2013.07.27
半夜三更睇石頭，噏句天涼好個秋
柯拿，大家好，
Merry Christmas, 唔駛驚，我唔係黐咗線，須知，香港熱到飛起之時，正是此間最凍之刻。我以前都應該提過：十二月聖誕節，正值袋鼠國嚴夏，熱辣辣過節梗係冇癮，所以喺凍凍嘅七月，袋鼠佬搞番個偽聖誕嚟玩下，稱之為Christmas in July 。以往，好多公司借題發揮，又佈置，又減價，都係銷售策略啫。但係，如今已經式微，市面再睇唔到。就係早一個禮拜，有個老鬼客同我講 Mary Christmas ，我先至醒番起。不過，到佢嗰一代人都香埋，就真係搵鬼同你講嘞。物換星移，世上有乜嘢東東係永恆?!
都講過跌晒watt，到而家都未係好夠電。為咗個肚腩仔，朝早都有去完gym至開工。但係夜晚一條友就眼光光，懶洋洋，乜都唔想做。正係hea 到心慌慌，忽然見到牀邊櫃面，有套50集嘅電視劇紅樓夢。諗都唔駛諗喇，一於㷛劇。
食完飯，之之坐坐，搞到七點零、八點。即刻上房，開定暖爐上床冚好被，電話、iphone、iPad 、remote、擺晒喺牀上，手可以觸及嘅地方，方便長時間作戰，以免要離開暖笠笠嘅𢇁棉被。set 好晒嘢，一撳個play掣，hah hah hah，不得了，一集，一集，又一集。如是者，晩晚睇到兩、三點至肯瞓。咁勤力，50集長劇，畀我一個禮拜㷛晒，諗番起，我都覺得我好犀利，唔駛點瞓，重咁有精神開工。
其實120回紅樓夢（係書，唔係劇集），我前年已經睇過。唔講唔知，原來睇紅樓夢，要一邊睇一邊查工具書，唔懶得，否則，唔會睇得明，而家再翻睇電視劇，有原著背景，當然好容易理解其中人物、角色、故事及個中関係。我享受得很。而且呢50集，非常忠於原著，我向大家超級推介。
紅樓夢，我最難忘嘅情節，就梗係第五回，寶玉夢遊太虛幻境，同埋第六回。點解?自己查下回目就知我講乜嘞。
唔知係唔係半夜三更，精神特別放鬆，抑或套劇真係拍得好好，又或者現實世界根本就係咁樣。好感動，經常睇到眼濕濕。紅樓夢，就係講賈府由盛變衰。由黛玉初入賈府開始，元妃省親建大觀園，又下喻寶玉、姊妹入住。園內日常動，結詩社、劉佬佬入大觀園等等，在在顯示賈府幾咁繁榮，幾咁巴閉。點知一個唔該，就正正喺擺緊宴席，大杯酒大塊肉時，錦衣軍就殺入榮、寧兩府抄家，「忽喇喇如大廈傾，昏慘慘似燈將盡」，一夜之間，由盛變衰。
回過頭，無限感恩，我出世嘅時候，物質唔充裕，但亦唔缺乏，生活過得無憂無慮。我青少年時，社會正喺上升軌，百花齊放，我喺自由空氣下成長。到拉埋天窗，成家立業時，有工返、有家庭，定時定候升職，定時定候又加人工。當時當日，只要運氣唔好太差，又畀啲心機工作嘅話，幾時擔心過生活?幾時擔心過失業?乜嘢都嚟得咁容易，所有嘢都好似係必然咁。而家睇返轉頭，原來呢個時候，正係香港盛極之時。
第十三囘，秦可卿病死報夢告戒王熙凰，佢話：
「『月滿則虧，水滿則溢』，又道是『登高必跌重』。如今我們家赫赫揚揚，已將百載，一日倘或『樂極生悲』，若應了那句『樹倒猢猻散』的俗語，豈不虛稱了一世詩書舊族了？」
睇下，現實世界，可以係咁相似。
香港開埠百幾年，機緣巧合可以獨善其身。唔係黑心，每當大陸有唔妥時，往往就係香港嘅機遇。當革命畀人趕絕時，香港就係革命基地，反清如是，反蔣如是，反毛如是，反鄧亦如是。當韓戰禁運，大陸物資缺乏時，香港就係𨍭運站，霍英東話愛國啫，佢亦拜海運而發跡。三反五反、三面紅旗，大批難民湧嚟，咁，香港就有勞動力，就有工業技術。由工業、轉口、到金融服務，每一樣都係因為大陸冇，我哋有，因而得益。百幾年後，乜都變晒，神州大地，除咗民主、自由、法治外，幾貴都買得起，而香港呢個獨善其身，都乖乖認祖歸「中」。特殊地位?重有咩!?正正應驗秦可卿嘅告戒。
秦可卿死時，正係賈府顛峰之時，鳳姐邊聽得入耳，不過都問：
「這話慮的極是，但有何法可以永保無虞？」秦可卿冷笑：「嬸娘好癡也！『否極泰來』，榮辱自古周而復始，豈人力所能常保的？」
秦可卿呢番說話，王熙鳯到賈府抄家時先至記返起，但係，一切已經太遲。
香港喺中英談判時，應該係最有談判籌碼嘅時候。嗰時冇搏晒命爭取，以為呢個小島永遠高人一等，永遠不可取代。就係應晒秦可卿呢番說話喇。
上個禮拜，翀翀同新袍仔約食晏。人到咗呢個時候，仔女約你，你梗𠼱飯應，速速赴會。我哋兩仔爺雞啄唔斷爭講嘢就梗嘅喇，我講到每晩都㷛緊電視劇，佢哋都覺得出奇。知道係紅樓夢，兩個都話有興趣。我趁機梗係又家庭教育一番，借石頭記故事，叫佢哋珍惜分秒。好時光邊有話永恆，有聚就有散，要珍惜眼前人。新袍仔即刻手指篤住夫婿心口，好似IQ博士裡面嘅小雲咁，篤，篤，篤，「記住呀，要珍惜眼前人呀。」好寃氣。
阿仔鍾意講政治，每日佢係fb嘅帖，大多數都係政治議題。香港，永遠係兩仔爺嘅議題。我話，香港嘅今日，唔好剩係怪人，自己都好有責任，末代港督彭定康，1996年，佢喺最後一份施政報告嘅最後一章，咁話：「我感到憂慮的，不是香港的自主權會被北京剝奪，而是這項權利會一點一滴地斷送在香港某些人手裡。」
紅樓夢第七十四回，惑奸讒抄檢大觀園。賈府兩派僕人互相唔妥，向主子撥弄是非，於是搞出抄檢大觀園。當搜到三小姐屋企，
「探春道：“你們別忙，自然你們抄的日子有呢！你們今日早起，不是議論甄家，自己盼着好好的抄家，果然今日真抄了。咱們也漸漸的來了！可知這樣大族人家，若從外頭殺來，一時是殺不死的。這可是古人說的，‘百足之蟲，死而不僵’！必須先從家里自殺自滅起來，才能一敗塗地呢！”說着，不覺流下淚來。」
諗起「愛」字頭嘅人。
105回，錦衣軍抄賈家，抄家後，賈政多次講，估唔到，賈家一敗塗地到呢個田地。睇住電視劇，再睇下我所生所長嘅香港。......可以噏啲乜?
紅樓夢第28回，講到行酒令，賈寶玉唱咗一首歌，紅豆曲。紅豆，係喻黛玉。今日以此作結
曹雪芹
滴不盡相思血淚拋紅豆；
開不完春柳春花滿畫樓；
睡不穩紗窗風雨黃昏後；
忘不了新愁與舊愁。
嚥不下玉粒金波噎滿喉；
照不盡鏡裏形容瘦；
展不開眉頭，
捱不的更漏。
展不開眉頭，
捱不的更漏。
呀！
恰便似遮不住的青山隱隱，
流不斷的綠水悠悠。
再噏過，
嚤囉
柯拿，大家好，
Merry Christmas, 唔駛驚，我唔係黐咗線，須知，香港熱到飛起之時，正是此間最凍之刻。我以前都應該提過：十二月聖誕節，正值袋鼠國嚴夏，熱辣辣過節梗係冇癮，所以喺凍凍嘅七月，袋鼠佬搞番個偽聖誕嚟玩下，稱之為Christmas in July 。以往，好多公司借題發揮，又佈置，又減價，都係銷售策略啫。但係，如今已經式微，市面再睇唔到。就係早一個禮拜，有個老鬼客同我講 Mary Christmas ，我先至醒番起。不過，到佢嗰一代人都香埋，就真係搵鬼同你講嘞。物換星移，世上有乜嘢東東係永恆?!
都講過跌晒watt，到而家都未係好夠電。為咗個肚腩仔，朝早都有去完gym至開工。但係夜晚一條友就眼光光，懶洋洋，乜都唔想做。正係hea 到心慌慌，忽然見到牀邊櫃面，有套50集嘅電視劇紅樓夢。諗都唔駛諗喇，一於㷛劇。
食完飯，之之坐坐，搞到七點零、八點。即刻上房，開定暖爐上床冚好被，電話、iphone、iPad 、remote、擺晒喺牀上，手可以觸及嘅地方，方便長時間作戰，以免要離開暖笠笠嘅𢇁棉被。set 好晒嘢，一撳個play掣，hah hah hah，不得了，一集，一集，又一集。如是者，晩晚睇到兩、三點至肯瞓。咁勤力，50集長劇，畀我一個禮拜㷛晒，諗番起，我都覺得我好犀利，唔駛點瞓，重咁有精神開工。
其實120回紅樓夢（係書，唔係劇集），我前年已經睇過。唔講唔知，原來睇紅樓夢，要一邊睇一邊查工具書，唔懶得，否則，唔會睇得明，而家再翻睇電視劇，有原著背景，當然好容易理解其中人物、角色、故事及個中関係。我享受得很。而且呢50集，非常忠於原著，我向大家超級推介。
紅樓夢，我最難忘嘅情節，就梗係第五回，寶玉夢遊太虛幻境，同埋第六回。點解?自己查下回目就知我講乜嘞。
唔知係唔係半夜三更，精神特別放鬆，抑或套劇真係拍得好好，又或者現實世界根本就係咁樣。好感動，經常睇到眼濕濕。紅樓夢，就係講賈府由盛變衰。由黛玉初入賈府開始，元妃省親建大觀園，又下喻寶玉、姊妹入住。園內日常動，結詩社、劉佬佬入大觀園等等，在在顯示賈府幾咁繁榮，幾咁巴閉。點知一個唔該，就正正喺擺緊宴席，大杯酒大塊肉時，錦衣軍就殺入榮、寧兩府抄家，「忽喇喇如大廈傾，昏慘慘似燈將盡」，一夜之間，由盛變衰。
回過頭，無限感恩，我出世嘅時候，物質唔充裕，但亦唔缺乏，生活過得無憂無慮。我青少年時，社會正喺上升軌，百花齊放，我喺自由空氣下成長。到拉埋天窗，成家立業時，有工返、有家庭，定時定候升職，定時定候又加人工。當時當日，只要運氣唔好太差，又畀啲心機工作嘅話，幾時擔心過生活?幾時擔心過失業?乜嘢都嚟得咁容易，所有嘢都好似係必然咁。而家睇返轉頭，原來呢個時候，正係香港盛極之時。
第十三囘，秦可卿病死報夢告戒王熙凰，佢話：
「『月滿則虧，水滿則溢』，又道是『登高必跌重』。如今我們家赫赫揚揚，已將百載，一日倘或『樂極生悲』，若應了那句『樹倒猢猻散』的俗語，豈不虛稱了一世詩書舊族了？」
睇下，現實世界，可以係咁相似。
香港開埠百幾年，機緣巧合可以獨善其身。唔係黑心，每當大陸有唔妥時，往往就係香港嘅機遇。當革命畀人趕絕時，香港就係革命基地，反清如是，反蔣如是，反毛如是，反鄧亦如是。當韓戰禁運，大陸物資缺乏時，香港就係𨍭運站，霍英東話愛國啫，佢亦拜海運而發跡。三反五反、三面紅旗，大批難民湧嚟，咁，香港就有勞動力，就有工業技術。由工業、轉口、到金融服務，每一樣都係因為大陸冇，我哋有，因而得益。百幾年後，乜都變晒，神州大地，除咗民主、自由、法治外，幾貴都買得起，而香港呢個獨善其身，都乖乖認祖歸「中」。特殊地位?重有咩!?正正應驗秦可卿嘅告戒。
秦可卿死時，正係賈府顛峰之時，鳳姐邊聽得入耳，不過都問：
「這話慮的極是，但有何法可以永保無虞？」秦可卿冷笑：「嬸娘好癡也！『否極泰來』，榮辱自古周而復始，豈人力所能常保的？」
秦可卿呢番說話，王熙鳯到賈府抄家時先至記返起，但係，一切已經太遲。
香港喺中英談判時，應該係最有談判籌碼嘅時候。嗰時冇搏晒命爭取，以為呢個小島永遠高人一等，永遠不可取代。就係應晒秦可卿呢番說話喇。
上個禮拜，翀翀同新袍仔約食晏。人到咗呢個時候，仔女約你，你梗𠼱飯應，速速赴會。我哋兩仔爺雞啄唔斷爭講嘢就梗嘅喇，我講到每晩都㷛緊電視劇，佢哋都覺得出奇。知道係紅樓夢，兩個都話有興趣。我趁機梗係又家庭教育一番，借石頭記故事，叫佢哋珍惜分秒。好時光邊有話永恆，有聚就有散，要珍惜眼前人。新袍仔即刻手指篤住夫婿心口，好似IQ博士裡面嘅小雲咁，篤，篤，篤，「記住呀，要珍惜眼前人呀。」好寃氣。
阿仔鍾意講政治，每日佢係fb嘅帖，大多數都係政治議題。香港，永遠係兩仔爺嘅議題。我話，香港嘅今日，唔好剩係怪人，自己都好有責任，末代港督彭定康，1996年，佢喺最後一份施政報告嘅最後一章，咁話：「我感到憂慮的，不是香港的自主權會被北京剝奪，而是這項權利會一點一滴地斷送在香港某些人手裡。」
紅樓夢第七十四回，惑奸讒抄檢大觀園。賈府兩派僕人互相唔妥，向主子撥弄是非，於是搞出抄檢大觀園。當搜到三小姐屋企，
「探春道：“你們別忙，自然你們抄的日子有呢！你們今日早起，不是議論甄家，自己盼着好好的抄家，果然今日真抄了。咱們也漸漸的來了！可知這樣大族人家，若從外頭殺來，一時是殺不死的。這可是古人說的，‘百足之蟲，死而不僵’！必須先從家里自殺自滅起來，才能一敗塗地呢！”說着，不覺流下淚來。」
諗起「愛」字頭嘅人。
105回，錦衣軍抄賈家，抄家後，賈政多次講，估唔到，賈家一敗塗地到呢個田地。睇住電視劇，再睇下我所生所長嘅香港。......可以噏啲乜?
紅樓夢第28回，講到行酒令，賈寶玉唱咗一首歌，紅豆曲。紅豆，係喻黛玉。今日以此作結
曹雪芹
滴不盡相思血淚拋紅豆；
開不完春柳春花滿畫樓；
睡不穩紗窗風雨黃昏後；
忘不了新愁與舊愁。
嚥不下玉粒金波噎滿喉；
照不盡鏡裏形容瘦；
展不開眉頭，
捱不的更漏。
展不開眉頭，
捱不的更漏。
呀！
恰便似遮不住的青山隱隱，
流不斷的綠水悠悠。
再噏過，
嚤囉
No comments:
Post a Comment