2013.09.16 雪山腳下噏the福，踩中冰氹一定仆

2013.09.16 

雪山腳下噏the福，踩中冰氹一定仆

柯拿，大家好，

先大笑三聲，哈哈哈，因為我而家放緊假。五日嘅雪山假期，中間呢一日，下午兩點結束，就有一個下畫 hea 下，趁機又寫篇嘢，同大家噏下喇。

袋鼠國可以提供畀旅遊用嘅雪場，都集中喺紐修威、維多利亞兩州交界處。全個澳洲平坦坦，就只有呢度有高山。全澳最高山峰　Mount Kosciuszko，就只有2228公尺，又因為地處温帶，山雖然唔高，冷天都積到唔錯嘅雪。所有嘅雪場都喺 Mt Kosciuszko  周圍附近。

由六月尾開始，雪場就開放，直至十月初，滑雪季節就結束。當然最好雪就係八，九月。以我有限嘅經驗，最好夜晚落咗一場大雪，早上即刻去滑，呢個時候啲雪，仍然係一粒粒，雪板滑過去，聽到清脆嘅嗦嗦聲，雪地又鬆軟，跌倒時只會濺起雪花，絶對唔痛。以我啲水皮技術，最好控制，就係呢啲雪。

再耐啲，又冇新雪落，雪粒變成粉狀，個地亦硬咗好多，已經冇咁好玩嘞，不過，如果夠厚，都係OK嘅。最大鑊嘅就係啲將近變成冰嘅雪，又硬又滑，唔小心剷埋去，一定PK收場，重一定鬼咁痛，如果八月十五打椿式落地，分分鐘會撞親大陣，可大可小。當雪變成冰，唔好話滑雪，連企都企唔穩。

由天跌落嚟嘅，叫雪，地面上嘅水結成嘅，係冰。係雪場附近，成日有一笪二笪冰氹，唔小心踩咗上去，一定人仰馬翻。香港人踩咗上去，就會大叫「哎唷，有冇搞錯」。鬼佬鬼妹就會大叫「Oh sh.., what the F」。

唔好話我執人口水尾，因為粗口大狀𠴱件事，我噏過一篇嘢，話WTF，根本係生仔女嘅日常用語，而且係簡化咗。其實可以講成以下咁：

WTF is that ? 乜嘢嚟㗎? 咁都得?....

WTF you are talking about? 你噏乜嘢?....

WTF are you ?乜嘢人嚟㗎? 記得大隻佬有套戲，講佢同外太空識隱形嘅生物打，大隻佬梗係打贏喇，佢對住嗰隻嘢講，What the hell are you， F就係Hell嘅粗口版。咁，佢有幾遍及，唔好問我，問下大家嘅乖乖，你就知佢哋當唔當呢句係粗口。咁，當然佢哋要同你講真話喇。

我諗緊，如果我在場，我會講啲乜。

其實，全世界都知道，粗口根本唔係核心所在。你假期唔去玩，去咗遊行，有人就會話你阻塞交通，而唔會問你點解咁做。你喺議會掟蕉掃枱，有人就會話你咁粗魯，唔守規矩，而唔會問你點解咁做。你而家當街指住差人鬧八公八婆，鬧完又冇人理，大叫WTF，有人就會話你身為教師，當街講粗口，教壞學生，而唔會問你點解咁做。喂，差人唔係應該分開兩班人咩?而家用繩圍埋一齊，實打交喇。睇下法輪功，再睇下青関呢班紅色娘子軍，重有洪常青政委，真善忍呢班阿嬋邊夠班? 你咁樣向佢解釋，佢當聽唔到，一口只咬住你講粗口。咁嘅粗口小事，重要勞駕到特首阿狼要人交報告。真係WTF is that! 再問多一句WTF are you?

道理其實一字咁淺，路人皆見。遊行?絕對係民主大花瓶，幾十萬人?一百萬人？任你噏，有乜所謂。䢟行完，條街重乾淨過以前，大家繼續跳舞，咁有乜問題?再講議會，咁嘅組成辦法，當然已經大權在握，駛乜同你抝，舉手都舉死你喇。掟蕉?掃枱?大聲鬧?揾實Q掟你走，大家繼續開河蟹大會，一眾反對派繼續少罵大幫忙，咁有乜問題?

皇家香港警隊，變身特區警察，以前有皇家稱號，沾染些少英倫價值，咁係常態。而家換咗老闆，受人二分四，為老闆排難解困，亦係應有之義。法輪大法篤眼篤鼻，青関組織授命搞掂佢，特區警察唔駛問WTF is that ，都知呢班友身穿黃馬褂，幫佢阿爺做緊嘢，咁又點會阻欽差辦公呢?不過，最衰有啲唔識死，重做架樑。一定要佢哋做鵪𪂹，以後見到唔順眼，千祈咪出聲，最好運路走。重有人唔識死，警察拉你、金毛郁你，再唔係，搞到你連份工都冇埋。香港人，為口奔馳，只要有份安樂茶飯，民權?公義?幾錢斤?冇咗份工，點養仔女?點供樓?點算?....你點夠佢鬥!

灰!好灰!

最近鍾意講正邪，非常喜歡呢首歌

難為正邪定分界

合唱：葉振棠/麥志誠

詞：鄭國江

曲：顧家輝

人：對抗命運但我永不怕難　過去現在難題迎刃解

       人生的彩筆蘸上悲歡愛恨　描畫世上百千態

魔：控制命運任我巧安排　看似夢幻凡人難盡瞭解

       人間的好景給我一朝破壞　榮辱愛恨任分派

＊人：努力未願平賣　人性我沒法賤賣

魔：今天死結應難解

人：努力興建

魔：盡情破壞

合：彼此也在捱

人：世界腐敗犯法那需領牌（看吧邪力正強大）

人：法理若在為何強盜滿街（看吧強盜滿街）

人：人海的衝擊比那蒼海更大（啊啊）

合：難為正邪定分界

Repeat ＊

　

再噏過

嚤囉，

寫於雪山外馬房小旅館