2011.10.09 血拼亂噏博物館，邊位啊英會升官

2011.10.09 

血拼亂噏博物館，邊位啊英會升官

柯拿，大家好，

因為舖頭個幫手屋企有啲事，我要工作每週七日，冇法喇，當慳番啲人工做盤川喇。到今日為止，已連續工作16日！而且將會繼續係咁。呢篇周記，都係喺舖頭寫！

都重係想講吓旅行啲嘢。我最憎跟旅行團，缺乏彈性、趕鴨仔、同唔知啲乜嘢人一齊….等，當然係原因。我最憎最僧最憎嘅，係比人車去買嘢、睇病、洗腳…。所以我寧願貴啲、冇咁方便，可以嘅話，我都盡量自由行。

今次呢個團係雪梨一啲中大（唔係中山大學）校友搞嘅。過程係咁嘅﹕我哋自行設計行程，然後將行程及特別要求（例如，今次特別要求用四驅車去珠峰大本營）發比雪梨嘅旅行社。各旅行社就按我哋嘅要求，或照跟，或略作增刪，然後報價比我哋。我哋比較過唔同嘅報價就作出決定。而接辦旅行社就聯絡當地旅行社安排導遊、接送、交通、食宿、觀光等。

唔講你唔和，原來地陪local guide係冇人工嘅，佢哋嘅收入係靠小費同埋佣金。旅行社會建議我哋比幾多小費，但唔係一定要比。The worse case scenario, 如果我哋覺得佢做時差，唔比小費，都得嘅。喺呢個制度下，為揾兩餐，地陪就要做得好好。不過，我哋唔會咁衰嘅，過得去就比建議小費，稍為好啲，我地都酌量加碼，大家happy！

咁樣組團，成團人基本上係識嘅，就好玩好多啦！咁，各位係咪可以諗諗佢，搞番個九樓旅行團呢。馬仔，有冇得諗呢，又？

我哋喺行程要求上已寫明，唔去購物！但魔高一丈，始終都比人滾咗幾次。佢哋而家好醒目，將買嘢講成參觀。

喺西藏，有一次，話去參觀「藏文化博物館」，一入大門，鴕鳥（唔止係雞乸）咁大嘅國家領導人嘅題字，以突出其高規格及可信性（有咩？）。入到展館參觀，邊有講乜嘢藏文化？！淨係講藏藥有幾耐歷史，幾有效，幾神奇等等。到最後，梗有班著白袍，自稱醫師、教授等人形物體，免費幫你診症。把脈、反眼、擘口、伸脷，唔使一分鐘就可斷診。又無一幸免咁，全部人唔係呢度虛，就係嗰度虧；燥熱寒涼，癆瘀濕毒，梗中一瓣。又一定好好彩，實唔係絕症。又咁啱，醫全團人嘅病所需嘅藥，全部都喺呢個「文化博物館」內揾到！而且已經印定喺一張紙上。整定嘅！天意呀！你信唔信？

又一次，話免費幫你洗腳，（又係免費？洗腳？咪搞我！）好嘞，當你除晒鞋，浸住腳，你重走得去邊？然後佢又向你講啲充滿術語、似是而非嘅「醫學」理論。指住幅大腳板圖，又話乜嘢全身經絡走落腳板底。唔駛乜嘢Ｘ光、超音波、三維掃描咁痳煩。就喺呢個浸住啲唔知乜嘢水嘅爛鬼木盤，摸吓你腳板底，你所有嘅明病、暗病就無所遁形。又照例，所有人，腰腿筋骨較，心肝脾肺腎，梗有一辮有問題。有位團友「被發現」肝有問題。今次佢好彩嘞，咁啱啊乜教授在場，既然咁有緣，啊乜教授就免費（又係免費）幫佢施氣功（！）。只見啊乜教授伸開雙手以吸天地靈氣，再喺「病人」頭上隔空輸氣，口中大嗌「噓噓噓噓噓」。啊乜教授都比足戲，如是者，做咗成十分鐘。然後對病人講，嗱，氣功就可以免費，藥，你就要比錢買。一劑幾多幾多錢，要食咁多劑，就係咁多咁多幾喇！

喂！本來想免費洗腳啫，點知忽然被發現有肝病咁大鑊，唔駛再驗真啲就比啲「藥」（你知係乜嘢？）過你食。啲藥當然唔平喇！…….咦！呢個情景咁熟嘅？係咪喺警訊睇過呢？我都好好彩，居然親歷其境，非常難得。

唉！死唔死！

我係好憎人浪費我寶貴嘅假期時間，唔好口口聲聲話免費，旅行嘅時間，實在好珍貴。

但我更憎人當我係Lulu，侮辱我嘅智慧。

講起侮辱智慧，如果有人話特首跑馬仔係election  唔係selection，咁算唔算智慧「被侮辱」呢？

再噏過，

嚤囉

PS. 再幫商台賣告白，唔好錯過啇台881嘅「杏林茶」，節目主持Dr.Tim。好多好多醫學知識，經常踢爆偽醫學。

想睇旅行相，請上fb