2014.02.07 齋噏不如四圍騰，印加巨龜達爾文

2014.02.07 

齋噏不如四圍騰，印加巨龜達爾文

加拉巴哥斯群島巨龜

柯拿，大家好

記得虎年老咩頭耳順大壽，我寫過一篇嘢，提及各生肖所屬嘅老友，宜珍惜分秒，盡情享樂，因為呢啲飛禽走獸，隻隻排住隊登六，時間唔等人。而家數下手指，虎兔龍蛇，馬羊猴雞⋯⋯。駿馬終於跑到，羊仔還會遠嗎！係有啲矚目驚心喎。要嚟嘅，擋都擋唔住。

馬年，當然係好年。馬年伊始，已經驛馬星動。踏入二月，心情愈嚟愈緊張。梗係喇，出發日期係二月十七日，今次，玩佢一個月。

又繼續係一個人，隻身闖天涯，今次係去南美洲兩個國家。因為要喺美國過境，所以三月中，回程時，順路留喺邁亞美，Hea 佢四日至飛返雪梨。估唔到呢個冬天，連美國最南端嘅邁亞美都會落雪。希望到時，唔駛著住羽絨，漫步沙灘喇。冇比堅尼嘅邁亞美海灘，咁就真係好掃興。只好 fingers crossed it ，唔會咁喇。

南美洲，機票特別貴，所以呢個行程都幾融㗎。我本住一貫行之有效嘅做法，搜集晒資料，整理行程。然後，將所有賬單交晒畀阿珊，就自然找到數。至於啲錢係點樣搬嚟搬去，呢個就喺我嘅理解範圍以外嘞。

十九世紀，英國皇家海盜橫行世界。帝國要霸靚地，就要做勘探。1831年，皇家海軍獵犬號 MHS Beagle 由英國出發，目的係勘探南美洲資源，所以，一大隊自然科學家，隨軍艦出發。喺南美西岸，離岸好遠處，有一堆群島。科學家發現好多古怪生物，例如成架車仔咁大嘅陸地龜，鱷魚咁大嘅蜥蜴⋯⋯等。船上有個廿零歲嘅科學家，查理士，佢發覺相同嘅生物，生活喺離島嘅，同生活喺大陸嘅，喺形態上，居然有咁大嘅分別。佢開始懷疑生物並非一成不變，觸發起佢建立生物演化理論嘅概念。看官一定知道，呢位查理士，就係達爾文。而呢堆離島，就係離開厄瓜多爾海岸1000公里嘅加拉巴哥斯群島 Galápagos Islands 。1979年，睇BBC嘅13集生命之源，我第一次聽到呢個島名。主持人大衛愛登堡企喺巨龜前，講述達爾文嘅生命演化理論⋯⋯。

三十五年後，我呢個行程，就係要圓呢個夢，要踏上加拉巴哥斯群島，同呢啲大龜傾下偈。

二月十七號，我會由雪梨起飛，經美國 LA、邁亞美，轉機飛厄瓜多爾首都 --- 基多Quito。剩計飛行時間，都要廿幾粒鐘。喺基多先hea 三日，四圍遊下咁喇，一定要去嘅，就係赤道分界線。由南半球，打個斛斗去北半球，應該幾過癮。之後，喺基多會合一隊人，直飛加拉巴哥斯群島。

加拉巴哥斯係火山島，島上仍然有活火山。喺島上逗留八日，活動包括，搭快艇遊覽幾個主要海島，行火山。四圍都係海，游水、徒手潛水就必定要玩喇。當然，達爾文硏究中心、巨龜保育中心，就唔去唔得喇。除咗住旅館外，有兩日 home stays，一日露營。

遊罷加拉巴哥斯島後，飛返基多。橫掂已經喺南美洲，再玩多一處。翌日，由基多直飛秘魯首都利馬，會合另一隊人。呢次係要行印加文明之路 ，印加古道 Inca Trail，探訪馬丘比丘遺址 Machu Picchu。由利馬飛 Cuzco ，呢個登山前哨小鎮，再起步，用四日時間行完古道。開始登山後，全部露營，當然隨隊有廚師，有挑夫幫手，我哋行山，只孭自用小背囊。

呢個行程，用四日行44公里程，最高去到海拔4200公尺，而利馬係海岸城巿，所以行之前，要喺 Cuzco 停兩日，作高山調整。

行過古文明之路，由 Cuzco 飛返利馬。再喺利馬逗留三日，又係四圍睇下咁喇，有機會嘅話，會搭飛機仔，由高空俯覽 Nazca Lines，古印加人用石砌成嘅巨型圖案，至今，仍然有好多不解之謎。其他活動，好似踩單車、游水等，到時再算。

咁就已經廿幾日。再由利馬飛番邁亞美，希望見到陽光照耀嘅海灘喇。當然要去嘅，就係美國最南端 Key West。其他？咪又係踩單車，游水，都係見步行步喇。各位有乜提議，歡迎指教。

行程中，當然繼續會用面書、電郵，同大家保持聯絡。

祝我順風順水，一切順利。

再噏過

嚤囉