2015.06.30
長堤長長長
我17號朝早返雪梨，第二日，打開車房門，又開一日工，成日咁長，配咗一條鎖定匙，收咗兩個 Jobs ，有個客人嚟攞返對鞋，就係咁多多。係咪好得閒呢？又唔係喎，整理返三十幾日嘅相、錄影，都好多嘢做㗎。不過，搵唔到錢。
旅行嘅嘢，點會嫌多！蔣家大少，遠喺我去旅行之前，已經組織咗一個家庭旅行，四日三夜，尋夢之旅，遍遊紐修威中海岸，北海岸，同埋獵人谷地帶。點解係「尋夢」？因為呢十年八年，仔女有自己生活圈子，就算要約食一餐飯，都唔容易。出外 Outing 過夜？好似禿鷹話齋：天方夜譚。再次好似十年八年前，同仔女四圍去玩，仲唔係夢境？而家大少爺將美夢變真，都算唔話得喇啩。可惜大少奶要回港探親，未克參與。冇緊要，阿仔快尐搞多次，一齊去喇。
星期一，喺蔣氏大本營食個早餐，等埋大少，隨即向中海岸出發。中海岸，聽起嚟，好似好遠，其實離雪梨北沿只有50公里，如果揸車行F3 雪梨紐卡素公路，半個鐘就到。所以，而家雪梨屋價貴到飛起，好多人都搬入中海岸住，呢度大把地起屋，貴極有個譜。每日搭火車出入雪梨，都唔會話太唔方便，但係居住質素就比雪梨好。澳洲地大，居民始終選擇較多。
離雪梨最近嘅中海岸大埠就係高士福市 Godsford ，話明海岸，梗係多海灘，每到夏天假期，呢度就係遊客勝地。離市中心十幾公里，就係附近出名嘅海灘 Terrigal ，單車、燒烤、沙灘、出船、磯釣等，係呢度嘅常規活動。而我哋每次嚟呢度，都一定會去南端山咀沙灘邊，嗰間餐廳食炸魚。攞往一盒新鮮起鑊嘅炸魚薯條，坐喺餐廳外露天帳蓬下，茫茫塔斯曼海就喺眼前。右邊海蝕大平台，三三兩兩磯釣友，喺海浪拍岸濺起嘅浪花中，同魚仔展開生死博鬥。唔係講笑，每年都唔知幾多磯釣友跣腳，咁就玩完，其中又以亞裔居多。近岸處漁翁用四驅車，由滑道 boat ramp 將船褪入海中，出海釣魚耍樂。偶爾，岸邊又有漁翁，將戰利品擺上劏魚石枱，劏洗乾淨，再帶返屋企做晚餐。劏魚頭尾，人棄我取，附近海鷗塘鵝，梗唔執輸，魚腸魚皮，爭奪一輪，各取所需後，又歸平靜。沙灘處，有涉水漫步、有臥沙閱讀；有拖友歡、有家庭樂 ⋯⋯，總之好睇，坐一日都唔會悶。蔣氏一族，一如既往，一邊喫薯條，一邊爭講嘢。由香港政改大笑話、 IS 回教世界，講到美國彩虹婚姻法，天南地北，無然所不談。當然又以，「誰都不能說服對方」作結喇。
由 Terrigal 北上十五公里，就係馳名海外嘅 the Entrance ，好多人專誠嚟呢度，睇每日三點半嘅餵塘鵝騷。其實近幾年，餵塘鵝真係只係騷一場，澳洲人已經睇到厭晒。今次阿仔帶我哋嚟 the Entrance，係走入內陸湖東面海灣嘅沿岸 Long Jetty 小區。呢度岸邊，淺灘處處，尐船根本埋唔到岸，於是，居民喺岸邊搭建長長木海堤，由湖邊沙灘伸入內陸湖 Tuggerah Lake 深水處，方便上船落船。最古老嘅嗰條長堤，今年啱啱 100 歲！而個鎮名 Long Jetty 亦因為呢條 long jetty 長堤而命名。
長堤唔夠兩米闊，但係成百米咁長。今日唔係假期，三三兩兩，嚟嘅都係附近居民，環境平靜到不得了，稍為大聲尐講嘢，都好似污染咗個環境。我哋放輕腳步，沿木長堤行出去。風平浪靜，水平如鏡，東面山咀，西邊延綿矮矮山嶺，魚鱗白雲親托藍天，映入湖中；水中有山，雲中有水。正是：「水作天時天亦水，雲為影處影還雲」。大少攞往單反機，扮晒影相佬。佢東指西指，叫人擺鋪士，我哋老來從子，就晒佢嘅意思。企又一幅，坐又一幅，總之影到夠為止。
呢個長堤鎮，我大力推薦。
再唔走上高速公路，沿海邊行，停咗幾個觀景點。而家係冬天，五點就開始天黑，天黑後就到達今日嘅目的地 Nelson Bay。大少租咗一個兩房自助式單位，廚房設備俱全，非常方便。大少遺傳咗阿媽嘅廚藝因子，非常鍾意煮嘢食。我除咗幫忙執頭執尾，當然樂得撓埋手腳等食。記得細路細時，出外過夜，梗帶埋錄影機，仲有一大箱綠影帶。有時驚旅店嘅電視，駁唔到錄影機，仲誇張到帶埋電視機?ﾼﾁ今晚，一個電腦仔就搞掂晒，仍然重溫舊夢，揀咗第一集表姐你好嘢，一路打邊爐，一路睇。又一路睇，一路唏噓。廿幾年前嘅戲橋，咦，原來真係唔係講笑。
一宿無話。
三十幾日，冇好好休息過，今日瞓到黃朝百晏。鬼子佬話 to have breakfast in bed，就表示招呼殷勤，例如父親嗰日，個仔就會畀個牀上早餐個老豆嘆，以示乖仔（一日咁多）。香港人唔慣咁食早餐，認為只有病人至喺牀上開餐。起身，坐出餐枱，今朝有阿仔煮早餐，仲問隻蛋要點煎，其實，唔理點，煎出嚟隻蛋係乜嘢樣，呢隻都係甜蛋喇，係冇？
食過呢個好晏嘅早餐，出發繼續北上，今日嘅目的地係 170 公里外嘅科士打鎮 Foster 。好似 the Entrance 一樣，科士打又係個湖嘅出海口。廿年前，初嚟科士打，真係驚艷，估唔到世界上有咁靚嘅地方。唔似中海岸，科士打離雪梨 300 公里，行車都要成四粒鐘。到今日，佢仲保持得好好，同我廿年前嚟，分別不大，一樣咁靚。
科士打嘅內陸湖叫做 Wallis Lake，呢個湖有幾條大河流入，沖積沙丘特別多，湖中大大小小冲積出嚟嘅小島，數量都多過其他中、北海岸嘅內陸湖 lagoons。咁多淡水流入咸水湖，咸淡交界，亦係養蠔嘅好地方，所以 Wallis lake 近河口嘅湖邊，全部都係?￥ﾠﾴ。咁，去?￥ﾠﾴ食即開生?ﾼﾌ就梗係必遊項目喇。
我哋嚟科士打嘅必玩項目，就係揸電船仔遊湖。鋁質半頂船，加小型弦外摩打，非常容易控制，唔使牌，人人都揸得。今日好好天，晴空萬里，冬日嘅太陽，暖得特別可愛，無風無浪，揸起電船仔，舒服得很。以往，我係揸船人，今日，我坐喺船邊，一路曬太陽，一路食卡樂B。廿年來，Wallis lake 都係差唔多樣，係?￥ﾠﾴ多咗。我哋沿住水道兜個圈揸去橋邊沙丘，將船剷上沙灘，拉好錨，固定隻船，就落沙丘玩。如果係夏天，我哋會一早換晒泳裝，喺呢度玩沙、游水，咁就可以玩成粒鐘。今日就赤腳喺沙丘上踱步，留下一行行嘅腳印。以前喺呢度留低過嘅腳印，早已灰飛湮滅。今日嘅腳印，睇嚟都過唔到今晚。但係心中嘅足印，仍然非常深刻。好！好快又一齊嚟印你兩印。
又唔游水，唔玩得好耐，所以只租兩個鐘。交埋船，行多兩行，又話五點喇，搵間湖邊餐廳，坐喺露天處，食個湖邊夕陽晚餐。今日真係好 hea，同家人，久唔久 hea 幾日，又真係好難得嘅。
食到天黑，又要揸返兩粒鐘車返 Nelson Bay。返到旅館，意猶未盡，仔女話要食甜品。先將急凍蘋果批焗熱，再加雲呢嗱雪糕，一凍一熱撈埋食。我第一次咁樣食甜品！OK喇。一邊食甜品，一邊玩 card game，咁又一日喇。
又係瞓到黃朝百晏，早餐後，今日大少好介紹，去動物農莊。就喺旅館南行廿幾公里處，有個 Oakvale Farm。外面睇，冇大型建築物，只係普普通通一個農莊，動物種類亦唔係好多，但係，佢有一個特色，係我未遇到過嘅。呢度嘅動物，馴到不得了，完全唔怕人，可以好近咁接近佢哋。當然都要視乎唔同動物嘅天性，但係多數都可以摸，有尐羊仔仲可以抱起，非常親善。
好多人嚟過澳洲，但係完全未見過袋鼠。就算見過，一係養喺欄裏面，又或者離天百丈遠。呢度嘅袋鼠就養喺草地，我同佢哋企埋一齊，我餵佢，佢用手㩒住我隻手嚟食我手上嘅飼料，都係第一次咁近距離接觸袋鼠。其他動物，好似羊、馬、駝羊、駱駝⋯⋯等，你都可以同佢頭踫頭咁影張相。呢度亦有樹熊，又係有參觀時間，佢哋會坐喺樹丫中間畀人同佢影相。可以摸，但又係唔抱得，呢個係紐省法例。
呢個農莊果然好玩，如果有人嚟澳洲旅行，時間又許可嘅話，我會建議佢哋嚟呢度一遊。
離開農莊，去麥記醫肚。真大鄉里，原來而家可以自己砌個麭，麥記裏面有機撳，自己揀麭，揀肉、醬料、沙律等，用咭畀埋錢，唔使埋櫃枱！吓，咁咪又有好多人失業？世界愈嚟愈艱難喇。
以前嚟親 Nelson Bay，都一定去延綿32公里長嘅 Stockton Beach ，呢度有南半球最大嘅移動沙丘地帶，最高沙丘去到三十米高，由沙丘崖頂滑落，絕對係非常好玩嘅遊戲，不過行返上去就唔係咁好玩嘞。沙灘海邊，除咗浸水外，仲有一樣好玩嘅嘢，就係捉 pipi 蜆。曾經好多蜆嘅沙灘，一度畀人捉到冇晒。後來市政府立例禁止捕捉，希望可以救返佢哋。咁，究竟成效如何呢？
行落沙灘，今日天色唔好，個天一笪笪，有尐藍天、有白雲、有灰雲、有黑雲，乜都有。哈，原來，咁有咁靚，我哋踩住沙灘行，32公里長灘，一個人都見唔到，三三兩雨專食蜆嘅雀仔就喺度搵食。海鷗會趁住蜆打開殼吐沙時，撲上去啄蜆肉食。有一種雀係食蜆專家 pied ，佢哋全身黑色，隻蜆唔使打開，佢都可以喺蜆殼邊沿啄一個窿仔，咁就可以打開隻蜆。沙灘上一行行打開嘅蜆殼，就係佢哋嘅傑作，蜆肉已經食咗，仲有些少肉黐住，睇嚟仲好新鮮。有佢哋出現，嗰度就一定有蜆。即刻踎低挖沙，唔使一陣，一隻手掌咁深嘅沙，就挖到蜆，附近全部都有，睇嚟，尐蜆真係返晒嚟。沙灘上嘅蜆，一般比較細，不過今次大嘅都有約 30mm ，我嘅經驗，如果肯濕身，喺淺灘沙底，會捉到更大嘅蜆，呢個活動留返夏天嚟。
捉蜆，只係遊戲，即刻要放返入沙中。市政府禁令：Do not remove pipis from the beach。大少問：即刻生食呢？帶埋爐嚟即灼又如何？哎⋯⋯咁又唔知得唔得喎。不過，冇吐沙嘅蜆！咁咪食到成口沙？點食？
天色愈嚟愈暗，離開沙灘，返歸去也。晚上，求其喺 Port Stephan 附近食吓 pizza、 意粉做晚餐，咁又一日咯。
一覺醒來，今日唔可以太晏，因為已經係第四日，執好晒行李，十點半交還鎖匙，走人喇。返歸前，順道遊兩處地方。
第一站，獵人谷 Hunters Valley，先去一間酒莊餐廳食早餐。坐低叫早餐。對唔住，早餐時間已過，而家做緊午餐。是旦喇，早餐變咗午餐，照食可也。
獵人谷呢度盛產葡萄，即係釀酒區喇，蔣家冇劉伶，咁，呢度唔啱噃。哈，又唔係咁講嘅，原來飲酒要有送酒物，唔飲酒啫，鍾意食吖嘛。例如，煙肉、煙火腿，芝士、橄欖，橄欖油、陳醋等，都係美食。蔣家嚟獵人谷，冇試酒，冇買酒，但係買咗一大袋食物，滿戴而歸。
第二站，獵人谷花園，係一個新建成嘅園林設計主題公園，公園好大，行都有排行，係幾靚，不過都幾人工化。其中有一個童話故事花園 story books garden，就用童話故事配合園林設計。正當我哋玩弄緊尐童話故事公仔時，大小姐發覺唔見咗銀包，梗係喺唔知邊度放低影相，然後就唔記得咗。即刻分散四圍揾，卒之，原來有人交咗去櫃枱，失而復得。好彩呢度係澳洲，不過，到處都有貪心嘅人，而家執返身彩，感恩喇。
天光行到天黑，亦係時候食晚飯。每次由北邊落返嚟，順路都經高士福，食個中式自助餐，然後捧住個肚返屋企。今次都唔例外。
呢四日，好充實。阿仔、 Ivy 、阿女，幾時又嚟玩過？快尐擇個吉日！
No comments:
Post a Comment