2012.08.08 借屍還魂噏新晚，學生樂園腦中翻

2012.08.08  

借屍還魂噏新晚，學生樂園腦中翻

柯拿，大家好，

八月嘅雪梨，重係幾凍。唔單止氣温重係寒冷，零售業亦係寒冷。個個撳住荷包，商場人流減少，小生意嗌哂救命，希望春天快啲嚟，否則邊有銀四圍去！

新晚報重出江湖，老咩頭博士，你有頭有面，有冇興趣叫深圳超人畀個版位，學生樂園借屍還魂，一眾阿姐每周繼續爆稿。不過要各位阿姐再撐上九樓，可能有啲難度。咩博可能要另覓地方，再造樂園。辮公室係不可少，各位阿姐每人一張寫字枱，係爆稿，改稿，校對嘅地方。咦，掛唔掛毛像呢？辦公室外大廳，長枱，吊扇當然不可缺少，係圍住坐埋吹水、駁咀嘅好地方。重要擺幾本老夫子水虎傳、古老村，一齊睇一齊笑。室內最好擺番張波枱。點解？1970年，夏天，波枱正正開喺室內，我同老咩頭打緊乒乓波，有兩個着住校服嘅學生妹走上嚟，企喺波枱邊。啊咩對住學生妹話：「呢個係嚤囉仔。哈哈。」然後對我講：「呢個係阿青，呢個係阿珊。哈哈。」我：「哦……」然後繼續打波。呢個情景，連學生妹嘅笑靨，都記得清清楚楚。

講完報紙，講吓電台。我係大班台擁躉，每日都聽。可惜，解放後嘅特區，千方百計去撲滅唔啱聽嘅嘢。04年5月黄毓民，鄭大班兩支咪被封。今日阿爺囑咐啊狼四大任務之一，就係要搞掂香港大氣電波。拖住發新電視牌。如今大班台畀呢件深圳超人同寶baby兩兄弟搞到雞毛鴨血，睇吓大班又捱得幾耐。又係嗰句，自由唔係老馮嘅，你唔爭取，冇人會送畀你；你睇少一眼，就會畀人偷走喇。醒啲喇，老友。

邊個重記得呢支歌。

樂園之歌（青年友誼圓舞曲）

江山詞，天戈曲

藍色的天空像大海一樣

廣闊啲大路上塵土飛揚

穿森林過海洋來到樂園（來自各方）

千萬個青年人歡聚一堂

拉起手唱起歌跳起舞來

讓我們唱一支友誼之歌

歡樂的歌聲在迴旋盪樣

歌頌着我們幸福的時光

親愛的朋友啊心連著心

我們有共同的美好理想

拉起手唱起歌跳起舞來

讓我們唱一支和平之歌

白鴿在天空中展翅飛翔

青春的花朶在心中開放

年青的朋友啊團結起來

為和平為友誼獻出力量

拉起手唱起歌跳起舞來

讓我們唱一支團結之歌

Those were the days

再噏過，

嚤囉