼靚，好值得去。不過，又有好多人，雖然未去過，但係一講起土耳其就好驚。點解？你睇過午夜快車就知喇。又完全未去過一笪地方，但係可以因為一齣戲，就對嗰笪地方嘅印象差成咁，可見電影宣傳嘅威力係幾咁大。
近年嚟，IS 恐佈回教組織喺敍利亞崛起，搞到中東地區雞毛鴨血，不少恐佈盲毛由世界各地去IS 參軍，佢哋就係經由土耳其入敍利亞。再加上呢班恐佈黐線佬，全無人性，最鍾意搞手無寸鐵嘅平民，三唔識七都可以斬頭，話係聖戰，你都咪話唔驚。加埋庫爾德族人喺土耳其東部邊境，畀IS 同埋土耳其軍趕嚟趕去，嗰度冇日安寧。外面睇，土耳其就係一個危地喇。
開講有話：危地勿企！同人講起我嘅行程，好多人都話：「而家去土耳其？」連屋企最錫我嗰個都話：「諗吓其他地方得唔得呀，你？」個個係咁講，搞到我每次睇新聞，都睇下土耳其有冇斬頭新聞。最後發覺，揸車出街遇到意外嘅比率，較畀人斬頭嘅機會高好多。我日日都要揸車，睇個樣，去旅行比較安全，所以計劃照舊。真係要多謝太座，佢雖然對我嘅旅行地點非常不滿，但係從來尊重我嘅生活態度，絶對唔會阻止我，而且一如既往，幫我找晒旅行尐數，又喺香港換尐美金、歐羅返嚟，等我喺旅途中可以無憂無慮。有賢內如此，乎服何求呢，又？
呢個行程，我畀個主題佢，就係「一戰歷史之旅」。1915年4月28日，澳紐軍團登陸土耳其，展開加里波利戰役，2015 年就係百年誌。所以一定要今年去，冇得妥協。同土耳其隔住愛琴海嘅巴爾幹半島之上，就係觸發大戰嘅薩拉熱窩，唔係好遠啫，梗係要探一探當年奧匈帝國費特拿皇儲遇剌嘅現場。順路去埋有「亞得利亞海明珠」之稱嘅克羅地亞作為配菜，一個月行程就大定嘞。
終於，成個行程，全部實現，而且仲加咗尐額外節目，實在係非常滿意。今次最具特色嘅，反而係個配菜 ——克羅地亞。克羅地亞好鬼靚，我聞名已久。網上搵單車團資料時，發覺南部海岸 Dalmatian Coast 好流行踩單車旅行，可惜，好多團一早就爆滿。多謝旅行社老友 Peggy 幫我搵到個好有特色嘅團，使呢個配菜行程變成 highlight。
呢個 highlight 遲吓再講，而家先順序由土耳其講起：
講起土耳其，好多人就聯想起 Indiana Jones 裏面，描述遠東地區嘅情景：吵鬧髒亂嘅街道，密集無知粗魯嘅人群，一場打鬥，街市雞籠裏面嘅雞雞鴨鴨飛晒出嚟，總之亂晒大籠。土耳其係咪咁嘅呢？
第一日去到伊斯坦堡，自己出街四圍行。條街真係好多人，但絕唔係髒亂吵，相反，我感覺好有活力。街道乾淨，人好斯文、友善，其實，好有安全感。伊斯坦堡有千百年國際都會嘅歷史，做生意嘅人都好識講嘢，佢哋好努力推銷，但唔算太 pushy，都好有禮貌。喺呢度行街，識英文就乜都搞掂，絶冇困難。土耳其，絕對唔係第三世界國家。
土耳其係跨越歐亞嘅古老帝國，同時亦跨越宗教歷史，千幾二千年前東羅馬帝國、君士坦丁輝煌嘅歷史，點滴痕跡，今日仍然到處可見。
今次嚟土耳其，主要係要去加里波利 Gallipoli ，踏足昔日澳紐軍團作戰過嘅戰場。我逗留咗喺加里波利半島三日，實地去瞭解呢個戰役，絶對唔敢話知道全部真相，但係從名方面知道多咗，又搞清咗好多疑團，目的算係達到咗嘞。
五年前，我去過約旦，喺回教世界中，約旦已經算幾開放，但係都冇得同土耳其比。土耳其有 98％人口係穆斯林，我第一日喺旅館，房裏面枱頭擺咗支紅酒，我差唔多每日晚餐都飲啤酒，乜唔係話穆斯林唔飲得酒咩？哈，土耳其就可以。茶室食肆，男男女女坐埋一齊；街上行人，少女群內，有尐 Tee 裇熱褲，有尐包頭包髻，一齊行街買嘢；海灘上，春光明媚 ⋯⋯，呢個回教國家，一尐都唔保守，起碼外表如此。咁，同世界各大都會冇乜分別喎。Ibro 係穆斯林，佢同我哋一齊去吧飲酒。我問 Ibro ，佢話，鄂圖曼係一個大帝國，唔係小城邦，人口眾多，好難統一信仰，所以適當嘅包融就係統治技巧，加上伊斯坦堡係貿易重鎮，客人來自世界各方，乜人未見過？呢種包融觀念，遺留至今，所以現代土耳其喺 1923 年建國後，國父 Atuturk 以世俗化嘅憲法取代伊斯蘭律法 sharia laws，以保持土耳其係一個親西方價值，多元嘅現代化國家。不過，Ibro 話，而家係有一尐極端嘅穆斯林，想改變呢個狀況⋯⋯。唉，我祝佢好運喇。
我留咗喺土耳其十二日，畀我一個好好嘅印象。伊斯坦堡一般嘅旅遊熱點我都去過，又游過黑海、愛琴海嘅水，去過特洛伊古城、棉花堡、以弗所古城等。當然仲有好多地方未曾踏足，實在有餘地再去一次，不過要尐恐怖份子生生性性，快尐滅亡，唔好搞亂個世界，咁我哋就多尐選擇喇。
而家講返個變咗 highlight 嘅配菜：
由土耳其飛克羅地亞，喺 Trogir 港上船。個團叫做 boat and bike tour，隻船就係大本營，嗰八日，食住都喺隻船上，根本就係一間流動酒店。隻船由海港開出後，每日就由一個島去另一個島，所以，佢哋又叫 island hoppers。隻船有時停喺海中心，我哋就喺船邊游水。日間就喺島上活動，一係踩單車，一係安排遊覽，或者自己四圍行街、游水、曬太陽 ⋯⋯ ，乜都得，非常靈活，總之夠鐘就自己上返船。單車踩咗五日，每日朝早一定係踩上山，尐斜路都唔係小嘢，不過上到山之巔，望見咁鬼靚嘅景，就乜都抵返晒喇。跟住又一定係衝落大斜路，返返碼頭上船，嗰種快感又係好過癮。
咪以為運動量多咗就可以減磅，相反，我一定肥咗唔少。船上好食好住，平時梗有零食、生果擺喺船尾大㕔，任食唔嬲。行過口痕又一塊薯片，口痕又一塊菠蘿，成日口擘擘，個口停不了。餐堂又有啤酒咖啡賣，方便到飛起。最衰嘅係個㕑，佢煮嘢鬼咁好食，唔似出面餐廳咁商業化，直頭好有屋企 feel，每餐都食到過晒龍。有好嘢食，就一定要飲啤酒，每日起碼一支，個啤酒肚睇嚟都好大劑也。每餐都咁講：「食完再減喇。」
船又分級數，我係窮人一個，梗係要住尐最平嘅喇，不過佢擺咗烏龍，搞錯咗船艙，唯有將我升級去另一架貴尐嘅船。計起嚟，呢個升級，都賺咗成500蚊袋鼠幣。哈哈，傻人有傻福。
呢個單車船旅程，滿意到不得了。如果要搵尐尐遺憾，就係見唔到到斑點狗。據講 Dalmatian dogs 係源自 Dalmatian 地區，個名都係咁叫喇，可惜，十日喺 Dalmatian coast ，完全見唔到一隻 Dalmatian dog！
今次要多謝大小姐，我舊年生日，佢送咗個 GoPro action cam 畀我，今次我踩單車、游水都戴住佢，影咗好多上山落海嘅相，我嘅記憶，又更加立體，更加全面喇。
絬束咗八日海岸漂泊生涯後，搭巴士南下克羅地亞最南城市 Dubrovnik 古城，估唔到，呢個古城真係又靚又好玩。我唔覺意，仲參加咗個一日團，去咗隔籬嘅黑山共和國 Montenegro ，由朝玩到晚，只收 38 歐羅，認真抵玩。如果有時間，Dubrovnik 係可以留三、四晚慢慢 hea ，絕對唔會悶。
古城 Dubrovnik 好靚，但係美麗背後又有眼淚。1989年後，蘇聯解體，東歐各國思變。克羅地亞聯同波斯尼亞，宣佈脫離南斯拉夫獨立。塞爾維亞點會放過過佢哋，1990 年，米諾索維奇揮軍南下，Dubrovnik 古城就係轟炸目標，克羅地亞人為保衛國土而戰，呢場戰爭，就稱之為護國之戰 the Homeland War。1995年戰爭結束，二萬條人命就此斷送。好彩，克羅地亞都爭得自己嘅獨立，而米諾索維奇亦畀美國佬拉去國際法庭，控之以戰爭侵犯人道罪，佢喺判刑前，2006 年死於海牙法庭獄中。我同 Dubrovnik 旅館老闆女講起，轟炸時，佢就喺城裏面，到而家，都感受到佢嘅傷痛，同埋對戰爭嘅無奈，又係喎，一界平民，可以做得乜？
最後一站，亦係點睛嘅 finale —— Sarajevo ，薩拉熱窩係我夢?￤ﾻﾥ求要去嘅地方，佢係波斯尼亞及黑塞高雲拿聯邦 Bosnia and Herzegovina 嘅首都。 同克羅地亞一樣，波黑 1992 年宣佈獨立，就畀塞爾維亞攻打，薩垃熱窩又係首當其衝。香港有日本仔佔領三年零八個月，薩拉熱窩就畀塞爾維亞圍城三年十個月三星期零三日。塞爾維亞狙擊手，專揀平民開槍！畀戰爭、仇恨糟質咗咁多年，行喺薩拉熱窩街頭，建築物外牆彈痕累累，地上面一個二個窿窿，到處都係戰爭嘅傷痛，呢尐就係波黑人民爭取獨立嘅代價。做個自由魂，抑或做隻亡國狗，波黑人民用生命嚟作宣示。
其實嚟波黑，除咗首府薩拉熱窩外，仲有好多地方可以一遊。最出名相信係 Mostar 鎮嘅古老大橋。我就同埋兩位小姐，包咗架車去玩咗一日。唔係講笑，計起嚟，呢條古老大橋，同香港都有尐尐 La lung，且聽我道來。1993年，大橋喺波黑獨立戰爭中摧毀。2004年重建完成，當時歐盟嘅外交事務專員，代表歐盟嚟主持大橋重建啓用儀式，當然會發表講話呼籲民族和諧 bla bla bla 。呢位專員，就係末代港督肥彭喇。
嚟薩拉熱窩嘅最大目的，就係要親身行過，親眼睇過，當年奧匈帝國皇儲被槍殺嘅路徑。我終於喺行程嘅最後一日，搵咗個歷史系碩士，坐喺餐廳路邊餐枱，一路飲咖啡，一路聽佢講呢段歷史嘅前因後果。跟住再帶我沿路線行一次，搞清楚呢單行刺事件嘅好多細節，我滿意到不得了。回想第一次知道有件咁嘅歷史，係四十幾年前坐喺班房聽先生講書。點諗到四十幾年後嘅呢一日，可以親臨現場，回味一百零一年前往事。旅行樂趣，亦在此矣。
前後總共成三十日嘅行程，喺十三號由薩拉熱窩經土耳其飛返香港，好開心可以同四十年冇見嘅同學重聚飲茶。其他死黨同學仔，再次聚埋，食飯吹水，不在話下。
十七號飛返雪梨，跟住想點？諗諗下次去邊度囉。唔係乜嘢？天干地支都兜咗一個匝，唔使諗嘞，有得去好快尐去玩。講完！
再噏過
嚤囉
https://www.facebook.com/media/set/?set=a.849127818497973.1073741967.100002022875470&type=1&l=134854f11d
No comments:
Post a Comment