2012.10.05 單車三國遊，噏得玩得樂忘憂

2012.10.05 

單車三國遊，噏得玩得樂忘憂。

柯拿，大家好，

煲呔執政時，我講，呢個政府真難搞，議會又冇support，人人以媽义曾政府作為獲得民意嘅手段。點知呢隻阿狼政府重大鑊，唔夠百日，民怨沸騰，邊個數吓有幾多個百萬人次曾經走上街畀顏色佢睇。而家先至係開始，以後點搞？

十月一日係勞工日labour day，有人幫手睇鋪，我就可以去中大校友會家庭日大旅行。盡興返歸，夜晚，正在上載啲相去面書，就聽到南丫島撞船意外嘅消息。即刻諗起2010年8月菲律賓人質事件。人生真無奈，前一分鐘重係嘻嘻哈哈，後一分鐘橫禍飛來。都係嗰一句，掌握現在，珍惜眼前人。應該食就食，玩就玩；企起身，做你想做嘅嘢，莫負今宵。下一分鐘會係點？who knows？who cares？

阿狼政府真係唔「老利」，炸彈一個個排住隊嚟爆，都唔在講，重要喺上台第一個「十一」，就咁大鑊，就算唔係佢搞出嚟，「不祥人」呢個名，佢都走唔甩喇。都再唔講跟住嘅每一個跟進做法都甩甩漏漏，真大劑。

大家知，我係有得玩就玩嘅人。呢個月尾28號，又出街玩喇，今次去中美洲三個國家。先去尼加拉瓜，會逗留一個禮拜，朝早會學西班牙文，下午會有參觀活動。唔會奢望學得好叻，學得幾多得幾多喇。晚上會住民宿，住喺人哋屋企，焗住要講西文，睇吓點！

然後喺尼加拉瓜會合一個單車團，跟住嘅14日，就係單車活動，平均每日要踩約60km。一路踩單車，一路欣賞風景，應該都幾過癮。踩單車過海關去哥斯達尼加，再去巴拿馬，橫跨中美洲三國，應該係難忘嘅經驗。最hi light 應該係喺巴拿馬運河邊，一路踩單車，一路睇大船過船閘，諗起都開心。

個團喺首都巴拿馬城解散，我再留多一日巴拿馬城，係咁意四周圍睇睇。回程經洛杉磯，就喺LA留三晚，各位有乜提議，LA三日遊，有乜好玩，拜託畀吓議見，娉霞應該係地膽，到時會唔會喺附近？有冇好提議？指點吓好喎。

11月22號返到雪梨，全程25日。

好可惜今次回程經唔到香港，可能要到出年至有機會同各位飲茶。

再噏過

嚤囉