2011.10.16 今期噏到hay fever，羅賓個鼻好啲嗎？

2011.10.16

今期噏到hay fever，羅賓個鼻好啲嗎？

柯拿，大家好，

10月份，袋鼠國踏入春季，記得曾經喺某個春天，我哋去坎培拉旅行。車開到一個公園附近，忽然一陣風，只見成天一點點，密密麻麻都係花粉，連車頭檔風玻璃，都佈滿粒粒。坐喺車裡面，會覺得好好睇，但如果喺外邊又有花粉敏感嘅話，就有好多乞嗤等住你打，咁就叫花粉症。其實花粉症，應該叫「草粉症」，因為呢啲粒粒，多數係由草嚟嘅，所以英文都叫hay fever，hay就係草喇。我喺香港時都唔知有啲咁嘅嘢，住落冇耐，居然對花粉敏感。到春天時，朝早出門都會打番幾個乞嗤，有時嚴重起嚟，就會成日連時眼都紅埋。不過走番入室內，就會好啲。

由此想起喺九樓時，三羅話過，如果朝早起身打三個乞嗤，就會成日都有排打，我而家明白啦。三羅，而家個鼻喺咪重係咁呢，又？

踏入春天，日照時間愈嚟愈長，好幾個州就改用夏令時間，鬼佬話day light saving，就係將鐘再撥快一個小時，即係話，而家雪梨時間比香港快三粒鐘。

外佣居港，進一步分化港人。我唔講我企邊，就講吓袋鼠國點樣處理審批移民。行政機構，即移民局，當然有絕對審批權，完全唔會話「有資格申請，就實批」啲咁著數嘅嘢。而且經常五時花，六時變；而且話變就變，唔會作預告，即時生效，殺你一個措手不及。

真實故事：

袋鼠國曾經長期欠缺髮型師及厨師，所以就將呢兩個行業放入職業短缺類，即係話有相關訓練或工作經驗，就可用職業移民類別申請做袋鼠。好多人好醒目，一睇就知道係商機，即刻大開髮型師及厨師專業訓練學校。當然不忘話比人聽，「擁有本校畢業證書，即有『資格』！！！移民」。佢冇講清楚嘅係：有資格『申請』而已。咁當然已經吸引咗好多想成為袋鼠一族嘅人入學，其中好大部份來自偉大祖國。精甩辮嘅香港人一睇就知，我成功移民後，做唔做頭髮，做唔做厨房，你耐得我乜嘢何！袋鼠聯邦政府亦蠢唔晒，知道有呢個大窿後，好快就做嘢塞番個窿，即刻加入英文程度、工作經驗等等。總之唔係淨係有證書咁簡單，而且係即時生效。職業學校即時收生困難，讀緊嘅學生亦唔可以畢業就申請。呢件事，當時都成為頗熱嘅新聞。

故事係話比我哋知，各地政府揀乜嘢人做公民，當然有絕對權力，唔存在「可以申請，就實批」嘅情況。如果有「申請即批」嘅情況，就係移民當局冇做好把關工作。不過咁，最緊要公道。例如袋鼠國要輸入髮型師，唔可以話，金髮藍眼白皮膚就要，見到黑毛棕眼黃皮膚，雖然同等條件，都掟埋一邊，唔批。咁就叫種族歧視。1993年，有個叫Pauline Hanson（韓森）嘅國會議員，佢喺國會嘅第一次演講，就鼓動減少亞洲移民，否則澳洲就會比亞洲人「淹沒了」（swarmed by Asian）。呢種言論，比人鬧到而家。不過而家佢都幾風騷，唔講政治喇，得閑上吓電視dance with stars，又或者表演吓厨藝。btw，佢參政前，係賣fish and chips嘅。

搞吓搞吓，東方呢粒珠都冇乜得剩，「法治」呢單嘢都變埋色。餐餐勞煩人大代舉手解釋你香港法律。……，祝大家好運！

再噏過，

嚤囉