2011.08.16 好有尊嚴買張飛，噏聲拜拜就柯彌

2011.08.16

好有尊嚴買張飛，噏聲拜拜就柯彌

柯拿，大家好，

Ｋ仔喺報天氣之餘，報告咗一單醫學新知。希望多啲突破，醫多啲「不治」之症就好嘞。話時話，因為醫學進步，人類愈嚟愈衾擺，攪出好多社會問題。星期六晚同朋友打邊爐時，講起「老而不死」呢個大問題，大家都認為，終有一日（幾耐？）安樂死會比人廣泛接納。咁，到嗰時，街頭巷尾都有安樂天國車站。想遠赴天國嘅人，買張飛，就好尊嚴咁作別塵世啦。……咦，長者及傷殘人士喺非繁忙時間買飛，有冇優惠咁呢，又。

唔好亂咁估，我係顛顛dut dut，大家都知啦。不過想話，生老病死，人之常情，無須睇得太灰，處之泰然可也！

上周聽商台杏林茶，Dr Tim提及大唐有間診所，免費幫女仕作婦科檢查。免費檢查？有冇咁好死！各位姊妹請小心，呢間診所喺棉花棒造手腳，將致病細菌、病毒放落棉花棒，再同人檢查。貪便宜免費接受檢查嘅人，最後反而惹到周身病。既然檢出有事，梗係要比錢醫啦！咁，呢間診所就賺到盤滿砵滿啦。冇醫德？醫德幾錢斤？

好多人都十分讚賞總設計師嘅名言﹕唔理黑貓白貓，捉到老鼠嘅就係好貓。呢間診所嘅做法，正正體現小平名言。唔理有醫德冇醫德，揾到錢就得。推而廣之﹕

唔理好奶毒奶，賺到錢嘅就係好奶

唔理真蛋假蛋，賺到錢嘅就係好蛋

唔理真藥假藥，賺到錢嘅就係好藥

…………。

淨係睇結果，而唔理程序是否合理。淨係睇結果，而唔理是否道德。最終結果就係咁嘞！

浪子心聲，係我喜歡嘅歌，以此作結。

難分真與假　

人面多險詐　

幾許有共享榮華　

簷畔水滴不分差

無知井裡蛙　

徙望添聲價

空得意目光如麻　

誰料金屋變敗瓦

命裡有時終須有　

命裡無時莫強求

雷聲風雨打　

何用多驚怕　

心公正白壁無瑕　

行善積德最樂也

人比海裡沙　

毋用多牽掛　

君可見漫天落霞　

名利息間似霧化

再噏過

嚤囉